Доналд Трамп рӯзи 26-уми январ гуфт, дар ин бора бо шоҳи Урдун суҳбат кард ва мехоҳад, бо раисҷумҳури Миср Абдуфаттоҳ Сисӣ низ гап занад.
Президенти Иёлоти Муттаҳида дар бораи интиқоли сокинони Ғазза ба ин кишварҳо ҷузъиёт надод.
Ҳукумати нави Амрико мехоҳад, дар ҷараёни бозсозии Навори Ғазза тақрибан якуним миллион фаластиниро кӯч диҳад. Ба гуфтаи Доналд Трамп, кӯчдиҳӣ метавонад муваққатӣ ё дарозмуддат бошад.
Ӯ гуфтааст, ҷанг Навори Ғаззаро вайрон кардааст ва зистан дар ҳоли ҳозир дар он ҷо ғайриимкон аст.
Пештар Стив Виткофф, намояндаи Трамп дар Ховари Миёна, низ гуфта буд, ки имкони кӯчондани фаластиниҳо аз Ғазза ба кишварҳои дигар, аз ҷумла Индонезия, баррасӣ мешавад.
Вазорати корҳои хориҷии Индонезия гуфт, кишвар омода аст, ки ба эҳёи Навори Ғазза мадад кунад, вале дар бораи нақшаи Кохи Сафед чизе намедонад.
Ҷанг дар Ғазза ҳудуди як солу чор моҳ давом кард. Дар ҳамлаҳои Исроил ҳудуди 47 ҳазор фаластинӣ кушта ва даҳҳо ҳазори дигар захмӣ шуданд.
Исроил замоне ба Ғазза ҳамла кард, ки рӯзи 7-уми октябри соли 2023 "Ҳамос" дар ҳамлае беш аз 1200 исроилиро кушта ва зиёда аз 200 нафарро ба гарав гирифт. Амрико ва Иттиҳоди Аврупо гурӯҳи "Ҳамос"-ро созмони террористӣ медонанд.