«Таймс»-и чопи Ландан навиштааст, дар робита ба ин буҳрон Русия ибораи «ҷанги сард»-ро зиёд мавриди истифода қарор дода ва ИМА-ро ба сифати нерӯи бадкор муаррифӣ мекунад. Ба қавли ин рӯзнома, акнун аксари расонаҳои хабарии давлатии Русия дар буҳрони Осетияи Ҷанубӣ ИМА-ро ҳамчун гунаҳкор муаррифӣ доранд ва ба таври худ воқеъияти иттифоқуфтода дар ин буҳронро эълом медоранд. Ба навиштаи рӯзнома, ҷанг дар Осетияи Ҷанубӣ як бахши нақшаи собиқ ноиби президенти ИМА Дик Чейнӣ ва номзад ба мақоми раёсати ҷумҳури Амрико аз ҷумҳурихоҳон Ҷон Маккейн ба хотири интихоб накардани Барак Обама, номзади Ҳизби демократи ИМА, ба мақоми президенти Амрико аст.
Рӯзнома аз ин хулосабарориҳои матбуъоти Русия натиҷа бардошта, навиштааст: «Расонаҳои хабарии ин кишвар ба одати замони шӯравии худ баргаштанд, ки дар ҳама ихтилофу низоъҳо дасти бадкори ИМА-ро мебинанд, ба хусус дар он низоъҳое, ки Русияро дар ҳолати ногувор қарор медиҳанд».
Рӯзномаи фаронсавии «ле Фигаро» аз буҳрони Осетия ҷанубӣ хулоса бардошта, суол гузоштааст, ки ИМА дар бастагӣ ба ҷанги Гурҷистон аз Аврупо чи мехоҳад? Ба навиштаи рӯзнома, обрӯи Русия дар Аврупо хадшадор аст ва, сарфи назар аз онки Ҳукумати шӯравӣ кайҳо суқут кардааст, дар ин кишвар иқтисоди бозаргонӣ ройиҷ аст ва матбуоти озодгӯ ҳам пайдо шудааст, чеҳраи Русия дар тасаввури аврупоиҳо ҳамоно чун «Ахипелаг ГУЛУАГ»-и Солженитсин тасаввур мешавад.
Ин рӯзнома боз ҳам суол гузоштааст, ки Буш аз ин буҳронҳо дар кишварҳои Аврупоӣ чи мехоҳад? Ва посух додааст, ки амалиёти низомии Саакашвилӣ дар Осетияи Ҷанубӣ дар ҳамдастӣ бо мушовирони амрикоӣ тарҳрезӣ шудаааст ва ҳам Бушу ҳам Саакашвилӣ ба вокуниши шадиди Русия ба ин амалиёт шак надоштанд. Рӯзнома муътақидона ҳадс мезанад, ки дар наздиктарин фурсат «хавфе», ки Русия метавонад ба ҳамсояҳои кӯчак аз тариқи қудрати низомиву иқтисодии «Газпром»-и худ таҳдид кунад, дар ҳама ҷо кор мегирад. Як далели аслии амалӣ шудани ин «хавф»-и Русия, ба қавли рӯзнома, ҳузури афзояндаи ИМА дар минтақи Аврупо мебошад ва натиҷаи аслии он зиён ба якпорчагӣ ва истиқлоли Аврупо мерасад.
Дар сояи буҳрони Осетияи ҷанубӣ, овардааст «Файнаншл таймс»-и Бритониё, ҷаҳон ба шубҳа омадааст, ки оё Русияро воқиъан Медведев раҳбарӣ мекунад ё хайр. Ба қавли рӯзнома, номувофиқатии изҳороти маъмурияти Медведев ва қасри сафеди Путин бархе дипломатҳои ғарбиро ба шубҳа овардааст, ки онҳо, ба қавле, «таҳти як нота суруд намехонанд». Ба назари таҳлилгарони рӯзнома, ҷанг дар Осетияи Ҷанубӣ раёсати Медведевро зери суол бурд ва ӯро дар дом гузошт, зеро Медведев масъулияти ҳамла ба Гурҷистонро ба дӯш гирифтааст.
Мавзӯъҳои дигар, ки матбуоти ғарб ба он таваҷҷуҳ кардааст. Рӯзномаи «Индепендент», ба қавл аз мақомоти дафтари амрикоии баршумории мардум, навиштааст, ки сокинони ИМА дар нимаҳои қарни ҷорӣ хеле пиртар мешавад ва пас аз ин аксарияти сокинони онро мардуми сефедпӯст ташкил нахоҳад дод. Рӯзнома афзудааст, шумораи сокинони сафедпӯсти ИМА то соли 2042 коҳиш меёбад. Заминаи аслии афзоши сиёҳпӯстон дар ИМА муҳоҷирати афзояндаи сокинони Амрикои Лотин ба ин кишвар аст ва интизор меравад, ки то соли 2050 шумори онҳо ба 132,8 миллион нафар расида, дар зимн мизони афзоиши мардуми сафедпӯсти ИМА хеле коҳиш меёбад.
