Додгоҳе дар Испания ҳукми Луис Рубиалес, собиқ президенти Федератсияи футболи ин кишварро эълон кард, ки барои бӯсидани як духтари футболбоз ба озори ҷинсӣ муттаҳам шуда буд. Додгоҳ роҳбари пешини идораи футболи Испанияро 10 ҳазор евро ҷарима кард.
Ба гузориши The Guardian, Луис Рубиалес ҳаққи тамос ва ҳамчунин наздик шудан ба футболбоз Ҷенни Эрмосоро надорад.
Пештар додситонӣ барои Луис Рубиалес аз 2 то 2,5 соли зиндон талаб карда буд.
Қазияи мазкур ду сол пеш ва баъди ғалабаи тими мунтахаби футболи духтаронаи Испания дар Қаҳрамонии ҷаҳон сар зад. Он вақт Луис Рубиалес баъди пирӯзии дастаи духтарона, дар маҳзари ом Ҷенни Эрмосоро бӯсид. Ин кор вокунишҳои зиёдро дар бораи озори ҷинсӣ дар варзиш ба миён овард.
Худи Рубиалес иттиҳоми озори ҷинсиро рад кард. Эрмоси 33-сола баъди ин кор дар Инстаграм навишт, амали президенти Федератсияи футбол ба ӯ писанд наомад.