Се нафари дигар, аз ҷумла як навраси 13-сола, дар ин ҳамла осеб дидаанд.
Нерӯҳои Русия ба ҷуз Киев ба панҷ минтақаи дигари Украина бо ҳавопаймоҳои бесарнишин ҳамла кардаанд.
Бисёре аз украиниҳо ташвиш доранд, ки дар посух ба ҳамлаи охири Киев ба қаламрави Русия, дар вилояти сарҳадии Курск, Маскав метавонад ҳамлаҳои ҳавоии худро афзоиш диҳад.
Украина борҳо аз ҳампаймонҳои ғарбии худ хостааст, ки барояш низоми бештари дифои ҳавоӣ фароҳам кунанд.
Волии вилояти Курск Алексей Смирнов рӯзи 11-уми август гуфт, ки боқимондаҳои як мушаки сарнагуншудаи украинӣ ба болои бинои истиқоматӣ афтода, 13 нафарро маҷрӯҳ кард. Вазъи ду захмӣ вазнин будааст.
Ба гуфтаи Игор Кутсак, раиси шаҳри Курск, маркази вилояти ҳамноми он, бошандагони як бинои нуҳошёна ба ҷойҳои муваққатии зист кӯчонда шудаанд.
