Як гурӯҳ аз фаъолон ва ҳомиёни ҳуқуқи инсон дар Олмон бо баргузории ҳамоиши эътирозӣ аз Додгоҳи шаҳри Дюсселдорфи ин кишвар хостаанд, ки нисбат ба сарнавишти фаъоли зиндонии тоҷик Дилмурод Эргашев бетараф набошад.
Ӯ, ки беш аз даҳ сол дар шаҳри Клевеи Олмон мезист, моҳи ноябри соли 2024 аз ин кишвари аврупоӣ ба Тоҷикистон ихроҷ карда шуд ва дар Душанбе бо гуноҳи, ба гуфтаи мақомот, “даъвати оммавӣ барои фаъолияти ифротгароӣ”, ҳашт сол зиндонӣ гардид.
Эътирози фаъолон ва ҳомиёни ҳуқуқи инсон дар Олмон 9-уми ноябр баргузор шуд. Онҳо дар даст шиор ва аксҳои Дилмурод Эргашевро доштанд. Фарҳод Одинаев, як фаъоли мадании тоҷик, низ дар ин ҳамоиш буд ва рӯзи 10-уми ноябр дар суҳбат бо Радиои Озодӣ гуфт, мақомоти додгоҳ дар охир онҳоро ба ҳузур пазируфтаанд.
Додгоҳи Дюсcелдорф соле пеш мурофиаи то куҷо қонунӣ будани ихроҷи фаъоли зиндонии тоҷик Дилмурод Эргашев аз Олмон ба Тоҷикистонро оғоз кардааст. Вакили мудофеи ӯ талаб дошт, ки Эргашев аз Тоҷикистон ба Олмон баргардонда шавад. Фарҳод Одинаев мегӯяд, вакил рӯзи 9-уми ноябр низ далели, ба қавли вай, нодуруст ронда шудани Дилмурод Эргашевро дигарбора ба додгоҳ пешниҳод кард.
Видеоро дар инҷо бинед:
Браузери шумо HTML5-ро намешиносад
Талаби адолат аз додгоҳи Олмон барои як фаъоли тоҷик
Дилмурод Эргашеви 43-сола узви пешини "Гурӯҳи 24" ва Ҷунбиши ислоҳот ва рушд, ду созмони мухолифи ҳукумати Тоҷикистон аст. Созмонҳои ҳомии ҳуқуқ дар гузашта аз ҳукумати Олмон хоста буданд, ки ӯро ба Тоҷикистон нафиристад, чун мумкин аст, барои ақидаҳои худ азобу шиканҷа шавад. Худаш низ дар фурудгоҳ рагҳои дасту пойи худро бурид, вале ин кор монеи ихроҷаш нашуд.
Олмон аз соли 2015 ба ин тараф ба макони кор ва паноҳҷӯии шуморе аз шаҳрвандони Тоҷикистон табдил шудааст. Ба маълумоти расмӣ, то охири моҳи августи соли 2026 тақрибан 13 ҳазор тоҷикистонӣ дар ин кишвари аврупоӣ қарор дошта, аз аввали имсол 27 нафар ба Душанбе ронда шудаанд. Тақрибан ҳазоур сад нафари дигар бояд қаламрави Олмонро тарк кунанд.
Бо вуҷуди танқиди созмонҳои байнулмилалӣ, аз ҷумла Дидбони Ҳуқуқи Башар (Human Rights Watch), мақомоти Олмон дар солҳои охир чанд фаъоли мухолифонро ба Тоҷикистон рондаанд. Билол Қурбоналиев ва Асадулло Бобоев аз ҷумлаи онҳо ҳастанд. Аввалӣ соли 2024 ва баъди ихроҷ аз Олмон ба Тоҷикистон, ба 10 сол зиндон маҳкум шуд. Дувумиро дар Тоҷикистон 17 сол аз озодӣ маҳрум кардаанд.