Пайвандҳои дастрасӣ

Бародари Маҳмадрӯзӣ Искандаров аз Шветсия паноҳандагии сиёсӣ хост


Темур Тошев, бародари Муҳаммадрӯзӣ Искандаров

Ҳамроҳ бо Темур Тошев ду узви фаъоли дигари Ҳизби демократ низ дархости паноҳандагӣ кардаанд.

Фаъолони Ҳизби демократи Тоҷикистон (ҷиноҳи Маҳмадрӯзи Искандаров), аз ҷумла бародари Муҳаммадрӯзӣ Искандаров - Темур Тошев, раиси бахши ҷавонони ин ҳизб - Синои Асаддулло ва фаъоли ин ҳизб Ҷамолиддин Назриев аз ҳукумати Шветсия паноҳандагии сиёсӣ хостаанд. Ин се нафар тахминан як моҳ пеш аз Тоҷикистон берун шуда, ҳоло дар шаҳри Стокҳолми Шветсия ба сар мебаранд.

Аризаи ин се нафар ба мақомоти муҳоҷирати Шветсия таслим шуда, ҳафтаи оянда қарор аст, ҷаласаи судӣ қазияи ин шаҳрвандони Тоҷикистонро баррасӣ кунад.

Ин дар ҳолест, ки ҳафт сол инҷониб Маҳмадрӯзӣ Искандаров, раиси пешини Ҳизби демократи Тоҷикистон дар зиндон ба сар мебарад. Ӯро моҳи октябри соли 2005-ум аз рӯи панҷ моддаи Кодекси ҷиноии Тоҷикистон, аз ҷумла терроризм, бандитизм, нигаҳдории ғайриқонунии силоҳу муҳофизон ва дуздии маблағи давлатӣ ба ҳаҷми бузург муҷрим шинохта, ба мӯҳлати 23 сол зиндонӣ кардаанд.

То ҳол ҷонибдоронаш маҳкумияти Искандаровро дорои ангезаҳои сиёсӣ меноманд. Пас аз зиндонӣ шудани Искандаров ҳизби ӯ ду тақсим шуд ва онҳое, ки раҳбарии ӯро эътироф намекарданд, анҷуманеро барпо карда, Масъуд Собиров, як фаъоли пешини ин ҳизбро раис интихоб ва худи Искандаровро аз ин вазифа сабукдӯш карданд. Мунаққидон бовар доранд, ки пошхӯрии ин ҳизб наметавонист бидуни мудохилаи маъмурони давлат сурат гирад.

Бо ин ҳол, фирори се узви фаъоли Ҳизби демократ аз Тоҷикистон ва дархости паноҳандагии сиёсии онҳо дар як кишвари аврупоӣ бо ноқаноатмандии онҳо аз шароити сиёии кишвар ва ҳам таҳдид ба ҷонашон дар пасманзари фишор болои намояндагони мухолифин бастагӣ доштааст.

Андешаи Шумо

Намоиши шарҳҳо

Назари хонандагон

New Comments Available

Агар сухане, назаре ё хабаре доред, бемалол ба мо занг занед ё SMS (паёмак) фиристед:

Дар Душанбе:

+992 988 65 94 63
+992 988 65 94 64

Дар Прага:

+420 724 053 959

XS
SM
MD
LG