Пайвандҳои дастрасӣ

Хабари нав

Хабарҳо

Амрико ба Рӯзи сипос омодагӣ мебинад

Мардуми Амрико имрӯз Рӯзи сипос, як ҷашни хоси Ийолоти Муттаҳидаро ҷашн мегиранд. Раисиҷумҳури Амрико Барак Обама дар паёми ба ин муносибат гуфт, Рӯзи сипос фурсати муносибест барои пардохтан ба арзишҳои хубе, чун аҳли хонавода, ёру дӯстон ва ҳам расидан ба онҳое, ки бахт ба рӯяшон камтар хандидааст. Рӯзи сипос ба шарафи ҳиндуҳои бумиест, ки тақрибан 400 сол қабл бо оростани хони зиёфат шиками муҳоҷирони аврупоиро бо гӯшти мурғи марҷон сер карданд. Ба ин далел, таҳияи ғизо аз гӯшти мурғи марҷон як анъанаи ҳатмии таҷлили Рӯзи сипос барои хонаводаҳои амрикоист.

Ҳамаи хабарҳои имрӯзро дар инҷо бихонед

Украина гуфт, Русия даъватҳо ба муколамаро нодида мегирад

8-уми апрел, минтақаи Луҳанск. Президенти Украина Владимир Зеленский барои ошноӣ бо хати ҷанг ба шарқи Украина рафтааст

Украина гуфт, аз Русия дархост кард, ки мавзӯи афзоиши танишҳо дар шарқи Украинаро муҳокима кунанд, вале то ҳол посухе дарёфт накардааст, дар ҳоле, ки Маскав ин иддаоро рад мекунад. Киев ва Ғарб дар хушунатҳои ахире, ки дар минтақаҳои шарқи Укрина - Донетск ва Луҳанск рух доданд, ҷудоиталабони рӯ ба Маскавро гунаҳгор карданд, вале Маскав баръакс гуноҳро ба сари Киев бор мекунад.

Дар наворҳои видеоиву аксҳое, ки ахиран нашр шуд, дида мешавад, ки нирӯҳои Русия дар марзи шарқии Украина ва ҳам нимҷазираи Қрим таҷаммӯъ мекунанд ва ин ҳолат нигарониҳо аз эҳтимоли ирсоли нирӯҳои русӣ ба Украинаро бештар кардааст. Дар изҳороте, ки 12-уми апрел вазорати хориҷаи Украина нашр кард, гуфта мешавад, ки бар асоси созиш бо Маскав ва шарикони байналмилалӣ, аз Русия расман суол шудааст, ки “ҳузури азим”-и нирӯҳояш дар чанд рӯзи ахир дар марз бо Украина ва қаламравҳои ишғолшудааш шарҳ дода шавад. Дар изҳорот омадааст: “Мутаассифона, ҷониби Русия аз шарҳи ин қазия худдорӣ мекунад ва мегӯяд, ки чунин чиз вуҷуд надорад”. Дар изҳорот омадааст, ки Киев аз Русия хост, “нирӯҳояшро аз марзи Украина дур кунад ва пахши суханрониҳои ҷангталабона ва хабарҳои дурӯғинро хотима диҳад”.

Юлия Мендел, сухангӯи президент Владимир Зеленский рӯзи 12 апрел гуфт, ки дафтари президент “барои муколамаи мустақим бо президент Владимир Путин дархост дод”, вале “мо то ҳол ҳеҷ посухе дарёфт накардем ва мо умедвор ҳастем, ки ин ба маънои рад шудани муколама нест”. Хабаргузориҳои русӣ аз қавли Дмитрий Песков, сухангӯи Кремлин гуфтанд, ки “аз чунин дархостҳо ҳеҷ хабаре надорад”.

Дар Беларус нашри барномаҳои Euronews  қатъ шуд

Александр Лукашенко соли 2014 ба Euronews мусоҳиба додааст

Дар Беларус шурӯъ аз 12-уми апрел пахши барномаи ТВ Euronews қатъ шуд. Дар вазорати иттилооти Беларус ба РИА "Новости" гуфтанд, ки тасмими мазкур бо сабаби вайрон шудани қонунгузорӣ дар бораи реклама гирифта шудааст. Дар сайти худи ин сохтор омадааст, ки мӯҳлати иҷозатномаи пахши барномаҳои Euronews дар Беларус ба охир расид. Ҳамзамон дар хабар омадааст, ки дар қаламрави Беларус барномаҳои телевизиони русии “Победа” намоиш дода мешаванд, ки дар бораи Ҷанги дуюми ҷаҳон барномаву филмҳои сохтаи шӯравӣ қисса мекунад.

Euronews – як шабакаи телевизионии 24-соата аст, ки ба 13 забон хабарҳо пахш мекунад. Анҷумани журналистони Беларус қарори мақомотро дорои ангезаҳои сиёсӣ меноманд. Борис Горетский, муовини раиси Анҷумани журналистони Беларус гуфт, “ба эҳтимоли ғолиб, ин қарор бо ҳадафи дар инзивои бештари иттилоотӣ қарор додани мардуми Беларус содир шудааст. Мақомот аз тобистони гузашта ба ин сӯ дар атрофи ҷомеаи Беларус, ба истилоҳ, “девори чинӣ” сохта, журналистонро саркӯб ва маводи нашршударо масдуд мекарданд”. Коршиноси матбуотӣ Павлюк Биковский гуфт, дар Беларус аксарият ба чунин шабакаҳои нашаротии мисли CNN, Fox News ва дигар расонаҳо дастрасӣ надоранд, дар ҳоле, ки онҳо метавонанд чун алтернативаи шабакаҳои телевизионии давлатии Беларус ва Русия хидмат кунанд.

Аз августи порсол, вақте мухолифон ва бисёр сокинони Беларус ба натиҷаҳои интихоботи президентии ин кишвар бовар накарда даст ба эътироз заданд, мақомот аз саркӯб ва фишор кор гирифтанд. Баробар бо эътирозагони оддиву мухолифон, журналистон ҳам таъқиб ва ҳабс шуданд. Дар ин ҳама таҳаввулот Маскав аз Минск пуштибонӣ кард.

Amnesty аз Эрон хост, ҳукми қатли марди 30-сола иҷро нашавад

Пойафзоли як зиндонии эронӣ, ки баъди иҷрои ҳукми қатли ӯ дар кӯча мондааст

Созмони байналмилалии Amnesty International аз мақомоти Эрон хост, ки ҳукми қатли марди муттаҳам дар таҷовуз ба номуси кӯдакро иҷро накунад. Ин созмони воқеъ дар Лондон мегӯяд, ки ҳукми қатли Фарҳод Солеҳии Ҷобеҳдори 30-сола бояд 13-уми апрел дар вилояти шимолии Албурз иҷро шавад. Ҳуки қатли ӯ бо вуҷуди он ба нақшаи иҷро гирифта шудааст, ки дар як ариза аз додгоҳи олии Эрон хостанд, ки парвандааш бозбинӣ шавад. Дар як изҳороташ рӯзи 11 апрел Amnesty International гуфт, “ба иловаи ин ки қонунҳои байналмилалӣ татбиқи ҳукми қатлро дар сурати ҷинояти таҷовуз ба номус манъ мекунад, худ ба худ ин ҳукм ваҳшатнок ва ғайриинсонӣ буда, ҳеҷ гоҳ посухи муносиби ҷиноят буда наметавонад”. Ҷобеҳдор июни соли 2018 дар робита бо иртиботи ҷинсӣ бо тифли 10-солае дар соли 2017 боздошт шуд.

