Қурбоналӣ Раҷабов, яке аз охирин гурӯғлисароён ва шоири мардумии Тоҷикистон баъд аз бемории тӯлонӣ рӯзи 10-уми октябр даргузашт.
Аммо солҳои ахир гурӯғлисароӣ дар Тоҷикистон тақрибан дида намешавад ва Қурбоналӣ Раҷаб ҳам яке аз он гуруғлисароёни ангуштшумор буд.
Духтараш Паригул Раҷабова имрӯз ба Радиои Озодӣ хабар дод, ки падари 93-солааш рӯзи 10-уми октябр дар иҳотаи фарзандон дар Кӯлоб даргузашт. Қурбоналӣ Раҷабовро баъди маросими ҷаноза дар оромгоҳи Тамошотеппаи Кӯлоб дафн карданд. Ба гуфтаи фарзандонаш, гурӯғлисарои тоҷик як моҳ пеш сахт бемор шуд ва аз ҳаракату сухан гуфтан монд.
Гурӯғлӣ, ки аз ҳунарҳои қадимии мардуми Осиёи Марказӣ аст, дар замони шӯравӣ дар Тоҷикистон шунавандаи зиёд дошт. Гурӯғлихонҳо даҳҳо ҳазор байти достонеро аз ёд медонанд ва метавонанд, муддати тулонӣ ва беист овозхонӣ кунанд.
Аммо солҳои ахир гурӯғлисароӣ дар Тоҷикистон тақрибан дида намешавад ва Қурбоналӣ Раҷаб ҳам яке аз он гуруғлисароёни ангуштшумор буд.
Қурбоналӣ Раҷаб рӯзи 1-уми марти соли 1925 дар деҳаи Порвори ноҳияи Ховалинги вилояти Хатлон ба дунё омадааст. Ӯ аз собиқадорони Ҷанги Бузурги Ватанӣ аст ва баъди захмӣ шуданаш, ба Тоҷикистон баргаштааст.
Адиби мардумӣ аз соли 1956 ба шеъргӯйӣ оғоз кардааст ва солҳои 1962-1963 дар асоси ривоятҳои ӯ ду ҷилди ҳамосаи мардумии «Гурӯғлӣ» сабту чоп шудааст. Сабки шеъраш сабки шеъри шифоҳии мардум аст. «Таронаи дил» «Суруди замин» «Ҳафтранг» «Фурӯғи пирӣ» аз ҷумлаи китобҳои ӯст.
Хабарнигори Радиои Озодӣ 9 сол пеш ба суроғи Қурбоналӣ Раҷаб рафт ва видеои сӯҳбат бо ӯро инҷо бубинед.
