Тибқи он, раҳбари худкома Александр Лукашенко зиёда аз 86 дарсад раъй гирифтааст.
Кумисюни марказии интихоботи Беларус гуфт, чор номзади дигар аз 1,74 то 3,21 дарсад раъйро соҳиб шуданд.
Интихоботи президентӣ дар Беларус рӯзи 26-уми январ баргузор шуд. Натиҷаҳои ниҳоиро 3-юми феврал эълон мекунанд.
Мансабдорони баландпояи Иттиҳоди Аврупо пеш аз оғози интихобот машрӯият ё қонунӣ будани овоздиҳӣ ва ҳамин тавр пирӯзии Александр Лукашенкоро зери суол гузоштанд.
Кая Каллас, масъули сиёсати хориҷии Иттиҳоди Аврупо, Александр Лукашенкоро барои “тайи 30 сол ба қудрат часпиданаш” танқид кард. Ӯ дар шабакаи “Х” навишт, ки Лукашенко дар интихоботи дигари дурӯғин худро баранда эълон хоҳад кард ва “ин тавҳини рӯйирост ба демократия аст.”
Алесандр Лукашенко, ҳампаймони Русия, аз соли 1994 зимоми қудратро дар Беларус ба даст дорад. Вай рӯзи 26-уми январ аз “демократияи қавӣ” дар кишвараш ситоиш кард. Созмону кишварҳои ғарбӣ ӯро пайваста барои саркӯби дигарандешон ва маҳдудияти озодии баён танқид мекунанд.