AI: Истирдодшуда аз Фаронса ба Чеченистон бо шиканҷаву марг рӯбарӯст

Магомед Гадаев

Созмони байналмилалии Amnesty International дар изҳороте рӯзи 11-уми апрел гуфт, як паноҳандаи сиёсии чечентабор, ки ахиран аз ҷониби Фаронса ба дасти оҷонсии амнияти Чеченистон таслим карда буд, бо шиканҷа ва ҳатто куштор рӯбарӯ аст. Бахши ин созмон воқеъ дар Фаронса гуфт, ки аз сарнавишти Магомед Гадаев шадидан нигарон ҳастанд. Ин мард 9-уми апрел аз Фаронса ба Маскав истирдод шуд. Нашрияи “Новая газета” гуфт, ки Гадаеви 37-соларо баробари расидан ба Маскав ба дасти амниятиҳои Чеченистон супурданд. Дар изҳороти Amnesty International омадааст, ки “ин мард дар гузашта дар қазияҳое дар бораи даст ба шиканҷа задани мақомоти чечен ба ҳайси шоҳид баёнот додааст ва ҳоло худи ӯ бо хатари шиканҷа ва ҳатто куштор рӯбарӯ мебошад”. Изҳороти мазкур ба номи президенти Фаронса Эммануэл Макрон ирсол шудааст. Гадаев то замони боздошту истирдодаш раиси ҷамъияти чеченҳои Париж ва ҳам як узви анҷумани чеченҳои Аврупо буд. Ӯ баъди фирор аз Чеченистон, ки он ҷо бо иттиҳоми ҷудоиталабӣ дар зиндон буду ҳадафи шиканҷа қарор гирифт, даҳ сол дар Фаронса зиндагӣ кард. Дар Фаронса ӯ нақл кардааст, ки чӣ гуна худи ӯ шоҳиди шиканҷаҳое будааст, ки нирӯҳои амниятии Чеченистон содир кардаанд.

Ҳушдори ИМА ба Русия дар заминаи таҷаммӯи нирӯ дар марз бо Украина

Дар шарқи Украина аз соли 2014 ба ин сӯ низоъҳои мусаллаҳонаи миёни артиши Украина ва ҷудоиталабони украинӣ ҷараён дорад, ки аз Русия пуштибонӣ мебинанд. То ҳол марги беш аз 13 ҳазор нафар тасдиқ шудааст.

ИМА бо нигаронӣ аз таҷаммӯи нирӯҳои Русия дар марз бо Украина ҳушдор дод, ки агар Русия дар нисбати Украина «бепарвоёна ва пархошгарона амал кунад», бо паёмадҳо рӯбарӯ хоҳад шуд. Энтони Блинкен, котиби давлатии ИМА рӯзи 11 апрел дар сӯҳбаташ дар барномаи «Мулоқот бо матбуот»-и NBC гуфт, «мавқеи президент Байден дар ин замина бисёр рӯшан аст». Ӯ гуфт, «агар Русия бепарвоёна ва пархошгарона амал кунад, ин кор нарх ва паёмад хоҳад дошт».

Чанд ҳафтаи ахир дар шарқи Украина низоъҳо миёни нирӯҳои ҳукуматии Украина ва ҷудоиталабони рӯ ба Русия авҷ гирифтаанд, чун шаҳодати он вуҷуд дорад, ки низомиёни Русия наздиктар ба марзҳои Украина дар шарҳи он кишвар ва ҳам дар дохили нимҷазираи ғасбшудаи Қрим ҳаракат мекунанд.

Кремлин талабҳои ақибкашии нирӯҳоро рад карда гуфтааст, ки дар ин сарҳадҳо хатар эҳсос мекунад ва ҳам ин кори дохилии он аст. Сухангӯ Дмитрий Песков рӯзи 11-уми апрел гуфт, «ҳеҷ кас дар андешаи ҷанг нест», вале афзуд, ки Маскав нисбати сарнавишти русзабонҳои сокини шарқи Украина «бепарво нахоҳад буд». Аз ин пеш 11-уми апрел вазири хориҷаи Бритониё Доминик Рааб гуфт, ки Лондон ва Вашингтон «қотеона мухолифи амалиёти бесобуткунандаи вазъ дар Украина» мебошанд ва аз Русия талаб кард, ки ба низоъ тавсеа набахшад.

Эътирозҳо дар Миннеаполис баъди куштори як ҷавони сиёҳпӯст

Эътирозҳо дар Миннеаполис

Куштори ҷавонмарди 20-солаи сиёҳпӯст аз ҷониби ходими полисе дар шаҳри амрикоии Миннеаполис шаби 11-уми апрел боиси эътирозҳо шуд. Замоне, ки издиҳоми мардум дар назди идораи полиси шаҳри Бруклин Сентер ҷамъ омад, полис ба сӯи онҳо бо гази ашковар посух дод. Ин ҳодиса дар ҳолест, ки дар Миннеаполис як сол пеш ходими сафедпӯсти полиси маҳаллӣ барои куштори марди сиёҳпӯст Ҷорҷ Флойд боздошт шуд ва ҳоло мурофиаи додгоҳии ӯ идома дорад. Эътирозгарон ду мошини полисро сангборон карданд. Раёсати полиси шаҳри Бруклин Сентер гуфт, ки ду ходими полис як ҷавонмардро барои вайрон кардани қоидаи ҳаракат дар роҳ нигоҳ доштанд ва баъди ин маълум шуд, ки ин шахс чандин бор ҳушдорҳои полисро нодида гирифтааст. Раёсати полис гуфт, вақте ходимони полис хостанд, ки ин мардро боздошт кунанд, ӯ ба мошинаш нишасту фирор кард, дар ҳамин ҳолат яке аз афсарон аз силоҳаш тир кушод. Мошини марди гумонбар чанд кӯчаро гузашта ба як мошини дигар бархӯрд. Вақте полис расид, хабар дод, ки мард ба ҳалокат расидааст. Модари ӯ талаб кард, ки иттилои бештар фароҳам кунанд. Таҳқиқи ин қазия шурӯъ шудааст.

Эрон барои ҳодисае дар Натанз Исроилро гунаҳгор кард

Натанз дар Исфаҳони Эрон ҷойгир аст

Эрон таҳдид кард, ки барои «харобкорӣ» дар муассисаи ҳастаии Натанз аз Исроил интиқом мегирад, чун ин кишварро дар сар задани ҳодисаи ахир гунаҳгор медонад. Алӣ Акбар Солеҳӣ, раиси Оҷонсии нирӯи ҳастии Эрон гуфт, ки дар як ҳодисаи «терроризми ҳастаӣ» рӯзи 11 апрел нирӯи барқ қатъ шуд ва ин ҳодиса як рӯз баъди он рух дод, ки дар ин корхона дастгоҳи нави ғанисозии ураниум ба кор дароварда шуд. Дар Натанз барномаи калидии ғанисозии ураниуми Эрон иҷро мешавад. Ин барнома зери назари Оҷонсии нирӯи ҳастаии СММ аст, ки гуфтааст, аз ҳодисаи ахир хабар дорад, вале онро шарҳ намедиҳад. Рӯзи 12 апрел телевизиони давлатӣ гуфт, ки вазири хориҷаи Эрон Ҷавод Зариф масъулияти рух додани ҳодисаро ба дӯши Исроил вогузор кард ва гуфт, “ин кишвар пешрафтҳои моро дар гуфтугӯҳо бо ҳадафи бекор кардани таҳримҳо намехоҳад, аз ин рӯ дар фикри интиқом аст”. Вале вазири эронӣ далели қавитари даст доштани Исроил дар ин ҳодисаро фароҳам накард.

