Толибон садҳо ҳамтои худро аз зиндони Покистон озод карданд

Мақомҳои покистонӣ мегӯянд, дар ин ҳамла 12 нафар кушта шудааст, ки чаҳор тан аз маъмурони пулис низ аз он ҷумлаанд. Як мақоми баландпояи давлати Покистон ба шабакаи телевизиони ARY NEWS-и покистонӣ гуфтааст, ки шаш тан аз зиндониёни фирорӣ дастгир шудаанд.

Ин мақоми покистонӣ шумораи аъзои гуруҳи Толибонро, ки аз ин зиндон гурехтаанд, 30 нафар эълом кардааст. Ҳоло маълум нест оё дигар зиндониёне, ки фирор кардаанд низ аз аъзои гуруҳи Толибон ё гуруҳҳои мусаллаҳ буданд ё зиндониёни оддӣ.

Бино ба гузориши расонаҳои Покистон, зиндони «Дера Исмоилхон», ки ба он ҳамла шуд, наздик ба панҷ ҳазор зиндониро дар бар мегирад. Зиндони марказии Дера Исмоилхон дар шаҳре бо ҳамин ном дар вилояти марзии Хайбар-Пахтунхоҳ, дар наздикии марзи он кишвар бо Афғонистон қарор дорад. Минтақае, ки Ҷунбиши Толибони Покистон дар он бисёр фаъол аст.

Рӯзномаи «Dawn» чопи Покистон мегӯянд, шибҳи низомиёни ба силоҳҳои вазнин муҷаҳҳаз буда ва дар либоси пулис ба зиндон ҳамла кардаанд. Шаҳидуллоҳ Шаҳидӣ, яки аз сухангӯёни Толибон дар гуфтугӯ бо “Dawn” зимни он, ки масъулияти ҳамларо аз сӯи ин гурӯҳ ба ӯҳда гирифта, гуфтааст, тақрибан 100 нафар шибҳи низомӣ дар ин амалиёт ширкат кардаанд. Ба гуфтаи ин узви Толибон, «амалиёт ба ҳадафаш расидааст».

Ин нахустин ҳамлаи Толибон ба зиндонҳо дар Покистон нест. Соли гузашта низ ҳамлаи мушобеҳе аз сӯи Толибон ба зиндони Банну дар ҳамин минтақаи Покистон анҷом шуд, ки дар пайи он 400 зиндонӣ муваффақ ба фирор шуданд.

Ҳамлаи Толибон ба зиндоне дар Покистон