“Барои рафтан ба ҷанг маҷбур карданд.” Боздошти 50 хориҷӣ дар Қазон

Акс аз бойгонӣ

Ба гузориши бахши русии Радиои Озодӣ, мақомоти Русия ҳудуди 50 хориҷиро, ки дар миёнашон шаҳрвандони Тоҷикистон низ будаанд, дар фурудгоҳи шаҳри Қазон (Тотористон) барои рафтан ба ҷанг маҷбур кардаанд.

Манбаъ бо такя ба саҳифаи "Осторожно, новости" дар Телеграм рӯзи 18-уми ноябр навишт, ин афрод се рӯз дар боздошт буда, бархе барои имзои қарордод бо Вазорати дифои Русия зери фишор қарор гирифтаанд.

Шумораи дақиқи шаҳрвандони Тоҷикистон гуфта нашудааст. Ба навиштаи "Осторожно, новости" дар Телеграм, ба шаҳрвандони Тоҷикистон шарт гузошта шудааст, ки барои рафтан ба ҷанги Украина қарордод имзо мекунанд ё онҳоро ба Маркази нигаҳдории муваққатӣ мебаранд.

Як тан аз дӯстони муҳоҷири ихроҷшуда гуфтааст, дӯсташ ба ин розӣ нашуд ва ӯро аз Русия берун карданд.

Шоҳидони ҳодиса ба "Осторожно, новости" гуфтаанд, ҳодиса як ҳафта пеш рух дод ва онҳоро се рӯз азият додаанд. Онҳо нақл кардаанд, ки рӯи фарши сард хобиданд ва барояшон хӯроки дуруст ҳам надодаанд.

Хадамоти матбуоти фурудгоҳи Қазон ба нашрияи маҳаллии InKazan гуфтааст, маълумоти нашршуда воқеият надорад. Маъмулан мақомоти Русия ба хабарҳои монанд чунин вокуниш мекунанд.

Аз замони ҳамлаи Русия ба Украина дар соли 2022 ҳазорҳо шаҳрванди Тоҷикистон бо роҳҳои гуногун ба ҷанги зидди Украина ҷалб шудаанд. Хабари кушта ва нопадид шудани беш аз сад шаҳрванди Тоҷикистон расонаӣ шудааст.

“Зистан мехоҳам”, тарҳи давлатии Украина мегӯяд, исми беш аз 5 ҳазор шаҳрванди Тоҷикистонро пайдо кардааст, ки бо артиши Русия қарордод баста, дар ҷанги зидди Украина иштирок кардаанд.