Вазорати корҳои хориҷии Тоҷикистон бо пахши изҳороте гуфт, дар посух ба тасмими Теҳрон, Душанбе низ раводидро барои шаҳрвандони Эрон бекор мекунад.
Охири моҳи январ Шӯрои вазирони Эрон сафари бидуни раводид бо Тоҷикистонро тасвиб карда буд. Бар асоси ин қарор, шаҳрвандони Тоҷикистон ва Эрон метавонанд барои то 30 рӯз ва бидуни раводид ба кишварҳои ҳамдигар сафар кунанд.
Ба иттилои Вазорати корҳои хориҷии Тоҷикистон, сафари бидуни раводид бо Эрон танҳо аз тариқи роҳи ҳавоӣ миёни ду кишвар имконпазир аст.
"Барои шаҳрвандоне, ки тавассути кишварҳои сеюм ва ё нуқтаҳои убури сарҳади давлатии заминӣ ба Тоҷикистон ё Эрон сафар менамоянд, раводиди дахлдор лозим аст",-навиштааст Вазорати корҳои хориҷии Тоҷикистон.
Пештар шаҳрвандони Тоҷикистону Эрон метавонистанд танҳо аз тариқи хатсайри Душанбе-Теҳрон бидуни раводид ё виза сафар кунанд. Барои сафар бо дигар парвозҳо, раводид талаб мешуд.
Миёни Тоҷикистон ва Эрон феълан ҳафтае се парвоз ҳаст.