Бетараф набошед, ба Ҷаъфар кӯмак кунед

Ҷаъфар Тоҷибоев як соли охир ҳамроҳ бо модараш дар як маркази саратоншиносии ба номи Блохинаи шаҳри Маскав зидди саратон табобат мешавад. Як сол пеш дар шошадони ин кӯдак саратон ошкор шуд (рабдомиосаркома) ва волидонаш зуд ӯро ба Маскав бурда, аз паи наҷоти ӯ шуданд. Инак 15 даври химиотерапия пушти сар шуд ва дар навбат се даври дигари ин муолиҷаи гаронқимат дар пеш аст.

Ҳар як давраи муолиҷа 300 ҳазор рубл арзиш дошта, дар маҷмӯъ ба ин хонадон 1 миллион рубл маблағ лозим аст. Табибон мегӯянд, ки Ҷаъфар тамоми имкони комилан сиҳҳат шуданро дорад ва давраи навбатии химиотерапияро бояд 27 феврал шурӯъ кунад.

Бисаодат, модари Ҷаъфар Тоҷибоев дар сӯҳбати телефонӣ аз Маскав ба радиои Озодӣ гуфт:

- Мо, ки шаҳрванди Русия нестем, тамоми хароҷоти табобат барои мо пулакӣ аст. Мо ба фонду созмонҳои мухталиф муроҷиат кардем, ки дар анҷоми табобати писарамон кӯмак кунанд.

Ҷаъфар писари калонии хонадон буда, хоҳараш ҳоло бо модаркалонаш дар деҳаи Хистеварзи ноҳияи Бобоҷон Ғафуров зиндагӣ мекунад. Падари хонадон, ки дар Тоҷикистон корманди бонк буд, корро тарк карда ба Маскав омадааст ва дар ҷое кор карда тамоми даромадашро барои пӯшонидани харҷи табобати фарзанд сарф мекунад. То имрӯз хонаводаи Тоҷибоевҳо хароҷоти муолиҷаро аз ҳисоби худ пардохт мекарданд, вале бо тамом шудани захираҳои пулӣ, волидон маҷбуранд ба созмонҳои хайрият муроҷиат кунанд.

- Духтурҳо гуфтанд, ки Ҷаъфар пурра сиҳҳат хоҳад шуд. Дар аввал гуфтанд, ки пешобдонашро пурра гирифта мепартоянд, вале баъди амалиёт, пешобдонашро ҳифз карданд ва танҳо нисфашро гирифта партофтанд. Ҳоло бояд ки бо як найчаи пайваст ба пешобдонаш (мочевой котетор) гардад, чунки ҳанӯз пурра табобат нашудааст, - мегӯяд модар.

Бунёди хайрияти “Гольфстрим” дар Маскав дар муроҷиаташ ба Радиои Озодӣ дархост намуд, ки матлабе дар бораи вазъияти хонаводаии Ҷаъфар Тоҷибоев нашр кунем, то ки шахсиятҳои хайрхоҳ ва созмонҳои имдодрасон дар анҷоми муолиҷаи ин тифл кӯмак кунанд. Ин созмон мегӯяд, дар ду соли охир тавонистааст барои наҷоти ҷони 100 тифли гирифтори бемориҳои сангин пул ҷамъоварӣ кунад.

Шахсоне, ки нисбати сарнавишти Ҷаъфар бетараф нестанд ва мехоҳанд саҳми худро дар табобати ин кӯдак гузоранд, метавонанд тавассути ин саҳифаҳои интернетӣ миқдори маблағеро барои табобати кӯдак ирсол кунанд.

Хонум Бисаодат аз номи аҳли хонаводааш ба тамоми шахсони хайрхоҳ барои кӯмак ва дастгириашон изҳори сипос мекунад.