Ба ҷуз аз раҳбари худкомаи ин кишвар, Александр Лукашенко, чор нафари дигар довталаби курсии президент ҳастанд:
- Олег Гайдукевич, раҳбари ҳизби либерал-демократ;
- Сергей Сиранков, котиби аввали ҳизби коммунист;
- Александр Хижняк, раҳбари ҳизби кор ва адолат;
- Анна Конопатская, вакили собиқи порлумон.
Ҳамаи онҳо, ба ҷуз Конопатская, сиёсатмадорони вафодор ба Лукашенко номбар мешаванд. Конопатская худашро "ягона номзади мухолиф" номидааст, дар ҳоле ки нозирони мустақил ӯро ба спойлер монанд мекунанд. Спойлер номзад ё ҳизбест, ки дар интихобот имкони пирӯзӣ надорад, вале бахше аз ройи номзади дигарро мегирад ва ба ин васила шонси пирӯзии ӯро кам мекунад.
Анна Конопатская дар интихоботи президентии соли 2020 низ номзад шуда, ҳамагӣ 1,68 дарсад овоз гирифта буд.
Александр Лукашенко 70-сола аст ва аз соли 1994 дар сари қудрат. Интизор меравад, ӯ дафъаи ҳафтум идораи давлатро ба даст гирад.
Мақомоти Беларус дар интихоботи соли 2020 раҳбари худкома Александр Лукашенкоро баранда эълон карданд. Мухолифону кишварҳои ғарбӣ намояндаи мухолифон Светлана Тихановскаяро пирӯз донистанд.
Пас аз он Беларус шоҳиди тазоҳурот шуд. Дар натиҷа, ҳазорон нафар боздошту зиндонӣ гаштанд ва шуморе ночор кишварро тарк карданд. Ҳамчунин гузориш шудааст, ки чанд эътирозгар кушта ва баъзе аз боздоштшудаҳо шиканҷа шудаанд.
Маъмурияти Александр Лукашенко аз ҷанги беасоси Русия алайҳи Украина пуштибонӣ мекунад.