Пит Ҳегсет, вазири дифои ИМА аз муттаҳидони осиёии Вашингтон хост, барои муқобила бо нуфузи низомии Чин, хароҷоти дифоии худро зиёд кунанд.
Ҳегсет 30-юми май дар нишасти амниятии Шенгри-Ла дар Сингапур гуфт, "давраи субсидия (кумаки молияӣ) додани Амрико барои дифоъ аз кишварҳои сарватманд ба поён расидааст".
Вазири дифои ИМА гуфт, ки Вашингтон аз муттаҳидон ва шарикони осиёии худ интизор дорад, ки хароҷоти дифоии худро то ба 3,5 дарсади маҷмӯи маҳсулоти дохилии худ расонанд.
Пит Ҳегсет ҳамчунин бо такрори мавқеи Доналд Трамп, раиси ҷумҳури ИМА гуфт, Амрико дигар омода нест хароҷоти дифоъ аз кишварҳои сарватмандро танҳо ба дӯш гирад.
Ӯ гуфт, "мо шарик мехоҳем, на кишварҳои вобаста". Ин мақомдори амрикоӣ ҳамчуни афзуд, ки иттиҳоди қавӣ танҳо замоне маъно дорад, ки ҳамаи тарафҳо "саҳми худро дар масъулиятҳо дошта бошанд" ва "аз хизматрасонии ройгон истифода накунанд".