Мурод Муқимзода, ки ҳамагӣ як сол пеш додситони ноҳияи Балҷувон (вилояти Хатлон) таъйин шуда буд, аз мансаб барканор гардидааст. Ин тасмим дар моҳи майи имсол эълон шуда, баъзе ҷузъиёташ 3-юми июн дастраси Радиои Озодӣ гардид.
Дар ҳоле ки мақомот шарҳ намедиҳанд, як манбаи огоҳи Радиои Озодӣ дар ниҳодҳои интизомии Тоҷикистон сабабро ба "тафтиши дохилӣ" пайванд дод. Ӯ гуфт: "Маълум кардаанд, ки Мурод Муқимзода ба баъзе шикоятҳо зуд расидагӣ намекунад ва барои ҳамин барканор шудааст."
Талоши мо барои гирифтани шарҳи Муқимзода то ин дам натиҷа надод.
Дар ҳамин ҳол, ба иттилои ёфтаи Радиои Озодӣ, "тафтиши дохилӣ" ва барканории додситони ноҳияи Балҷувон баъди он сурат гирифтааст, ки шахсони ношинос шаби 19 ба 20-уми май маҳалли хоби ӯро оташ задаанд.
Ҳодиса ҳангоми сафари кории Мурод Муқимзода дар ҷамоати Сари Хосори ноҳияи Балҷувон ва дар ҳавлии як пизишки маҳаллӣ рух додааст.
Ду манбаъ дар мақомоти интизомии вилояти Хатлон 3-юми июн ба Радиои Озодӣ гуфтанд, "хостааст, ки дар он ҷо шабро рӯз кунад. Афроди ношинос ҳуҷраи хоби ӯро оташ задаанд. Соҳиби хона аз сӯхтор хабар ёфта, додситонро аз хона берун бурдааст. Ба ӯ осеб нарасидааст. Ҳоло тафтиши ҳодиса давом дорад."
Баъзе аз сокинони ҷамоати Сари Хосор, ки Радиои Озодӣ бо онҳо ҳамсуҳбат шуд, нахостанд, тафсилот диҳанд. Яке аз онҳо бо шарти фош нашудани ном гуфт, "се ҳафта боз чанд нафарро ба бозпурсӣ даъват мекунанд. Ростӣ, дигар мардум метарсанд."
Мурод Муқимзода 44-сола аст ва соли 2025 додситони ноҳияи Балҷувон таъйин шуда буд. Ҳоло маълум нест, ӯ ба кори дигар гузаштаастё то поёни тафтиши қазияаш мунтазир хоҳад монд.
Дар минтақаи Кӯлоб бори аввал нест, ки оташ задани мошини додситон сабт мешавад. Соли 2023 мошини Ҷумъаназар Саидаҳмадзода, додситони собиқи ноҳияи Восеъро дар наздикии хонааш оташ зада буданд. Ӯ низ баъди ин ҳодиса аз мақом ронда шуд.
Баъзе аз сокинон ва намояндагони мухолифони ҳукумат дар шабакаҳои иҷтимоӣ аз кори ниҳодҳои интизомии Тоҷикистон барои дурусту мунсифона баррасӣ накардани шикояту парвандаҳо шикоят мекунанд. Раисҷумҳури Тоҷикистон соли гузашта онҳоро барои ба гуфтааш бесалоҳиятӣ дар вилояти Хатлон танқид кард ва ба таври дастҷамъӣ аз мақом ронд.