Оҷонсии хидмати давлатии назди раиси ҷумҳури Тоҷикистон мегӯяд, ки ҳудуди чиҳил дарсади хизматчиёни давлатӣ дар кишвар зодаи вилояти Хатлон будаанд. Ҷумъа Давлатов, раиси ин ниҳод, ки 12 январ бо хабарнигорон суҳбат мекард, иддаои гӯё аз як маҳал таъин шудани кормандони ниҳодҳои давлатиро рад кард. Ӯ гуфт, ки зодагони Суғд дар идораҳои давлатӣ 24 дарсад ва намояндагони Бадахшон 18,6 дарсадро ташкил медиҳанд.
"Хизматчиёни давлатӣ аз ҳисоби сокинони Душанбе 10,1 ва ноҳияҳои тобеи марказ 18,1 фоиз ҳастанд," -- афзуд Ҷумъа Давлатов. Ба иттилои раиси Оҷонсии хидмати давлатии назди раиси ҷумҳури Тоҷикистон, теъдоди умумии хизматчиёни давлатӣ 18 ҳазору 704 нафар буда, аз ин ҳисоб 22 дарсадашон занон будаанд.