Михаил Галустян, ҳаҷвнигоре аз Русия, ки дар Тоҷикистон ӯро бештар бо нақшҳои таҳқиромезаш дар мавриди муҳоҷирони корӣ мешиносанд, ба шаҳри Душанбе даъват шудааст.
Ин тасмим эътирози баъзе фаъолонро дар шабакаҳои иҷтимоӣ ба бор овард.
"TAS International Group", ки қарор аст дар пойтахти Тоҷикистон бинои баландтаринро бисозад, дар саҳифаҳояш дар шабакаҳои иҷтимоӣ навишт, Галустян 30-юми сентябр дар барномаи фарҳангии ин ширкати сохтмонӣ ҳузур пайдо мекунад.
Намояндагони ширкат ба суоли Радиои Озодӣ дар бораи ҳадафи даъвати Михаил Галустян ҳанӯз посух надодаанд.
Нақши Михаил Галустян дар силсиланамоиши ҳаҷвии “Наша Раша” дар соли 2010 эътирози фаъолони тоҷикро ба бор оварда буд. Дар ин мазҳакаи телевизионӣ ду муҳоҷири корӣ бо номҳои "Равшан" ва "Ҷамшуд" тасвир ёфтаанд, ки нодону бесавод буда, қоидаҳои одитарини зиндагиро намедонанд ва гуё ба забони тоҷикӣ гап мезананд.
Ин мазҳакаи телевизиониро фаъолони муҳоҷирон таҳқири тоҷикон номида буданд.
Исфандиёри Назар, шоири тоҷик дар саҳифааш дар Фейсбук навиштааст, ки Вазорати корҳои хориҷии Тоҷикистон бояд сафари Михаил Галустянро ба Душанбе лағв кунад. Ӯ гуфтааст, нафаре, ки “миллати моро таҳқир кардааст”, набояд ба Тоҷикистон биояд ва мо ба “таҳқиргари худ каф занем”.
Назари худи ҳунарманд маълум нест.
Михаил Галустян 46 сол дорад ва дар тарҳи телевизионии “Наша Раша” нақши “Равшан”-ро бозӣ кардааст.