Раҳбари мухолифини Эрон Мирҳусейни Мӯсавӣ гуфтааст, Ҷумҳурии Исломӣ ба вартаи бӯҳрон фурӯ меравад ва танҳо тағйири дидгоҳи роҳбаронаш метавонад ин низомро ҳифз кунад. Мӯсавӣ тавассути сомонаи интернетиаш – “Калима” дар посух ба бастани ду гурӯҳи бузурги ислоҳталабон дар таърихи 19 апрел ҳушдор дод, ки фикр накунед, ки наҳзати ислоҳталабӣ дигар вуҷуд надорад. Ӯ ҳамчунин аз мақомот интиқод кард, ки Исломро бо ҳадафи саркӯбии мухолифин сӯъиистифода мекунанд. Мӯсавӣ дар интихоботи ахири раёсатҷумҳурӣ бо Маҳмуди Аҳмадинажод вориди мубориза шуд. Тарафдорони ӯ мегӯянд, пирӯзии Аҳмадинажод дар интихоботи моҳи июни соли гузашта танҳо дар натиҷаи тақаллуб муяссар шудааст.