Гуфтугӯҳо миёни Русия ва Украина аз чанд моҳ ба ин тараф қатъ шудааст ва музокироти таҳти раҳбарии Амрико низ бинобар ҷанги Эрон амалан дар ҳолати рукуд қарор гирифтааст.
Ҷонибҳо дар даврҳои пешини музокирот дар Истанбул, Абу Забӣ ва Женева натавонистанд бар сари масъалаҳои калидӣ, даст ёбанд.
Зеленский дар ин нома, ки дар вебсайти раёсатҷумҳури Украина нашр шуд, навишт, "Украина пешниҳод мекунад, ки ин ҷанг аз тариқи гуфтугӯи мустақим миёни ман ва шумо поён ёбад".
Зеленкий афзуд, "Украина дар муддати музокирот омодаи барқарории як оташбаси комил аст".
Раисҷумҳури Украина ҳамчун пешниҳод кардааст, ки асирони ҷангӣ мубодила шаванд ва гуфт, ин иқдом метавонад "муқаддимаи муносибе барои поён додан ба ҷанг" бошад.
Ӯ ҳамчунин ҳушдор дод, ки идомаи ҷанг метавонад ҷойгоҳи шахсии Путинро ба хатар андозад ва афзуд, "ин як воқеият дар таърихи Русия аст, ки шумо ба хубӣ онро медонед: Ҳангоме, ки Русия хаста мешавад, тағйир фаро мерасад".
ВОКУНИШИ РУСИЯ
Путин билофосила ба ин нома вокуниш нишон надод. Ин нома замоне нашр шуд, ки ӯ дар шаҳри Санкт-Петербург дар ҳоли поён додан ба нишасте бо хабарнигорони хориҷӣ буд.
Аммо Дмитрий Песков, суханӯи Кремл, эълон кард, ки Маскав аз номаи раисҷумҳури Украина иттилоъ дорад ва Путин аз ин нома огоҳ карда мешавад.
Ӯ афзуд, Владимир Зеленский метавонад "дар ҳар вақте" барои мулоқот бо ҳамтои руси худ, Владимир Путин, ба Маскав сафар кунад.
Хабаргузориҳои давлатии Русия ба нақл аз Дмитрий Песков навиштанд, "Зеленский метавонад ҳар вақт, ки бихоҳад, ба Маскав биояд".
Зеленский борҳо хостори мулоқот бо Путин шуда ва гуфтааст, ки танҳо музокироти рӯ дар рӯ метавонад боиси созиш дар масъалаи сарзаминҳо шавад.
Путин низ пештар гуфта буд, ки танҳо замоне бо Зеленский мулоқот хоҳад кард, ки як созиши сулҳ аз пеш омода шуда бошад.
Ин дар ҳоле аст, ки Украина ахиран ҳамлаҳои паҳподии худ ба умқи Русия ва ҳадаф қарор додани иншооти нафтии ин кишварро шиддат бахшидааст.
Рӯзи 3 июн паҳбодҳои украинӣ шаҳри Санкт-Петербургро пеш аз оғози як нишасти иқтисодӣ бо ҳузури Путин, ҳадаф қарор доданд.