Бебарқӣ дар Украина. Русия нерӯгоҳҳоро нишон гирифтааст

Бебарқӣ дар Киев. 19 октябр, 2022.

Вазорати энержии Украина аз рӯзи панҷшанбе барои таъмири шабакаҳои интиқоли барқи кишвар, ки дар ҳамлаҳои ахири Русия осеби сахт дидааст, маҷбур шуд барқи бисёре аз минтақаҳоро қатъ кунад. Ҳамзамон дар ҷабҳаи ҷангӣ пешравии артиши Украина ба тарафи шаҳри Херсон идома дорад.

Ҳарчанд артиши Украина дар ду моҳи ахир муваффақ шудааст бахше аз минтақаҳои ишғолшуда дар шарқ ва ҷануби ин кишварро бозпас бигирад, вале то ба ҳол натавонистааст аз зерсохторҳои энержӣ дар баробари ҳамлаҳои мушакӣ ва ҳавопаймоҳои бесарнишинӣ Русия, ки ба назар мерасад ҳадафи он заъиф кардани руҳияи мардум дар остонаи фасли зимистон аст, муҳофизат кунад.

Ҳукумат аз мардум хостааст масрафи барқро кам кунанд ва рӯзи панҷшанбе барои аввалин бор аз замони оғози ҳамлаи низомии Русия, интиқоли барқ аз соати ҳафти субҳ то ёздаҳи шаб қатъ шуд. Раиси ҷумҳури Украина гуфт, ки Русия рӯзҳои ахир ба 30 дарсади нерӯгоҳҳои тавлиди барқи ин кишвар ҳамла кардааст.

Ҳамзамон дар минтақаҳои шимол-шарқи Украина интиқоли об қатъ шуда ва аз шаҳри Киев низ хабар мерасад, ки мардуми нигарон аз қатъи об, дар ин шаҳр об захира мекунанд.

Олаф Шолтз, нахуствазири Олмон Маскавро ба истифода аз энержӣ ва гуруснагӣ ба унвони силоҳи ҷангӣ муттаҳам кард ва гуфт, "тактикаи замини сӯхта ба пирӯзии Русия дар ҷанг кӯмак нахоҳад кард. Ин равишҳо фақат боиси тақвияти ваҳдати мардуми Украина ва пуштибонҳои ин кишвар хоҳад шуд".

Дмитрий Медведев, муовини раиси Шӯрои амнияти миллии Русия дар вокуниш ба ин суханон гуфт, "ба назар мерасад, ки оқои Шолтз гузаштаи фашистии кишвараш ва марги 30 миллион нафар аз мардуми Иттиҳоди Шӯравиро, ки аз сӯи артиши Олмон кушта шуданд ва ё бар асари сармо ва гуруснагӣ давоми Ҷанги Ҷаҳонии Дувум ҷон бохтанд, фаромуш кардааст".

Вазорати дифои Русия эълон кард, ҳамлаҳо ба зерсохторҳои энержӣ дар Украина идома хоҳад ёфт. Коршиносон ба ин боваранд, ки аз замони таъйини генерал Сергей Суровикин ба унвони фармонедҳи артиши Русия дар Украина, ин ҳамлаҳо, ки ҳадафи он заъиф сохтани рӯҳияи мардум ва артиши Украина аст, бештар шудааст. Генерал Суровикин бинобар истифода аз равишҳои бераҳмона дар ҷанги Сурия, "генерали охируззамон" лақаб гирифтааст.

Вазири энержии Украина дар мусоҳиба бо телевизиони давлатии ин кишвар гуфт, Русия дар даҳ рӯзи гузашта 300 ҳамлаи ҳавоӣ ба зерсохторҳои энержӣ анҷом додааст. Ӯ афзуд, маҷбур шудаанд масрафи барқро 20 дарсад коҳиш диҳанд.

Раиси шабакаи барқи Украина низ гуфт, "барои таъмири хисороти воридшуда ба истгоҳҳои барқрасонӣ маҷбурем интиқоли барқро дар бархе ҳолатҳо қатъ кунем".

Владимир Зеленский, раиси ҷумҳури Украина шоми чаҳоршанбе дар паёме видеоӣ хитоб ба мардум гуфт, ҳалли ин мушкил ба вақт ниёз дорад. Ӯ афзуд, "арзёбии мо ин аст, ки ҳамлаҳои Русия ба зерсохторҳои энержӣ то замоне, ки мо битавонем бо кӯмаки кишварҳои пуштибонии Украина сад дар сад мушакҳо ва дронҳои душманро сарнагун кунем, идома хоҳад ёфт".

Кишварҳои узви Иттиҳоди Аврупо дар ҳоли баррасии чораҳои гуногун барои кӯмакҳои бештаре бар Украина, аз ҷумла, таҷҳизоти тавлиди барқ, саҳмгирӣ дар бозсозии зеристгоҳҳои энержӣ ва кӯмаки молӣ барои бунёди нерӯгоҳҳои нав ҳастанд.

Ҳамзамон дар ҷабҳаи ҷанг пешравии артиши Украина ба тарафи шаҳри Херсон, идома дорад. Артиши Украина субҳи панҷшанбе гуфт, ки дар охирин ҷангҳо 43 сарбози Русия кушта ва шаш тонк ва мошинҳои низомӣ аз байн бурда шуданд. Дар муқобила Вазорати дифои Русия гуфт, нерӯҳои ин кишвар дар ин набард пирӯз шудаанд.

Хабаргузории байналмилалӣ наметавонанд иддаои ду тараф дар мавриди таҳаввулот дар ҷабҳаҳои ҷангро таъйин кунанд.