Раисҷумҳури Украина гуфт, президенти Амрико Доналд Трамп метавонад ба ваъдаи худ дар бораи хатми ҷанги Русия дар ин кишвар вафо кунад, ба шарте ки Киев дар ҳама гуна музокирот ҳузур дошта бошад.
Владимир Зеленский дар ин бора рӯзи 25-уми январ дар нишасти хабарии муштарак бо президенти Молдова Мая Санду дар шаҳри Киев суҳбат кард.
Вай гуфт, агар Украина дар музокирот ширкат накунад, ин нақша муваффақ нахоҳад шуд. Зеро, ба гуфтаи Зеленский, ҳарчанд Украина мехоҳад, вале Русия омода нест, ки ҷангро поён диҳад.
Доналд Трамп, раисҷумҳури Амрико, дар маъракаи пешазинтихоботӣ ваъда дод, ки агар ба Кохи Сафед баргардад, ба зудӣ ба ҷанг дар Украина поён мебахшад. Ӯ рӯзи 20-уми январ ба кори худ сар кард.
Ҷанги Русия дар Украина аз моҳи феврали соли 2022 идома дорад.