Дар феҳристи қавитарин мусобиқоти қаҳрамонӣ дар ҷаҳон Серия А-и Италия бо 1992 имтиёз дар ҷойи аввл аст. Ҷойи дуюмро Ла Лигаи Испания бо 1885 имтиёз ва ҷойи сеюмро Премйер-Лигаи Англия бо 1871 имтиёз соҳиб шудаанд.
Ба даҳгонаи беҳтаринҳо, инчунин, мусобиқоти қаҳрамонии Бразилия, Олмон, Аргентина, Португалия, Фаронса, Белгия ва Нидерланд шомил гаштаанд. Дар маҷмӯъ, ба феҳрист 100 мусобиқоти қаҳрамонии миллӣ дохил шудааст.
Аз кишварҳои Осиёи Марказӣ ба ин феҳрист мусобиқоти қаҳрамонии футболи Қазоқистон (ҷойи 86-ум), Узбекистон (ҷойи 96-ум) ва Туркманистон (ҷойи 98-ум) шомиланд. Аммо Лигаи олии футболи Тоҷикистон ба садгонаи беҳтаринҳои ҷаҳон дохил нашудааст.
Федератсияи байналмилалии таърих ва омори футбол (IFFHS), инчунин рейтинги беҳтарин бошгоҳҳои солро дар ҷаҳон нашр кардааст. Дар радабандӣ “Реал Мадрид”-и Испания ҷойи аввалро касб намудааст.
Ба сегонаи беҳтаринҳо, инчунин, бошгоҳҳои футболи “Байер”- Леверкузени Олмон ва “Аталанта”-и Бергамои Италия дохил шудаанд.
Дар маҷмӯъ, ба феҳристи бошгоҳҳои футболи беҳтарин 700 бошгоҳ ворид шудааст. Аз кишварҳои Осиёи Марказӣ ба ин феҳрист “Абдиш-Ота”-и Қирғизистон (ҷойи 389-ум), “Аркадаг”-и Туркманистон (ҷойи 454-ум), “Пахтакор” (ҷойи 599-ум) ва “Насаф” (ҷойи 642-юм), ҳарду аз Узбекистон, дохил шудаанд. Аммо дар ин рӯйхат низ бошгоҳҳои футболи Тоҷикистон ба чашм намерасанд.