Пулиси вилояти Хатлон аз боздошти се қочоқбари маводи мухаддир хабар дод. Аз онҳо беш аз 25 кг маводи мухаддир мусодира шудааст.
Раёсати Вазорати корҳои дохилӣ дар вилояти Хатлон дар гузориши телевизионие гуфт, яке аз се нафар боздоштшудаҳо ва роҳбари ин гуруҳ Маҳмадалӣ Қодиров бо қочоқбарон дар Афғонистон робита дошта, маводи мухадирро аз он ҷо дастрас кардааст.
Ба гуфтаи мақомот, боздоштшудаҳо иқрор шудаанд, ки маводи мухаддиро мехостанд ба вилояти Суғд бурда, дар он ҷо ба фурӯш бигузоранд.
Ба иттилои манбаъ, Маҳмадалӣ Қодиров писари ноболиғи худро ҳам ба ин кор ҳамроҳ кардааст.
Нисбат ба боздоштшудаҳо бо гумони муомилаи ғайриқонунии маводи мухаддир парванда оғоз карда шудааст.
Назари боздоштшудаҳо ва наздикону пайвандонашон ба ин қазия дастрас нест.