Вале чандин матбуоти исроилӣ бо такя ба манобеи номаълуми истихборотӣ навиштанд, ки аз кор мондани Натанз кори дасти хадамоти иктишофии Моссад буд, то ки корҳои ғанисозии ураниум дар ин кишвар моҳҳо ба ақиб андохта шавад. Дар ҳоле, ки нахуствазир Бенямин Нетаняҳу Эронро азимтарин таҳдид ба Исроил меномад, дар заминаи эҳтимоли даст доштани ҳукуматаш дар ин ҳодиса ҳеҷ шарҳ ё раддияе надодааст.

Вале нашрияи амрикоии The New York Times бо такя ба манобеи амниятӣ дар ИМА ва Исроил навишт, ки Исроил дар “таркиши азиме” дар Натанз даст дорад. Ба навиштаи нашрия, таркиш боиси аз байн бурдани низоми барқдиҳии дохилӣ шуд, ки ғанисозии ураниум дар сентрифугаҳоро таъмин мекард. Ба навиштаи манбаъ, зарба ба низоми барқ то он андоза қавӣ буд, ки барои ҳадди аққал 9 моҳ корҳои ғанисозӣ дар Натанзро ғайриимкон мегардонад.

Омӯзгореро дар Узбекистон барои баҳои "ду" кӯфтаанд

Шоҳрух Оққӯзиев, муаллими яке аз мактабҳои Чиракчини Узбекистон.

Шоҳнур Оққузиев, омӯзгори забони англисии мактаби 134 ноҳияи Чиракчини Узбекистонро бародарони як хонанда барои баҳои "ду" латту кӯб карданд.

Омӯзгори латукӯбшуда дар бемористон бистарӣ шудааст. Ин ҳодиса рӯзи 6 апрел рух дод. Оққузиев гуфт, ки ба вай се бародари як хонандааш ҳамла кардаанд.

"Рӯзи 6 апрел ба хонандагони синфи 6 дарс медодам. Ба 7 хонанда, ки ба дарс омода набуданд, баҳои "ду" гузоштам. Яке аз хонандагон бо нишони норизоӣ аз синф берун шуд. Баъди дарс аз синф берун шудам, ки ҳамон хонанда маро мунтазир аст. Гуфт, бародарам шуморо интизор аст. Ман рафтам, се нафар буданд ва ногаҳон ба ман ҳамла карданд. Ман аз ҳуш рафтам", - гуфт Шоҳнур Оққузиев.

Мақомоти маорифи ноҳияи Чирак аз рӯи ин ҳодиса тафтишро шуруъ кардаанд.

Либоси милисаи тоҷик аз атласу адрас. Назарҳо яксон нест. АКС

Намунаҳои либоси идонаи милитсияи тоҷик, ки дар сайти vkd.tj нашр шудааст

Вазорати корҳои дохилии Тоҷикистон либоси нави занонаи кормандони милисаро рӯнамоӣ кардааст, ки аз ҷониби як тарроҳи суғдӣ таҳия шудааст. Вебсайти расмии ин ниҳод рӯзи 12-уми апрел бо нашри чанд акс намунаи либоси идонаи низомӣ ва саҳроии ходимони милитсияи Тоҷикистонро пешниҳод кардаанд, ки аз матои миллии адрас дӯхта шудаанд.

Ду намуна аз либоси занонаи бонувони милисаи тоҷик. Акс аз vkd.tj
Ду намуна аз либоси занонаи бонувони милисаи тоҷик. Акс аз vkd.tj

Маълум нест, ки оё ин либос тасдиқи сарфармондеҳи қувваҳои мусаллаҳи Тоҷикистон - президент Эмомалӣ Раҳмонро дарёфт хоҳад кард ё на.

Вале дар шабакаҳои иҷтимоӣ бархе аллакай ин аксҳоро муҳокима мекунанд.

Бархе аз ин либос ситоиш кардаанд, вале аз назари чанде дигар, либоси низомӣ наметавонад аз матои нарми мисли адрасу атлас таҳия шавад. Бархе мегӯянд, мақомот солҳои охир истифодаи матову нақшу нигори миллиро дар сару либоси расмиву ҷашнӣ аз ҳад зиёд кардаанд.

Дар Тоҷикистон солҳои охир сарулибоси кормандони идораҳои давлатӣ ва муҳассилони мактабу донишгоҳҳо сахт назорат мешавад ва бо тақозои мақомот, тарроҳон ҳам ба намунаҳои либосҳои корӣ унсурҳои миллӣ илова мекунанд.

"Ба доми билетфурӯшони фиребгар наафтед" - ҳушдори мақомоти тоҷик

Бо сабаби пандемия аз моҳи марти соли 2020 то апрели имсол роҳи парвоз ба самти Русия барои шаҳрвандони Тоҷикистон баста буд

Дар пасманзари тадриҷан боз шудани парвозҳои доимӣ ба Русия, вазорати меҳнат ва муҳоҷирати Тоҷикистон аз сокинон хостааст, ки ҳушёр бошанд ва ба сафар бо ҳуҷҷатҳои қалбакӣ нараванд. Мақомот инчунин сокинонро ҳушдор додаанд, ки ба ҳангоми харидани билети сафар ба самти Маскав аз ҳушёрӣ кор гиранд ва "ба доми фиребгарон наафтанд".

Маълум нест, ки оё манзури мақомот аз "наафтодан ба доми фиребгарон" чӣ аст, чун билети сафар ба Русия тавассути нуқтаҳои махсус таъиншуда танзим гардидаанд. Илова ба ин, бо сабаби маҳдуд будани шумори парвозҳои мунтазам ба Русия, феълан имкони харидани билет ба самти Маскав кори хеле сахту сангин аст ва арзиши он ҳам аз нархе, ки мақомот мегӯянд, дар асл ду-се баробар зиёд мебошад.

Шаҳрвандони Тоҷикистон феълан ҳақ доранд бо парвозҳои доимии ширкатҳои "Сомон Эйр" ва Ютейр ба пойтахти Русия бираванд. Ин ниҳод хотирнишон кардааст, парвозҳои ширкати "Уралские авиалинии" танҳо барои шаҳрвандони Русия ва онҳоест, ки барои сафар ба он кишвар асос доранд. Вуруди бидуни асос ба Русия тариқи парвозҳои чартерӣ боиси ихроҷ шудани шаҳрванди Тоҷикистон хоҳад шуд.

Вазорати меҳнат инчунин аз тоҷикони хоҳишмандони кор дар Русия даъват кардааст, ки ба Агентии шуғли хориҷӣ ва Хадамоти муҳоҷирати Вазорати меҳнату муҳоҷират муроҷиат кунанд.

Русия макони анъанавии кору даромади аксар шаҳрвандони Тоҷикистон аст, ки бо сабаби бекорӣ дар ватан маҷбуранд ба ин кишвар рӯ оваранд.

