Фарҳод Неъматов, як паноҳҷӯйи тоҷикро, ки Шветсия моҳи декабри соли 2024 бо се духтари хурдсолаш аз ин кишвари аврупоӣ ба Душанбе ронда буд, дар Боздоштгоҳи шаҳри Хуҷанд ҷойгир кардаанд. Ҳамсараш берун аз Тоҷикистон қарор дорад.
Вазорати корҳои дохилӣ ва ниҳодҳои дигари интизомии Тоҷикистон дар бораи боздошт ва иттиҳоми зидди Фарҳод Неъматов расман шарҳе надоданд.
Чанд манбаи огоҳ аз қазия рӯзи 24-уми феврал ба Радиои Озодӣ гуфтанд, ки Фарҳод Неъматов ба пайравӣ аз "Ҳизби Таҳрир", созмони динии фаъолияташ мамнуъ дар Тоҷикистон, гумонзад шудааст.
Баъзе аз пайвандонаш ин фарзияро инкор карданд, вале дар саҳифаҳои ӯ дар Фейсбук ва шабакаҳои дигари иҷтимоӣ чанд матлаб дар бораи "Ҳизби Таҳрир" ва ташкили хилофат нашру паҳн шудааст. Фарҳод Одинаев, як фаъоли мухолифон, мегӯяд, Неъматов бештар матолиби танқидӣ менавишт.
Яке аз пайвандони Фарҳод Неъматов рӯзи 24-уми феврал ба Радиои Озодӣ гуфт, таҳқиқи парванда ҷараён дорад. "То ин дам се бор хабар гирифтем. Барояш хӯрок бурдем. Аҳволаш хуб аст, шикоят надорад, аммо вакили мудофеъ ҳам надорад. Намедонем, чӣ хоҳад шуд," – гуфт мусоҳиби мо. Ба далели амниятӣ номаш навишта намешавад.
Вай афзуд, мақомот се духтари Фарҳод Неъматовро барои парасторӣ ба наздиконаш супурдаанд.
Неъматов қаблан бо зану фарзандонаш дар Украина мезист ва баъд аз ҷанги Русия ба шаҳри Гётеборги Шветсия рафт. Чанд дафъа ба гирифтани ҳаққи паноҳандагии сиёсӣ муроҷиат карда, посухи мусбат нагирифт.
Ӯ зодаи деҳаи Хистеварзи ноҳияи Бобоҷон Ғафуров аст. Соли 2019 ҳамроҳи зану фарзандонаш аз Тоҷикистон берун шудааст.