Вазири умури хориҷии Қазоқистон Алмос Айдаров 20 июл дар як нишасти хабарӣ гуфт, кишвараш сахт нигарон аст, ки таҳти таҳрим қарор нагирад.
"Дар чанд гузориш ва пешгӯиҳои Амрико номи Қирғизистон зикр шудааст. Барои мо хеле муҳим аст, ки Қазоқистон ҳадафи таҳримҳои дувумдараҷа қарор нагирад. Таҳримҳои мустақим алайҳи Русия қабул шуданд. Ҳоло бастаи таҳримҳо зидди кишварҳои дувум ва ҳамсоя бо Русия ҷорӣ карда мешавад”, - афзудааст ӯ.
Ҳаҷми табодули мол миёни Русия ва Қазоқистон то эъломи таҳримҳо ба 25 миллиард доллари амрикоӣ расида буд. Ба гуфтаи ӯ, агар таҳримҳои дувумдараҷа табодули анъанавии молро маҳдуд кунанд, минтақаҳои назди марзии ду кишвар сахт зарар мебинанд.
"Ҳамаи талоши мо ба он равона шудааст, ки ҳадафи ин таҳримҳо қарор нагирем. Мо ҳамаи созишномаҳоро шафоф ошкор мекунем. Баръакс, мегӯем, агар қонуншикании ширкатҳои моро дидед, хабар кунед", - изҳор доштааст вай.
Вазорати молияи ИМА рӯзи сешанбе 4 ширкати қирғизистониро барои интиқоли молҳои таҳримшуда ба Русия ба "рӯйхати сиёҳ" ворид кард.
Аз ширкатҳое, ки таҳрим шудаанд "RM Design and Development", “ГТМЕ Технологии”, “Прогресс лидер” ва “Карголайн” ном бурда шудааст.
Ба руйхати таҳримшудаҳои Вазорати молияи Амрико ширкатҳои русии “Базис Трейд Прософт”, “Радиотехснаб”, “Регион-проф”, “Технологии, системы и комплексы” ва “СиАйСи”, ки маҳсулоти худро тавассути ширкатҳои қирғизӣ интиқол медоданд, шомил шудаанд.