Матбуот: Дар Русия бо ширкати тоҷикҳову чечентаборҳо муноқиша бархост

Дарёи Нева аз маркази шаҳри Санкт-Петербург мегузарад

Як нашрияи русӣ мегӯяд, дар пайи занозании гурӯҳӣ ва тирпаронӣ дар шаҳри Санкт-Петербург даҳ нафар аз зодагони Тоҷикистон ва Чеченистон боздошт шудаанд. “Комсомольская правда” менависад, ки задухӯрд шоми 9-уми апрел дар маркази тиҷоратии "Пик" рух дод ва шоҳидони ҳодиса пулисро даъват кардаанд. Нашрия менависад, ки кормандони ҳифзи ҳуқуқ дар ҷойи ҳодиса тирҳои резиниро пайдо намуданд.

Лаҳзаи занозанӣ дар камераҳои назоратии маркази тиҷоратӣ сабт шудааст. Дар бораи он ки чанд тан аз боздоштшудаҳо тоҷиконанд, дақиқ гуфта намешавад. Як тан аз ширкатдорони муноқиша бо корд маҷрӯҳ ва бистарӣ гардидааст. Аз рӯи ин ҳодиса бо моддаи "авбошӣ" парвандаи ҷиноятӣ боз шудааст. Нашрия мегӯяд, ки чор тан аз дастгиршудаҳоро барои муайян кардани чораи пешгирикунанда ба додгоҳ интиқол дода, боқимондаро раҳ намуданд.

Ҷузъиёти бештари ин ҳодиса тавассути манобеи дигар феълан дастрас нест.

Дар Русия, ки макони кору даромади садҳо ҳазор шаҳрвандони Тоҷикистон мебошад, гоҳо дар бораи задухӯрдҳои гурӯҳии қавмӣ хабарҳо нашр мешавад. Ба қавли нозирон, аксар вақт сабаби муноқишаву бархӯрдҳо тақсими бозор ё даромадҳои тиҷоратӣ мебошад, чун дар бисёр ҳолатҳо нуқтаву маконҳои тиҷоратӣ зери назари ғайрирасмии гурӯҳҳои муайян қарор доранд.

Дар Инглистон фурӯшгоҳу сартарошхонаҳо боз мешаванд

29-уми март, як боғе дар Лондон

Дар Инглистон барои кам кардани маҳдудиятҳои коронавирус омодагӣ мебинанд, чун дар ин кишвар аксар қишри калонсол аз ду воя ё дозаи воксинаи зидди COVID-19 якеашро қабул кардаанд. Шурӯъ аз 12-уми апрел имкон дорад, ки ҳама фурӯшгоҳу хадамоти мисли сартарошхонаҳо боз шаванд ва имкони истироҳати беруна ба аъзои як оила ва бо шарти ин ки ғизоро худашон таҳия кунанд, фароҳам мешавад. Аксар машғулиятҳои варзишие иҷоза мешаванд, ки дар ҳавои тоза барпо шудани онҳо имкон дорад.

Ба тарабхонаву барҳо иҷоза доданд, ки фурӯши ғизову нӯшокиро дар берун аз бино ба роҳ монанд ва қарор аст нахуствазири Бритониё Борис Ҷонсон ин ҳодисаро дар як тарабхонае дар боғи боз бо нӯшидани оби ҷав таҷлил кунад. Ҷонсон таҳаввулоти ахирро “як иқдоми азим ба самти иҷрои нақшаи озод шудан” номид, вале айни замон таъкид кард, ки бояд аз эҳтиёт кор гирифту бо масъулияти тамом амал кард.

Дар Инглистон, ба қавли мақомот, беш аз 60 дарсади калонсолон ҳадди аққал як вояро гирифтаанд, вале мақомоти беҳдоштӣ ҳушдор медиҳанд, ки хатари омадани мавҷи нави олудашавӣ ҳамоно вуҷуд дорад, чун дар қисматҳои дигари Аврупо мушоҳида мешавад.

Вобаста ба вазъият, баъди 17-уми май қарор аст бархе маҳдудиятҳои иловагии дигар ҳам дар Инглистон бекор шаванд.

Як додраси Додгоҳи олии Қазоқистон барои гирифтани пора дастгир шуд

Додгоҳи олии Қазоқистон.

Додгоҳи шаҳри Нурсултони Қазоқистон 9-уми апрел як додраси Додгоҳи олии ин кишварро ба ду моҳи ҳабси пешакӣ маҳкум кард. Додрас Мейрам Жангуттинови 63-сола 11-уми феврали соли равон ҳангоми гирифтани ришва дастгир шуда буд.

Ба гуфтаи муфаттишон, Жангуттинов аз як додраси ноҳиявӣ дар вилояти Туркистони Қазоқистон барои гузаронидан ба ҷои кори дигар пул гирифтааст. Ин додрас ҳам дастгир шудааст.

Мейрам Жангуттинов соли 2011 додраси парвандаи фасодкории вазири тандурустии Қазоқистон Жаксилик Доскалиев буд. Доскалиев бо ҷурми фасодкорӣ 7 сол зиндонӣ шуд, вале президенти вақти Қазоқистон Нурсултон Назарбоев баъди 7 моҳ ӯро афв кард.

Дар раъйпурсии Қирғизистон наздики 80% аз Конститутсияи нав ҷонибдорӣ карданд

Раъпурсӣ дар Қирғизистон. 12-уми апрели 2021.

Рӯзи 11-уми апрел дар Қирғизистон раъйпурсӣ барои ислоҳи Қонуни асосии он кишвар баргузор шуд. Аз тарҳи нави Конститутсия, ки қудрати президентро бештар ва салоҳиятҳои порлумонро камтар мекунад, 79,2%-и раъйдиҳандагон ҷонибдорӣ кардаанд.

Танҳо 13,6%-и иштирокдорон зидди Конститутсияи нав овоз дода, наздики 7%-и варақаҳои раъйдиҳӣ беэътибор дониста шудааст.

Ба иттилои Комиссияи марказии интихобот ва раъйпурсии Қирғизистон, дар раъйпурсии 11-уми апрел 35,3%-и шаҳрвандони қобили раъйи ин кишвар иштирок кардаанд. Натиҷаи ниҳоӣ чанд рӯз баъд эълом мешавад.

Президенти Қирғизистон Содир Ҷабборов, ки ташаббускори тарҳи Конститутсияи нав аст, ҳангоми раъйдиҳӣ гуфт, "то ин дам Қирғизистон бо Конститутсияе зиндагӣ мекард, ки аз дигар кишварҳо нусхабардорӣ шуда буд".

Раъйпурсӣ баъди бештар аз се моҳи интихоби Содир Ҷабборов ба мансаби президенти Қирғизистон сурат мегирад. Ҷаборров, ки то моҳи октябри соли 2020 дар зиндон буд, дар пайи эътирозҳо аз натиҷаҳои интихоботи порлумонӣ тавассути ҷонибдоронаш озод карда шуд.

Ӯ аввал нахуствазир ва баъди зери фишор аз қудрат рафтани раиси ҷумҳури пешин, Сооронбой Ҷеенбеков, иҷрокунандаи вазифаи президент шуд. Дар интихоботи президентии моҳи январи имсол иштирок кард ва, ба иттилои расмӣ, пирӯз гардид.

Гуруҳе аз сокинони Қирғизистон Содир Ҷабборовро барои ислоҳи Қонуни асосӣ танқид карда, гуфтаанд, ӯ барои эҷоди як ҳукумати худкома шитоб дорад. Ба бовари онҳо, тағйирот ба Конститутсия ба президент салоҳияту қудрати бештар медиҳад.

Созмони Дидбони Ҳуқуқи Башар ё Human Rights Watch пештар гуфта буд, ки "тарҳи Конститутсия ба меъёрҳои ҳуқуқи башар, ки Қирғизистон ба риояи он тааҳҳуд кардааст, посухгӯ нест".

