Дар як амалиёти зидди муҳоҷирон дар метрои Маскав рӯзи 29-уми август тақрибан 140 муҳоҷирро боздошт кардаанд.
Мақомоти Русия нагуфтанд, ки онҳо шаҳрвандони кадом кишвар ҳастанд, аммо гуфтанд, ки ин афрод қоидаҳои зистро вайрон карда, ба рӯйхати шахсони зери назорат ворид шудаанд.
Қарор аст, онҳоро аз хоки Русия берун ва вурудашонро ба ин кишвар барои чанд сол манъ кунанд.
Барои пайдо ва муайян кардани муҳоҷирон аз низоме истифода шудааст, ки Вазорати корҳои дохилии Русия онро "технологияи навтарин" номид.
Мақомот шарҳ надоданд, ки ин фанноварӣ дақиқан чӣ гуна кор мекунад, аммо ВКД-и Русия таъкид кардааст, ки "санҷиш дар метрои Маскав самарабахшии худро нишон дод" ва чунин маъракаҳо минбаъд дар гӯшаҳои дигари Русия низ баргузор хоҳанд шуд.
Соли 2025 дар Маскав ва вилояти ҳамноми он барномаи мобилии "Амина" расман ба кор сар кард. Истифодаи он аз 1-уми сентябри имсол барои тамоми "хориҷиҳо, ки вурудашон ба Русия бе виза амалӣ мегардад", аз ҷумла Тоҷикистон, ҳатмӣ мешавад.
Замимаи "Амина" маълумотро дар бораи макони муҳоҷирон дар шаҳру вилояти Маскав ба Вазорати корҳои дохилии Русия мефиристад. Агар дар тӯли зиёда аз се рӯз маълумоти нав ворид нашавад, муҳоҷир ба “феҳристи шахсони таҳти назорат” шомил карда мешавад.
Браузери шумо HTML5-ро намешиносад
Муҳоҷирон то даҳ рӯзи дигар бояд “Амина” дошта бошанд