Бозии аввали ниманиҳоии Ҷоми ҷаҳонии футбол-2026 байни тимҳои миллии Фаронса ва Испания, ки шаби 15-уми июл дар варзишгоҳи «Эй-Ти-энд-Ти» (Арлингтон, ИМА) доир гардид, бо пирӯзии испаниҳо бо ҳисоби 2:0 ба поён расид. Сардовари ин бозӣ Иван Бартон аз Санта-Ана, Салвадор буд.
Дар дақиқаи 22-юм ҳамлагар Микел Оярсабал тӯбро аз пеналти ба дарвоза ворид намуда, мунтахаби Испанияро ба пеш баровард. Дар дақиқаи 58-ум ҳимоятгар Педро Порро голи дувуми испаниҳоро ба самар расонд.
Бозии дувуми ниманиҳоии Ҷоми ҷаҳонии футбол-2026 байни тимҳои миллии Англия ва Аргентина шаби 16-уми июл соати 00:00 бо вақти Душанбе баргузор мешавад.
Ҳамин тариқ, дар финали қаҳрамонии футболи ҷаҳон-2026 мунтахаби Испания зери раҳбарии Луис де ла Фуэнте бо ғолиби ҷуфти бозии дувуми ниманиҳоӣ байни мунтахабҳои Англия - Аргентина рақобат мекунад. Мунтахаби Фаронса бошад бо роҳбарии Дидйе Дешам барои ҷойи севум бо тими мағлубшудаи ҷуфти Англия/Аргентина мубориза мебарад.
Ба ин тартиб, аз 104 бозии Ҷоми ҷаҳонии футбол-2026 яксаду яктоаш анҷом пазируфт. То поёни мусобиқа се бозии ҳалкунанда боқӣ мондааст.
Бозии ниҳоии Ҷоми ҷаҳонии футбол-2026 шаби 20-уми июл соати 00:00 бо вақти Душанбе дар варзишгоҳи «Метлайф Стэдиум» (MetLife Stadium), дар шаҳри Ист-Ратерфорд (иёлати Ню-Ҷерси, ИМА) сурат мегирад.
1/2 финал (замони оғози бозиҳо бо вақти Душанбе):
15-уми июл (чоршанбе)
Фаронса – Испания – 0:2
16-уми июл (панҷшанбе)
00:00 - Англия – Аргентина
Бозӣ барои ҷойи 3-юм
19-уми июл (якшанбе)
02:00 – Фаронса – тими мағлубшудаи ҷуфти Англия/Аргентина
ФИНАЛ
20-уми июл (душанбе)
00:00 – Испания - ғолиби ҷуфти Англия/Аргентина
Дар сабқати нишонзанҳои беҳтарини Ҷоми ҷаҳонии футбол-2026 Килиан Мбаппе (Фаронса) ва Лионел Месси (Аргентина) бо 8-голӣ пешқадаманд. Эрлинг Ҳоланн (Норвегия) бо 7 гол дар ҷойгоҳи севум аст. Ҳарри Кейн (Англия) ва Ҷуд Беллингем (Англия) бо 6-голӣ дар зинаҳои чаҳоруму панҷум қарор доранд.