Содир Ҷабборов моҳи март дар як мусоҳиба бо Радиои Озодӣ аз тағйирот ба Қонуни асосӣ ҳимоят кард. Ӯ рӯзи 11-уми апрел ба хабарнигорон гуфт, "Кумисюни марказии интихобот натиҷаҳои раъйпурсиро бояд дар зарфи 10 рӯз эълон кунад. Пас аз он, бояд лоиҳаҳои навро ба порлумон пешниҳод кунем. Бояд ҳамаи тарҳҳоро тибқи Конститутсияи нав қабул кунем. Дар ҳоли ҳозир теъдоди зиёде аз қонунҳо бо ҳам мухолифат доранд, бахусус Кодекси ҷиноӣ ва Кодекси мурофиавии ҷиноӣ."

Қирғизистон 6,5 миллион аҳолӣ дорад ва аз соли 2005 се дафъа шоҳиди инқилоб ва ё бо зӯр сарнагун шудани ҳукумат будааст.

Путин гуфт, фарзандони муҳоҷирон ба сатҳи дониши хонандагони маҳаллӣ таъсири манфӣ мерасонанд

Яке аз мактабҳои Русия. Акс аз бойгонӣ.

Президенти Русия Владимир Путин аз афзоиши шумораи фарзандони муҳоҷирон дар мактабҳои он кишвар изҳори нигаронӣ кард. Ӯ даъват кард, ки теъдоди фарзандони муҳоҷирон дар мактабҳои Русия кам карда шавад.

Путин, ки дар Шӯрои муносибатҳои байни миллатҳо суханронӣ мекард, гуфт, фарзандони муҳоҷирон ба сатҳи дониши хонандагони маҳаллӣ таъсири манфӣ расонида, сабаби ангезиши бадбинии қавмӣ мешаванд.

"Шумори фарзандони муҳоҷирон дар мактабҳои мо бояд дар сатҳе бошад, ки амалан имкон диҳад, то онҳо ба муҳити забони русӣ мутобиқ шаванд. Албатта, на танҳо муҳити забонӣ, балки ба муҳити фарҳангӣ ва дар умум ба низоми арзишҳои русии мо ворид шаванд", - афзуд ӯ.

Президенти Русия вазъи ба вуҷуд омада дар "ИМА ва баъзе аз кишварҳои аврупоӣ"-ро намуна овард. Ба гуфтаи ӯ, дар баъзе аз кишварҳои ғарбӣ шумораи фарзандони муҳоҷирон дар мактабҳо ба ҳадде афзоиш ёфта, ки сокинони маҳаллӣ маҷбур шудаанд, фарзандони худро ба дигар мактаб бибаранд.

Путин афзоиши шумораи фарзандони муҳоҷирон дар мактабҳои Русияро "мушкили бузург" номида, хост, теъдоди онҳо сахт назорат шавад.

Дар Узбекистон шумори камбизоатонро "кам мекунанд"

Узбекистон. Акс аз бойгонӣ.

Аз 2069 хонаводаи камбизоате, ки соли гузашта дар ноҳияи Чинози вилояти Тошканди Узбекистон ба қайд гирифта шуда буд, номи 1684 оиларо аз "Дафтари оҳанин" хат задаанд. Дар рӯйхат танҳо 385 хонаводаи камбизоат боқӣ мондааст.

Дар миёни сокинони Чиноз, ки аз рӯйхат хат зада шуданд, марди 36-солаи маъюб ва падари ду фарзанд Чорӣ Ниёзов низ ҳаст. Ӯ мегӯяд, намефаҳмад, ки чаро номи вайро дар рӯйхати камбизоатон хат задаанд.

"Шаш сол мешавад, ба бемории табобатнашаванда гирифторам. Бемории фишорбаландӣ, қанд ва касалии дигаре дорам, ки наметавонам бигӯям. Ин беморӣ ба ҳамсарам ҳам сироят кардааст. Ман ҳамроҳи ҳамсарам ба гуруҳи дувуми маъюбӣ шомилем", - гуфт Ниёзов.

Ба "Дафтари оҳанин" хонаводаҳои камбизоат, шахсони маъюб, пиронсолони танҳо, шаҳрвандони бекор, онҳое, ки ба иллати карантин бекор мондаанд шомил шуда, ба онҳо хидматрасонии тиббӣ ройгон ва дар гирифтани қарз барои соҳибкорӣ имтиёз дода мешавад.

Президенти Узбекистон Шавкат Мирзиёев моҳи августи соли 2020 гуфта буд, ки дар он кишвар наздики 5 миллион одам дар фақр ба сар мебаранд. Яъне, ҳар панҷумин узбекистонӣ камбизоат аст.

Боздошти баҳсбарангези як ҷавонро дар Душанбе шарҳ доданд

Мақомот мегӯянд, боздошти Имомалӣ Идибегов ба "сарбозшикор" рабт надорад

Дар Вазорати корҳои дохилии Тоҷикистон навори боздошти ҷавонеро дар Душанбе шарҳ доданд.

Мақомот рӯзи 11-уми апрел гуфтанд, ҳамон тавр, ки дар шабакаҳои иҷтимоӣ зикр шудааст, ҳодиса ба "сарбозшикор" ё "облава" рабт надорад, балки амалиёти дастгир кардани як шахси гумонбар ба ҳамкорӣ бо ДОИШ аст.

Аз ҷавон Имомалӣ Идибегов, сокини 38-солаи ноҳияи Рӯдакӣ ва падари се фарзанд, ном бурдаанд. То ҳанӯз назари наздиконаш ба қазия маълум нест.

Навори боздошти ҷавон дар маҳаллаи 46-уми пойтахт рӯзи 9-уми апрел ба шабакаҳои иҷтимоӣ роҳ ёфт. Дар ҳоле ки маъмурони интизомӣ ҳамон лаҳза далели боздошти ӯро шарҳ надоданд, аксарият саҳнаро ба "сарбозшикор" рабт доданд.

Масъулони Вазорати корҳои дохилии Тоҷикистон Имомалӣ Идибеговро "ҷинояткори махсусан хавфнок" тавсиф карда, гуфтаанд, боздошти ӯ рӯзи 6-уми апрел сурат гирифт. "Дастгир кардани ӯ бар асоси маълумоти дақиқи оперативӣ ва парвандаи ҷустуҷӯии ҷиноӣ бо моддаи 205-и Кодекси ҷиноии Федератсияи Россия ва моддаи 401, иловаи 1-и Кодекси ҷиноии Ҷумҳурии Тоҷикистон амалӣ карда шуда, ӯ дар ҳабси пешакӣ қарор дорад", - омадааст дар баёнияи ВКД.

Ба иттилои расмӣ, ӯ солҳои 2015-2017 дар муҳоҷирати корӣ дар шаҳри Маскав буда, гуё "тавассути шабакаҳои интернетӣ пайравӣ ва ҷонибдорияшро ба ДОИШ ифода намудааст".

Мақомоти Тоҷикистон мегӯянд, Имомалӣ Идибегов дар ҳудуди Русия бо Темур Амиров ва Даврон Сулаймонов (шаҳрвандони Узбекистон) ба хазинаи гуруҳи "Давлати исломӣ" пул гузаронда, нақшаи амалиёти террористиро доштаанд. Тасдиқи дурустии ин иддао аз манобеи дигар феълан имкон надорад.

