Бунёди атфоли СММ (ЮНИСЕФ) мегӯяд, дар Аврупо ва Осиёи Марказӣ тахминан сеяки кӯдакон дар оила бо хушунати ҷисмонӣ ва наздики ҳафтод дарсадашон бо хушунати равонӣ рӯбарӯ мешаванд. Дар ин бора дар гузориши нави ЮНИСЕФ зикр шудааст, ки бо номи “Ҷои таҳсилу зиндагии мо: хушунат нисбати кӯдакон дар Аврупо ва Осиёи Марказӣ” нашр шуд.
Рӯзи 14 октябр дафтари матбуоти СММ навишт, ҷазои ҷисмонӣ аз торсакӣ сар карда то латукӯб нисбати 30 дарсади кӯдакони сокини ин минтақа раво дониста мешавад. То 69% ноболиғон бо хушунати равонии мисли таҳдид, таҳқир ва паст задани шаъну шараф рӯбарӯ мешаванд.
Бино ба гузориши ЮНИСЕФ, дар Тоҷикистон 34% кӯдакони то 14-солаи ширкатдори пурсише гуфтаанд, ки дар як моҳи гузашта аз ҷониби волидон ё парасторонашон мавриди ҷазои ҷисмонӣ қарор гирифтаанд.
Муаллифони гузориш, аз ҷумла, менависанд: “Бисёр волидон дар 14 кишвари мавриди таҳқиқ гуфтаанд, ки барои тарбияи фарзанд истифода аз ҷазои ҷисмониву хушунати равонӣ зарур нест, вале бисёри онҳо даст ба ин кор мезананд. Масалан дар Тоҷикистон, бино ба Таҳқиқи демографиву сиҳҳатии соли 2023 танҳо 4% калонсолон гуфтаанд, ки барои тарбияву калон кардани фарзандон ҷазои ҷисмонӣ зарур аст, дар ҳоле, ки 34% кӯдакон дар ҳамин пурсиш гуфтаанд, ки дар давоми як моҳи гузашта аз ҷониби волидон ё парасторонашон ҷазои ҷисмонӣ дидаанд”, омадааст дар гузориш.
Реҷина Де Доминичис, раиси дафтари ЮНИСЕФ барои кишварҳои Аврупо ва Осиёи Марказӣ гуфт, “хушунат ба зиндагии кӯдакони хеле зиёд таъсиргузор мешавад, бахусус аз ҷониби онҳое, ки бояд кӯдаконро ҳимоят кунанд”.
Ӯ афзуд, манъи ҷазои ҷисмонии кӯдакон қадами муҳим мебошад, “вале давлат бояд ба таълими волидон ва рушди низоми ҳимояти кӯдакон сармоягузорӣ кунад”. Гузориш мегӯяд, 90% волидон гуфтаанд, ки хушунат ғайри қобили қабул аст, вале боз ҳам бисёриҳо ба ин роҳ мераванд. ЮНИСЕФ мегӯяд, кӯдаконе, ки ҷазои ҷисмонӣ ё равонӣ дидаанд, бештар аз дигарон бо мушкилоти равонӣ ваё дарсхонӣ рӯбарӯ мешаванд ва вақте бузург шуданд, худи онҳо даст ба хушунат мезананд.