Эмомалӣ Раҳмон, раиси ҷумҳури Тоҷикистон фармони даъвати баҳории ҷавонон ба артишро имзо кардааст.
Тибқи фармон, ки шоми 19-уми феврал Дафтари матбуоти раисиҷумҳур нашр кард, ҷавонони аз 18 то 27-сола, ки асоси қонуние барои озод шудан аз хизматро надоранд, ба сафи нерӯҳои мусаллаҳ ҷалб мешаванд.
Дар Тоҷикистон хидмат дар сафи нерӯҳои мусаллаҳ барои мардон ҳатмист ва барои саркашӣ аз он ҷарима ё то 2 сол зиндон пешбинӣ шудааст.
Даъвати ҷавонон ба артиш, ки дар баҳору тирамоҳ анҷом мешавад, ҳамасола бо сару садо дар бораи ҷалби маҷбурӣ ё "облава" ҳамроҳ аст.
Як сабаби аслии сарпечии ҷавонон аз хидмати ҳарбии ҳатмии дусоларо дар бадрафторӣ дар сафи неруҳои мусаллаҳи Тоҷикистон меноманд, ки гоҳо бо маргу маъюб шудани сарбозон меанҷомад.