Танҳо дар як феҳристи шахсони гумонбар ба ҳамкорӣ ва сармоягузорӣ ба созмонҳои мамнуъ, ки рӯзномаи "Российская газета" солҳои 2017 ва 2018 нашр кардааст, номи Имомалӣ Идибегов ва Темур Амирову Даврон Сулаймонов низ зикр шудааст.

Вазорати корҳои дохилӣ мегӯяд, ду шаҳрванди Узбекистон дар Русия дастгир шуда, Имомалӣ Идибегов ба Тоҷикистон фирор кардааст, аммо нагуфтаанд, ки ӯ кай ба Тоҷикистон омад ва чаро амалиёти боздошти ӯ баъд аз чаҳор соли буданаш дар Русия сурат гирифт.

Русия чанде аз шаҳрвандони Тоҷикистонро барои ҳамкорӣ бо созмонҳои фаъолияташон мамнуъ ҷустуҷӯ дорад. Аксу номи чанде аз онҳо дар сомонаи "Интерпол" ҳаст. Бархе дигар дастгиру муҷозот шудаанд, вале пайвандонашон ҳамвора ҳамкории онҳоро бо созмонҳои мамнуъ инкор кардаанд.

Фаъолияти гуруҳи тундрави "Давлати исломӣ" ва пайравӣ аз он дар ҳудуди Тоҷикистону Русия мамнуъст.

Рааб гуфт, Амрикову Бритониё ба зидди талошҳои Русия ҳастанд

Доминик Рааб

Вазири корҳои хориҷии Бритониё гуфт, кишвараш ва Иёлоти Муттаҳида "ба талошҳои Русия барои эҷоди бесуботӣ дар Украина қотеона мухолифат мекунанд". Доминик Рааб рӯзи 11-уми апрел гуфт, онҳо аз Русия мехоҳанд, вазъро ноором накунад.

Аксу наворҳо нишон медиҳанд, ки нерӯҳои мусаллаҳи Русия ба сӯйи марзи Украина ва ё наздик ба он, ба нимҷазираи Қрими ишғолшуда аз тарафи Русия, ҳаракат мекунанд.

Ин вазъ нигарониҳоро барангехтааст, ки Маскав барои фиристодани нерӯҳояш ба шарқи Украина омодагӣ мегирад.

Кремл даъватҳои Ғарбро барои ақибнишинии нерӯҳояш рад карда, гуфтааст, ҳаракати низомиёнаш дар ҳудуди Русия масъалаи дохилӣ ва соҳибихтиёрӣ аст.

Изҳороти Доминик Рааб як рӯз баъд аз он садо дод, ки президенти Украина Владимир Зеленский ба раиси ҷумҳурии Туркия, Раҷаб Таййиб Эрдуғон, дар бораи вазъ маълумот дод.

Пас аз музокироти онҳо дар Истанбул, Эрдуғон таҳаввулоти охирро "нигаронкунанда" номид ва ибрози умед кард, ки низоъ бо роҳи муколамаву осоишта ва мутобиқ ба тамомияти арзии Украина ҳал хоҳад шуд.

Дар Мянмар беш аз 80 нафари норозӣ аз ҳукумати низомиёнро куштаанд

Мянмар аз моҳи феврал ба ин сӯ шоҳиди нооромӣ аст

Нерӯҳои амниятии Мянмар (Бирма) дар мавҷи нави саркӯб алайҳи тарафдорони демократия беш аз ҳаштод нафарро куштаанд. Бино ба гузоришҳо, ҳодиса рӯзи 9-уми апрел рух дода, танҳо баъди як рӯзи он дар расонаҳо нашр шуд.

Мянмар аз аввали моҳи феврали имсол шоҳиди норомӣ аст. Дар он моҳ ҳарбиён дар як табаддулот ё кудето Аунг Сан Сучи, раҳбари ғайринизомии Мянмарро аз қудрат дур карданд ва ҷилави ҳукуматро ба даст гирифтанд.

Гурӯҳи нозири Анҷумани кумак ба зиндониёни сиёсӣ дар Мянмар гуфтааст, аз моҳи феврал ба ин сӯ нерӯҳои амниятии он кишвар беш аз 700 нафарро куштаанд.

Норозиён дар бисёре аз шаҳрҳо ба гунаи мусолиматомез эътироз мекунанд. Аммо саркӯби шадид боис шудааст, ки теъдоде аз онҳо бо силоҳи шикорӣ ва муҳиммоти дигар мусаллаҳ шаванд.

Моҳи гузашта намояндаи Созмони Милали Муттаҳид дар умури Мянмар ба Шӯрои амният гуфт, Бирма дар остонаи табдил шудан ба як давлати ноком қарор дорад ва эҳтимоли оғози ҷанги дохилӣ низ ҳаст.

Кудетои низомии моҳи феврали имсол ба таҷрибаи як даҳаи демократия дар Мянмар нуқта гузошт. Раҳбарони низомии Мянмар мегӯянд, интихоботи моҳи ноябри соли гузашта олуда ба тақаллуб буд.

Дар он интихобот ҳизби ба раҳбарии Аунг Сан Сучи Сучи бо тафовути зиёд баранда шуда буд.

Чанд узви порлумони Олмон бархурд бо Навалнийро "шиканҷаи ҳадафманд" номиданд

Алексей Навалний

Аъзои Бундестаг, порлумони Олмон, бархурди мақомоти Русияро бо пешвои зиндонии мухолифини он кишвар, Алексей Навалний, “шиканҷаи ҳадафманд" номида, аз Кумитаи Аврупо барои пешгирӣ аз шиканҷа хоҳони баррасии шароити зиндони ӯ шудаанд.

Номаи аъзои порлумони Олмон рӯзи 10-уми апрел дар Фейсбук нашр шуд. Дар он рафтор бо Навалнийро "носозгор" бо Конвенсияи аврупоии ҷилавгирӣ аз шиканҷа хондаанд. Дар ҳоле ки, ба қавли муаллифон, Русия як узви ин Конвенсия аст.

Ин нома аз сӯи Мануэл Сарразин аз Ҳизби сабзи Олмон ва гурӯҳи дигар аз аъзои порлумони Олмон имзо шудааст.

Дар нома ҳамчунин гуфта шудааст, ки онҳо гузоришҳоро дар бораи зиндон ва вазъияти саломатии Алексей Навалний бо нигаронӣ пагйирӣ карда, “ҳамбастаи комил"-и худро бо ӯ баён мекунанд.

Алексей Навалний, мухолифи сарсахти Владимир Путин, раиси ҷумҳури Русия, дар моҳи январи имсол, ҳангоми бозгашт аз Олмон, дар фурудгоҳи Маскав дастгир шуд. Ба қавли пизишкони олмонӣ, ӯ дар Русия бо заҳри “Новичок” масмум (заҳролуд) шуда буд.

Эрон дар бораи "ҳодиса"-е дар таъсисоти ҳастаии Натанз гузориш дод

Мақомоти Эрон рӯзи 11-уми апрел тасдиқ карданд, ки дар бахши шабакаи барқи таъсисоти ҳастаии Натанз "ҳодиса"-е рух додааст. Ин воқеа як рӯз баъди он иттифоқ уфтод, ки Теҳрон ба роҳандозии сентрифугаҳои нави пешрафта бо қобилияти ғанисозии бештари ураниюм оғоз кард.

