Сафаралӣ Қурбонзода, муовини аввали раиси Хадамот 5-уми феврал дар нишасти хабарӣ гуфт, пешниҳод барои боло бурдани арзиши барқ ба ҳукумат ирсол шудааст.
Тасмими ниҳоӣ дар ин бора ба гуфтаи Қурбонзода, аз сӯи ҳукумат гирифта мешавад. Аммо муовини раиси Хадамоти зиддиинҳисорӣ нагуфт, ки нархи барқ чӣ қадар боло меравад? Сафаралӣ Қурбонзода танҳо афзуд, нархи ниҳоии барқ "пас аз ҳисоб кардани хидматрасониҳои истеҳсол, интиқол ва тақсимоти барқ маълум мешавад".
Бори ахир нерӯи барқ моҳи январи соли 2024 гарон шуда буд. Аз он вақт сокинони Тоҷикистон барои ҳар киловат барқ 30,75 ва корхонаҳо 70,35 дирам месупоранд.
Корхонаҳои “Талко”, Комбинати металлургии Тоҷикистон ва корхонаи нуриҳои "Азот" нархи барқро аз дигар корхонаҳо арзонтар мегиранд.
“Талко” давлатӣ аст ва Комбинати металлургии Тоҷикистон тибқи ҳуҷҷатҳои Кумитаи андоз, аз сӯи “Фароз” таъсис ёфтааст. Намояндагони Комбинати металлургии Тоҷикистон борҳо гуфтаанд, ки ба ширкати “Фароз” ягон робита надоранд. Соҳиби корхонаи “Азот” маълум нест.