Самӣ Отагул тирамоҳи соли 2023 бо раводиди сайёҳӣ вориди Қазоқистон шуд ва мақоми "кандас" (ҳамхун)-ро дарёфт кард. Баъдан ӯ барои гирифтани шаҳрвандии Қазоқистон муроҷиат кард, вале мақомоти Қазоқистон ӯро ба нақзи қоидаҳои будубош дар кишвар муттаҳам карда, дархости шаҳрвандии ӯро рад карданд.
Дархости ӯ барои дарёфти ҳаққи иқомати доимӣ низ дар Қазоқистон рад шуд ва моҳи апрели соли равон додгоҳ қарор кард, ӯ ба ватан истирдод шавад.
Отагул 15-уми апрел дар минтақаи транзитии фурудгоҳи шаҳри Остона шиносномаи худро пора кард. Сипас додгоҳ ӯро барои надоштани шиноснома 30 шабонарӯз ҳабс кард.
Мақомоти Қазоқистон 15-уми май бори дигар талош карданд, ки вайро ба Афғонистон истирдод кунанд, вале кормандони ширкати ҳавопаймоӣ розӣ нашуданд, ба ӯ билет фурӯшанд.
"Ман бо забони англисӣ ба масъулони ширкати ҳавопаймоӣ гуфтам, ки маро мехоҳанд иҷборан фиристанд. Онҳо низ дар ҷавоб гуфтанд, ки дар ин сурат мо ба шумо билет намефурӯшем", - изҳор дошт Отагул.
Самӣ Отагули 32-сола аз қазоқтаборони Афғонистон аст, ки баъди сари қудрат омадани гуруҳи Толибон дар он кишвар дар соли 2021 ба Қазоқистон фирор кардааст.