Беҳрӯз Камолвандӣ, сухангӯйи Созмони энержии ҳастаии Эрон, бидуни ишора ба ҷузъиёти ҳодиса гуфтааст, "ин воқеа талафоти ҷонӣ ва олудагӣ ба дунбол надошт". Ӯ ба хабаргузориҳои "Форс" ва "Исно" гуфтааст, сабабҳои рух додани ҳодисаро баррасӣ доранд.

Соли гузашта дар таъсисоти ҳастаии Натанз сӯхтор рух дод. Ҳукумати Эрон онро кӯшиши хароб кардани барномаи ҳастаӣ дониста буд.

Таъсисоти зеризаминии Натанз пойгоҳи калидии Эрон барои ғанисозии ураниюм аст. Онро нозирони Оҷонси Байналмилалии Энержии Атомӣ назорат мекунанд.

Ин таъсисот дар 300-километрии ҷануби Теҳрон ҷойгир аст.

Раъйпурсӣ барои ислоҳи Қонуни асосии Қирғизистон ҷараён дорад

Баъзе аз сокинони Қирғизистон мегӯянд, тағйирот ба Қонуни асосӣ ба президент қудрати бештар медиҳад

Рӯзи 11-уми апрел дар Қирғизистон раъйпурсӣ барои ислоҳи Қонуни асосии он кишвар оғоз шуд. Тарҳи нави Конститутсия қудрати президентро бештар ва салоҳиятҳои порлумонро камтар мекунад. Ҳоло дар он кишвар низоми порлумонӣ ҷорист.

Раъйпурсӣ баъди бештар аз се моҳи интихоби Содир Ҷабборов ба мансаби президенти Қирғизистон сурат мегирад. Ҷаборров, ки то моҳи октябри соли 2020 дар зиндон буд, дар пайи эътирозҳо аз натиҷаҳои интихоботи порлумонӣ тавассути ҷонибдоронаш озод карда шуд.

Ӯ аввал нахуствазир ва баъди зери фишор аз қудрат рафтани раиси ҷумҳури пешин, Сооронбой Ҷеенбеков, иҷрокунандаи вазифаи президент шуд. Дар интихоботи президентии моҳи январи имсол иштирок кард ва, ба иттилои расмӣ, пирӯз гардид.

Гуруҳе аз сокинони Қирғизистон Содир Ҷабборовро барои ислоҳи Қонуни асосӣ танқид карда, гуфтаанд, ӯ барои эҷоди як ҳукумати худкома шитоб дорад. Ба бовари онҳо, тағйирот ба Конститутсия ба президент салоҳияту қудрати бештар медиҳад.

Созмони Дидбони Ҳуқуқи Башар ё Human Rights Watch пештар гуфта буд, ки "тарҳи Конститутсия ба меъёрҳои ҳуқуқи башар, ки Қирғизистон ба риояи он тааҳҳуд кардааст, посухгӯ нест".

Содир Ҷабборов моҳи март дар як мусоҳиба бо Радиои Озодӣ аз тағйирот ба Қонуни асосӣ ҳимоят кард. Ӯ рӯзи 11-уми апрел ба хабарнигорон гуфт, "Кумисюни марказии интихобот натиҷаҳои раъйпурсиро бояд дар зарфи 10 рӯз эълон кунад. Пас аз он, бояд лоиҳаҳои навро ба порлумон пешниҳод кунем. Бояд ҳамаи тарҳҳоро тибқи Конститутсияи нав қабул кунем. Дар ҳоли ҳозир теъдоди зиёде аз қонунҳо бо ҳам мухолифат доранд, бахусус Кодекси ҷиноӣ ва Кодекси мурофиавии ҷиноӣ."

Қирғизистон 6,5 миллион аҳолӣ дорад ва аз соли 2005 се дафъа шоҳиди инқилоб ва ё бо зӯр сарнагун шудани ҳукумат будааст.

Ҳалокати гумонбар ба дуздӣ баъди боздошт. ВКД: "Ӯ худро аз ошёнаи севум партофт"

Шаҳри Ваҳдат

Як ҷавони гумонбар ба дуздӣ баъди дастгир шудан аз сӯйи маъмурони милиса фавтидааст.

Наздиконаш то ба ҳол дар ин маврид чизе нагуфтаанд, аммо масъулони Вазорати корҳои дохилӣ шрӯзи 10-уми апрел хабар доданд, ки Меҳриддин Гадозода худро аз ошёнаи севум партофт ва ба ҳалокат расид.

Тасдиқи дурустии иттилоъ аз манобеи мустақил феълан имкон надорад. Дар гузашта чанд ҳодисаи ба ин монанд рух дода, пайвандони фавтидаҳо далели мақомотро зери шубҳа бурда буданд.

Мақомоти Вазорати корҳои дохилии Тоҷикистон дар баёяние гуфтанд: "Гумонбаршаванда Гадозода Меҳриддин Файзулло ҳангоми дастрас намудан ба ошёнаи сеюми бинои ШВКД дар шаҳри Ваҳдат бо мақсади гурехтан аз ҷавобгарии ҷиноӣ аз тирезаи утоқи корӣ яку якбора худашро ба замин партофта, ҷароҳатҳои ҷисмонӣ бардошт. Аз ҷониби кормандони милитсия фавран ба беморхона расонида мешавад, вале номбурда дар беморхона ба ҳалокат мерасад."

Ба иттилои расмӣ, Меҳридин Гадозодаи 31-сола аз деҳаи Кабирободи ҷамоати Абдулвоситови шаҳри Ваҳдат ба дувоздаҳ мавриди дуздӣ гумонбар буда, "амволи мазкур дарёфт ва мусодира карда шуд".

Тафсилоти аз ин бештар дастрас нест. Мақомот гуфтанд, санҷиши ҳодиса идома дорад.

Назари пайвандони Муҳриддин Гадозода дар ин замина дастрас нашудааст ва рӯшан нест, то куҷо бо хулосаи мақомот розиянд. Дар гузашта низ чанд гумонбар пас аз боздошт аз сӯи маъмурони милиса ва Оҷонси мубориза бо қочоқи маводи мухаддир ҷон бохта буданд. Наздикони онҳо аз шиканҷа гуфтаанд, вале мақомот аз сактаи дилу муътодӣ.

Аз ҷумла, соли 2018 наздикони Абдурасул Назаров, сокини шаҳри Кӯлоб, гуфта буданд, ҷасади ӯро баъд аз як рӯзи боздошт аз тарафи маъмурони милиса бо осори латукӯб аз бемористони Қарияи Болои Душанбе гирифтанд. Мақомот далели шиканҷа шудани ӯро рад карда, гуфтанд, Назаров аз сактаи қалбӣ даргузашт.
Баҳромиддин Шодиеви 28-сола, ки соли 2011 бо гумони дуздӣ аз тарафи кормандони Шуъбаи корҳои дохилии ноҳияи Шоҳмансур боздошт шуда буд, бо ҷароҳатҳои вазнин ба беморхона интиқол ёфт ва баъди 10 рӯз ҷон дод.
Волидони Шамсиддин Зайдуллоев соли 2015 иддао карданд, ки ӯ бар асари латукӯби маъмурони Оҷонси мубориза бо маводи мухаддир фавтидааст. Мақомот гуфтанд, ӯро муътодӣ ё "ломка"-и маводи мухаддир кушт.
Умар Бобоҷонов, сокини шаҳри Ваҳдат, охири моҳи августи соли 2015 аз ҷониби мақомоти интизомӣ дастгир шуда, пас аз як ҳафта дар шифохона даргузашт. Пайвандонаш гуфтанд, кормандони пулис ӯро барои гуё риш доштан задаанд. Баъзе аз маъмурони милиса гуфта буданд, Умар Бобоҷонов дар ҳолати мастӣ буд ва ба ҷӯйбори бетонӣ афтода, аз ҳуш рафт.

