Намояндагони созмон рӯзи 5-уми феврал гуфтанд, Бобоев аз соли 2016 дар Туркия "паноҳҷӯст", вале "бори дувум боздошт мешавад".
"Ин дафъа 21-уми январ дастгир шуд ва дар ҳолати истирдод қарор дорад," -- гуфта шудааст дар эъломияи “Гурӯҳи 24”. Фаъолияти созмон дар ҳудуди Тоҷикистон мамнуъст.
Намояндагонаш рӯзи чоршанбе гуфтанд, Фирӯз Бобоев бори аввал моҳи августи соли 2024 "бо дархости Тоҷикистон боздошт ва моҳи октябр раҳо гардид".
“Гурӯҳи 24” аз созмонҳои мудофеи ҳуқуқ ва кишварҳои демократӣ хостааст, ба озодии Фирӯз Бобоев дар Туркия мадад кунанд: "Аз рӯйи таҷриба, Туркия ҷойи озодандешон нест. Ҳар дақиқа имкон дорад, Бобоевро ба Тоҷикистон истирдод ва ба муддати тӯлонӣ зиндонӣ кунанд."
Даъвои мақомоти Тоҷикистон алайҳи Фирӯз Бобоев ба мо маълум нест.
“Гурӯҳи 24” низ ҷузъиёти иттиҳомро ошкор накардааст, аммо фаъолияти ин созмон дар қаламрави Тоҷикистон манъ аст ва то кунун даҳҳо нафар барои пайравӣ аз он дастгиру зиндонӣ шудаанд.
Бори охир дар моҳҳои феврал ва марти соли 2024 Сӯҳроб Зафар, раҳбари “Гурӯҳи 24” ва Насимҷон Шарифов, намояндаи баландпояи ин созмон, дар Истанбул нопадид ва дертар дар Тоҷикистон мутаносибан ба сӣ ва бист сол зиндон маҳкум карда шуданд.