Узбекистон бахше аз чархболҳоеро, ки баъди суқути ҳукумати Афғонистон ба ин кишвар оварда шуда буданд, ба Амрико баргардондааст. Ба гузориши “Садои Амрико”, 7 чархболи Black Hawk ба ИМА интиқол ёфтанд.
Моҳи августи соли 2021 ва пеш аз тасарруфи Кобул аз сӯи Толибон, низомиёни афғонистонӣ бо 22 ҳавопаймо ва 24 чархбол ба Узбекистон фирор карданд. Аксари ин таҷҳизотҳо ба Узбекистон дода шудаанд.
Чанд халабони афғонистонӣ бо ҳавопаймо ва чархболҳо ба Тоҷикистон ҳам фирор карда буданд. Ин чархболҳо то ҳол дар Тоҷикистон ҳастанд.
Ҳукумати "Толибон" борҳо аз Тоҷикистон ва Узбекистон талаб кардааст, ки ин ҳавопаймоҳоро ба Кобул бидиҳанд, аммо ду кишвар ин талабро нодида гирифтанд. Мақомдорони амрикоӣ борҳо гуфтаанд, ин чархболҳо моли ИМА ҳастанд ва ин кишвар тасмим мегирад, ки онҳоро ба кӣ бидиҳад.