Шиканҷаву бадрафторӣ нисбат ба маҳбусону гумонбарон дар боздоштгоҳҳо ва зиндонҳо мавзӯест, ки дар гузориши созмонҳои маҳалливу байналмилалии ҳомии ҳуқуқи башар ҳамвора мояи интиқодҳо аз мақомоти Тоҷикистон мешавад.

Мақомот вуҷуди бадрафториро инкор намекунанд, вале мегӯянд, сухан дар бораи мавридҳои алоҳида меравад, на дар бораи кадом як падидаи фарогир, ки ҳомиёни ҳуқуқ ба қалам медиҳанд.

Ҷасади овехтаи зани ҷавон ва се кӯдакаш Панҷакентро такон дод

Мавзеи кӯли Кӯлак

Сокинони деҳаи Некнот дар шаҳри Панҷакент рӯзи 10-уми апрел дар мавзеи кӯли Кӯлак чаҳор ҷасадро ёфтаанд, ки "ба дарахтҳо овезон буданд". Мақомоти расмӣ ҳанӯз дар ин бора хабар надоданд, аммо раиси деҳа гуфт, "ҷасадҳоро барои таҳқиқ ба марказ бурданд".

Ба гуфтаи чанд сокини деҳаи Некнот, ҷасадҳои ёфтшуда аз Шаҳло Шарипова ва се фарзандаш – Муҳаммадҷони 6-сола, Шаҳнозаи 4-сола Аминаи 8-моҳа – будааст.

Мусоҳибони мо гуфтанд, Шаҳло Шодиева ҳамсари Лазиз Ҷӯраев, сокини 30-солаи деҳаи Некнот, эҳтимол аввал кӯдакони худро овехта, сипас, қасд ба ҷони худ кардааст.

"Имрӯз дар Некнот тӯй буд. Як гурӯҳ бачаҳо баъд аз маърака ба тамошои кӯли Кулак рафтаанд. Дар назди кӯл боғи калон аст ва дар дарахти себ се кӯдаку модарашро бо рӯймол овехта дидаанд", -- гуфт яке аз сокинон.

Ҳанӯз хулосаи мақомот дар ин замина эълон нашудааст. Дар сурати ба даст омадани иттилои бештар ва ё тасдиқи расмӣ дар инҷо нашр мекунем.

Дар ҳамин ҳол, Дониёр Ортиқов, раиси деҳаи Некнот, ҳодисаро тасдиқ кард ва шоми 10-уми апрел гуфт: "Воқеа баъд аз соати чаҳори бегоҳ рух додааст. Ба ман чанде аз бачаҳо занг зада, ҳодисаро гуфтанд. Рости гап, бовар накардам. Баъд ҳамроҳи хусурашу ҳамдеҳагони дигар ҷасадҳоро аз дарахт кушода гирифтем."

Ҷое, ки ҳодиса рух додааст, аз ҳавлии оилаи Ҷӯраевҳо тақрибан 300 метр дуртар будааст. Дар онҷо ҳафтаи гузашта Лазиз Ҷӯраев, шавҳари Шаҳло Шодиева, ҳамроҳи писараш 300 бех ниҳол шинондааст.

Мақомот то ба ҳол дар ин бора иттилоъ надоданд, вале ба гуфтаи раиси деҳа, "намояндагони мақомоти тафтишотӣ ва ташхиси тиббию додгоҳии шаҳри Панҷакент ҷасадҳоро барои таҳқиқ ба марказ бурданд".

Ҷузъиёти бештари ҳодиса ва сабабҳои он маълум нест.

Сокинони Некнот мегӯянд, ин зани ҷавон зодаи шаҳри Душанбе буда, чанд сол пеш арӯси хонаводаи Ҷӯраевҳо шудааст. Ҳамдеҳагон зиндагии оиларо миёнаҳолона тасвир карда, гуфтанд, дар як ҳавлӣ чанд хонавода зиндагӣ мекарданд.

Касби хонаводагии онҳо дар гузашта чӯпонӣ ва ҳоло деҳқонӣ будааст. Падарарӯси Шаҳло Шодиеваро дар деҳа ҳамчун Азизпаҳлавони чӯпон мешинохтаанд. Ба қавли раиси маҳалла боре ҳам сокинон аз нооромӣ ё ҷанҷол дар хонавода хабар надодаанд.

Дар гузашта мақомот чанд ҳодисаи ба ин монандро ошкор кардаву баъзе аз онро худкушӣ номида буданд. Аз ҷумла, Сайрам Холова, сокини деҳаи Сунбулаи ноҳияи Ҳисор, моҳи майи соли 2018 худ ва ду кӯдакашро ба дарё андохт. Додгоҳи Ҳисор падари хонавода Фатҳулло Шариповро бо гуноҳи ба худкушӣ расондани ҳамсар ва кӯдаконаш панҷ сол аз озодӣ маҳрум кард.

Зӯҳро Маҳмуродова, сокини 25-солаи шаҳри Норак, соли 2016 худ ва чаҳор фарзандашро ба дарёи Вахш андохт.

Айнан бо ҳамин шева моҳи сентябри соли 2015 Саломат Пирова, сокини 23-солаи ноҳияи Вахш, бо се тифлаш кӯшиши худкушӣ кард. Вай худро бо фарзандонаш ба дарё андохт, вале модарро наҷот доданду ҳарсе фарзандаш аз даст рафт.

Пештар аз ин ҳодиса, дар моҳи июли соли 2015 сокини ноҳияи Ёвон Парвина Абдуллоева бо 3 тифлаш худро ба дарё партофт. Дар ин ҳодиса ҳам кӯдакон фавтиданд ва модар зинда аз об берун шуд. Парвина бо ҷурми куштори фарзандони худ ба 18 соли зиндон маҳкум шуд.

Ҳузури низомии Русияро дар марзҳои Украина муҳокима карданд

Энтоний Блинкен, вазири умури хориҷии Амрико

Энтоний Блинкен, вазири умури хориҷии Амрико ҳузури низомии Русия дар нимҷазираи ишғолшудаи Қрим ва наздикии марзҳои Украинаро бо вазирони корҳои хориҷии Фаронса ва Олмон муҳокима карданд.

Энтоний Блинкен, вазири корҳои хориҷии ИМА, Жан-Ив Ле Дриан, вазири корҳои хориҷии Фаронса ва Ҳейко Маас, вазири корҳои хориҷии Олмон рӯзи 9 апрел дар алоҳидагӣ суҳбат карданд ва пешниҳод карданд, ки машваратҳо дар байни муттаҳидони НАТО бояд бештар шаванд, чун эҳтимоли афзоиши низоъ дар шарқи Украина вуҷуд дорад.

Аз моҳи апрели соли 2014 беш аз 13,000 нафар дар ҷанг бо ҷудоиталабони рӯ ба Русия дар шарқи Украина кушта шудааст ва беш аз як миллион нафар овора шудаанд.

Киев ва кишварҳои ғарбӣ ҷудоихоҳони тарафдори Русияро дар авҷ гирифтани низоъ муттаҳам мекунанд.

Нигарониҳо аз вазъ дар шарқи Украина дар ҳолест, ки Русия нерӯҳои низомиашро дар он ҷо бештар кардааст.

Ёфтҳои бештар

XS
SM
MD
LG