Пайвандҳои дастрасӣ

Хабари нав

Интихоботи Афғонистон. Ашраф Ғанӣ пирӯз эълон шуд. Абдулло Абдулло тақаллубӣ хонд. ВИДЕО


Ашраф Ғанӣ ва доктор Абдулло Абдулло

Кумисюни мустақили интихоботи Афғонистон натиҷаҳои ибтидоии интихоботи президентии ин кишварро эълон кард. Ҳаво Олам Нуристонӣ, раиси кумисюн, рӯзи 22-юми декабр дар Кобул гуфт, ки раиси ҷумҳур Ашраф Ғании ҳафтодсола бо беш аз 50 дарсади раъйи интихобкунандаҳо пирӯз шудааст.

Доктор Абдулло Абдулло, рақиби деринаи Ашраф Ғанӣ ва раиси ҳукумати иҷроия, бо тақрибан 40 дарсади раъй дар ҷойи дувум аст. Гулбиддин Ҳикматёр ва Раҳматуллоҳ Набил, номзадҳои дигари интихоботи президентӣ дар Афғонистон дар ҷойгоҳи севуму чаҳорум қарор доранд.

Ситоди интихоботии доктор Абдулло натиҷаҳои аввали интихоботро "тақаллубӣ" хонд ва гуфт, ки ин натиҷаро намепазирад ва хостори расидагӣ ба тақозоҳои қонуниаш аст.

Дафтари Созмони Милали Муттаҳид ва сафорати Амрико дар Афғонистон аз эълони натиҷаҳои ибтидоии интихоботи раёсати ҷумҳурии ин кишвар истиқбол карданд. Аммо Ҷон Бас, сафири Амрико дар Афғонистон, дар "Твиттер" навишт, "бояд барои мардум возеҳ бошад, ки ин натиҷаҳои аввал аст ва то эълони натоиҷи ниҳоӣ корҳое зиёде мондааст."

Видеои эълони натиҷаҳоро дар инҷо бинед:

Эълони натиҷаҳои ибтидоии интихоботи президентии Афғонистон
лутфан мунтазир бошед

Феълан кор намекунад

0:00 0:03:44 0:00

Мақомоти Афғонистон мегӯянд, номзадҳо 48 соат доранд, ки шикоятҳои худро дар Кумисюни шикояти интихоботӣ сабт кунанд. Қарор аст, натиҷаҳои ниҳоии интихоботи раёсати ҷумҳури Афғонистон баъди расидагӣ ба шикоятҳо эълон шавад.

Интихоботи президентии Афғонистон рӯзи 28-уми сентябри имсол баргузор шуд ва эълони натиҷаҳои аввали он то кунун ду бор ба таъхир афтодааст. Иддаоҳо дар бораи қонуншиканӣ ҳангоми раъйдиҳӣ, мушкилоти фаннӣ дар ҷамъоварии баргаҳои раъй ва гирифтани иттилоъ аз системаи электронии биометрии раъйдиҳандагон монеи эълони саривақтии натиҷаҳои интихобот шуда буд.

Дар интихоботи Афғонистон 15 номзад рақобат карданд, вале номзадҳои асосӣ Ашраф Ғанӣ, раиси ҷумҳури феълӣ ва Абдулло Абдулло, раиси иҷроияи ҳукумати Афғонистон буданд.

Соли 2014 баъди моҷаро бар сари натиҷаҳои интихоботии раёсати ҷумҳурии Афғонистон, номзадҳо ба ин мақом, Ашраф Ғанӣ ва Абдулло Абдулло бо миёнҷигарии Амрико ҳукуматро тақсим карданд. Ашраф Ғанӣ раиси ҷумҳур ва Абдулло Абдулло раиси ҳукумати иҷроия шуд.

Ашраф Ғанӣ намояндаи қавми паштун аст, ки дар Ғарб таҳсил кардааст ва вазири молияи Афғонистон ҳам буд.

Абдулло Абдулло, табиби чашм яке аз аъзои баландпояи Ҷабҳаи Шимол, гуруҳи мухолифи Толибон бештар дар байни тоҷикони Афғонистон обрӯ ва тарафдори зиёд дорад.

Шоҳиди ҳодисае шудед, ё аксе видеое доред, лутфан, ба ин шумораҳо ва ба воситаи Вотсап, Вайбер, Телеграм ва ё ИМО бифристед: (+420) 607 900 808; (+420) 724 056 681; (+420) 724 053 959; (+992) 980 15 10 10

Шарҳҳоро бинед (14)

Ин баҳс баста шудааст.

Шарҳҳо

Шарҳи нав расид
Идома
XS
SM
MD
LG