Намояндагони ОРЕС, Русия ва дигар кишварҳои истеҳсолкунандаи нафт нақшаи кам кардани истеҳсолро мушаххас карданд. Интизор меравад, ки ин иқдом барои мӯътадил кардани вазъи бозори бо сабаби пандемияи коронавирус осебдида мусоидат кунад. Гурӯҳе бо номи ОРЕС+ бо пахши изҳороте рӯзи 9 апрел баъди муҳокимаҳои нӯҳсоата гуфт, ки нақшаи мувофиқашуда коҳиши истеҳсол дар ҳаҷми тахминан 10 миллион бушка дар рӯз ваё бист дар сади ҳаҷми умумии истеҳсоли рӯзонаро дар моҳҳои маю июн дар назар мегирад. Онҳо инчунин изҳори умедворӣ карданд, ки ИМА ҳам барои кам кардани нархҳо талош хоҳанд кард. Қарор аст имрӯз, 10 апрел ин мавзӯъ дар видеоконфронси вазирони энержии кишварҳои узви Гурӯҳи 20-гона бештар баррасӣ шавад.
Бархе мақомоти кишварҳои нафтӣ гуфтанд, ки ҳатто то 10 миллион бушка дар рӯз кам кардани ҳаҷми истеҳсол вазъи бозорро мӯътадил намекунад, чунки захираҳои ҳозираи нафт ҳам барои чандин ҳафтаи дигар пур аст. ОРЕС+ умедвор аст, ки истеҳсолкунандаҳои дигари мисли ИМА ба коҳиши 5 миллион бушка нафти иловагӣ дар рӯз омода мешавад. То ҳол ИМА гуфтааст, ки барои чунин коҳиш омода нест, чунки ин тасмим қонунҳои марбутаи ИМА (қонунҳои зидди эътимод)-ро нақз мекунад.