Дар сарҳади Русия бо Украина рӯзи 4-уми июн даргирии нав рух дод.
Ҷангиёни зидди Кремлин гуфтанд, азбаски волии Белгород ба музокироти табдили зиндониҳо наомад, чанд сарбози русро ба Киев таслим карданд.
Волии Белгород Вячеслав Гладков гуфт, воқеан, дар ин минтақаи ҳамсарҳад бо Украина даргирӣ идома дорад ва баъзе аз сарбозони рус аз ҷониби ҷангиёни тарафдори Украина дастгир шудаанд.
Каме пештар ӯ ваъда дод, ки бо ҷангиён дар сарҳад мулоқот карда, табодули онҳоро дар шароити амн ваъда медиҳад. Вале ҷангиёни рӯ ба Украина гуфтанд, волӣ дигар ҳозир нашуд ва онҳо сарбозони дастгиршударо ба ҳукумати Киев супурданд. Мустақилонаи санҷидани дурустии хабарҳо феълан имкон надорад.
Дар як наворе, ки гурӯҳи худхондае бо номи Корпуси ихтиёриёни рус дар Телеграм нашр кард, иддао мешавад, ки 10-12 сарбози рус, аз ҷумла ду сарбози бистарӣ дастгир шудаанд.
Мақомот дар Украина аз ин пеш гуфтанд, ки дар шаҳри Днепр дар натиҷаи ҳамлаҳои ҳавоии Русия як тифли дусола кушта шуд.
Ба гузориши низомиёни украинӣ, Киев чанд мавҷи ҳамлаҳои ҳавоии мушакиву паҳподҳоро рафъ кард.