Тибқи иттилои Кумитаи сармоягузорӣ, арзиши чойхона наздик ба 35 миллион сомонӣ (беш аз 3 миллион доллар) муайян шудааст. Музояда рӯзи 29-уми сентябри имсол баргузор хоҳад шуд.
Чойхонаро дар соли 2015 ва бахшида ба 3000-солагии шаҳри Ҳисор бунёд кардаанд. Ҳоло дар як вазъи ногувор қарор дорад.
Коршинос Фозилҷон Фатҳуллоев гуфт, як далели нокомии иншооти ҷашнӣ дар Тоҷикистон ин аст, ки масъулон ҳангоми бунёди биноҳо суду зиёнро ба назар намегиранд.
“Коршиносон чанд дафъа пурсида буданд, ки фоидаи он барои буҷаи давлат, иқтисоди миллӣ чӣ қадар аст? Харҷаш чӣ қадар аст? Мутаассифона, гуфтанд, ки мо бояд сиёсати хирадмандонаро дастгирӣ кунем, аммо ин дастгирии сиёсат не, балки хиёнат ба давлат шуд,” – гуфт ӯ.
Мақомот ҳангоми ифтитоҳи чойхона гуфта буданд, ки 100 кас дар он кори доимӣ пайдо хоҳад кард. Ба қавли сокинон, “Харбуза” ҳамагӣ се моҳ фаъол буд.
Радиои Озодӣ соли 2016, як сол пас аз боз шудани “Харбуза”, дар бораи он гузорише таҳия кард. Чойхона дигар кор намекард, бомаш мечакид ва бино таъмирталаб шуда буд.
Навор аз соли 2016:
