Ба гуфтаи Девони Имомати Исмоилия, Шоҳзода Карим Ал-Ҳусайнӣ Оқохони чаҳорум, пешвои исмоилиёни ҷаҳон, ки чаҳор рӯз пеш дар синни 88-солагӣ дар шаҳри Лиссабони Португалия даргузашт, рӯзи якшанбеи 9-уми феврал дар Миср ба хок супурда мешавад. Дар ин бораи хабаргузории "Рейтерз" хабар додааст.
Султон Муҳаммадшоҳ Оқохони севум, бобои Оқохони чорум ҳам дар Миср дафн шудааст. Оқохони чаҳорум пас аз бобояш Султон Муҳаммадшоҳ Оқохони севум, дар 11 июли соли 1957 дар 20-солагӣ пешвои рӯҳонии исмоилиёни ҷаҳон шуда буд.
Пас аз хоксупории Оқохони 4, маросими ба тахт нишастани имоми нави исмоилиҳои ҷаҳон Шоҳзода Раҳим, пешвои 50-уми исмоилиҳои ҷаҳон рӯзи сешанбе, 11-уми феврал барпо хоҳад шуд.
Дар ин бора масъулони маркази исмоилиҳои ҷаҳон рӯзи 6-уми феврал дар як изҳороти матбуотӣ хабар доданд.
Ба гуфтаи онҳо, Шоҳзода Карим Оқохон дар як маросими хусусие бидуни даъвати меҳмонони беруна ё хориҷӣ мувофиқ бо маросимҳои шиаёни исмоилӣ хоксупорӣ мешавад.
Рӯзи сешанбе қарор аст маросими ба тахт нишастани Шоҳзода Раҳим бо қироати оинномаи ҷомеаи исмоилиҳо барпо шавад. Таъкид гардид, ки барои иштирок дар ин маросим 22 раҳбари кишвар ва минтақаҳое даъват шудаанд, ки ҷомеаи исмоилиҳо дар он ҷо ҳузур доранд.