Шералӣ Кабир, вазири саноат ва технологияҳои нави Тоҷикистон рӯзи 6-уми феврал дар нишасти хабарӣ гуфтааст, соли гузашта дар кишвар 4 миллиону 351 ҳазор тонна семент тавлид шудааст, ки назар ба як соли пеш 104 ҳазор тонна камтар аст.
Вазири саноат кам шудани истеҳсоли сементро ба афзоиши тавлиди ин намуд маҳсулот дар Узбекистон рабт дод. Узбекистон дар баробари Афғонистон яке аз ду харидори асосии сементи Тоҷикистон буд.
Аммо Тошканд моҳи ноябри соли гузашта нархи боҷи гумрукӣ барои ҳар тонна сементи Тоҷикистонро аз 35 доллар то 300 доллар зиёд кард.
Тибқи иттилои расмӣ, соли гузашта Тоҷикистон ба хориҷи кишвар 655 ҳазор тонна семент содир кардааст, ки дар қиёс ба як соли пеш 30 дарсад камтар аст.
Солҳои ахир дар Тоҷикистон асосан бо сармояи Чин чанд корхонаи бузурги тавлиди семент фаъол шуд, ҳарчанд нигарониҳо дар бораи зарари ин корхонаҳо ба муҳити зист ҷой дорад.