ИА Беларусро ба сард шудани муносибатҳо ва таҳрим таҳдид кард
Иттиҳоди Аврупо (ИА) зидди мансабдорони Беларус, ки дар хушунатҳо алайҳи эътирозгарон, боздоштҳои беасос ва сохтакорӣ дар интихоботи президентии он кишвар даст доранд, эҳтимол дорад, таҳрим эълом кунад.
Дар ин бора дар изҳороти раҳбари ниҳоди ИА дар умури хориҷӣ Жозел Боррел, ки рӯзи сешанбе нашр гашт, гуфта шудааст.
Дар изҳорот омадааст, интихоботи президентие, ки 9 август дар Беларус баргузор шуда, бино ба эътилои расмӣ, бо пирӯзии Александр Лукашенко анҷомид, ноозод ва бар хилофи меъёрҳое буд, ки кишварҳои узви Созмони Амнияту Ҳамкорӣ дар Аврупо бояд риоя кунанд. Ба ҷуз ин, мақомоти Беларус зидди эътирозгарон аз хушунат кор гирифтанд, ки дар натиҷа як кас ҷон бохта, шумори зиёди иштирокдорон осеб диданд.
ИА аз Беларус даъват карда, ки боздоштшудаҳоро фавран ва бидуни шарт озод кунад.
Ҳамчунин қайд шуда, ки муносибатҳои Беларус бо ИА аз соли 2015 ба ин сӯ беҳтар шудаанд, вале эҳтимол дорад, ки ба иллати поймоли густардаи ҳуқуқи инсон аз сӯи мақомоти ин кишвар дубора бад шаванд.
Пештар Вазорати умури хориҷии Беларус гуфта буд, ки аъзои ИА вазъ дар ин кишварро "воқеъбинона" арзёбӣ намекунанд.
Комиссияи марказии интихоботии Беларус дар интихоботи 9 август Александр Лукашенкоро дубора пирӯз эълом кард, ки норозигии сокинони ин кишварро ба бор оварда, боиси сар задани эътирозҳо дар шаҳрҳои он кишвар шуд.
Мақомоти Беларус гуфтанд, ба зидди эътирозгарон аз силоҳ истифода шудааст
Мақомоти Беларус бори аввал тасдиқ карданд, ки ба зидди эътирозгарон аз силоҳҳои кушанда истифода шудааст.
Бахше аз сокинони Беларус аз натиҷаҳои интихоботи президентии 9-уми август, ки раиси ҷумҳур Александр Лукашенкоро дигарбора баранда эълон кард, норозӣ ҳастанд.
Вазорати корҳои дохилии Беларус рӯзи 12-уми август гуфт, шаби гузашта дар шаҳри Брест як мард захмӣ шудааст. Ба қавли мақомот, ин ҳодиса баъди он рух додааст, ки гуруҳе аз одамон бо милаҳои оҳанӣ ба маъмурони ҳифзи ҳуқуқ ҳамла кардаанд ва онҳо дар ҷавоб оташ кушодаанд.
Дар баёнияи расмӣ омадааст, "дар Брест гуруҳе аз шахсони мусаллаҳ ва пархошҷӯ ба маъмурони пулис ҳамла карданд. Тирҳое, ки ба ҳаво холӣ шуд, низ монеи онҳо нагардид. Барои дифоъ аз ҳаёт ва амнияти маъмурони пулис аз силоҳҳои кушанда истифода шуд. Яке аз ҳамлаварон маҷруҳ гардид."
Бори аввал аст, ки мақомоти Беларус эътироф карданд, ки аз силоҳҳои кушанда ба зидди норозиён истифода кардаанд. Пештар онҳо мегуфтанд, ки барои пароканда кардани муътаризон аз силоҳҳои резинӣ истифода мебаранд.
Ба қавли мақомоти Вазорати умури дохилӣ, рӯзи 11-уми август дар чандин шаҳру минтақаи Беларус тазоҳурот баргузор шудааст. Як рӯз пеш аз он мақомот дар бораи боздошти панҷ ҳазор кас, бистарӣ шудани тақрибан 200 нафар ва марги як нафар хабар дода буданд.
Эътирозҳо дар Беларус баъд аз он сар зад, ки Кумисюни марказии интихобот гуфт, Лукашенко бо беш аз 80 дарсади ройи мардум пирӯз шудааст. Дар ҳоле ки ба иттилои расмӣ рақиби аслии ӯ, Светлана Тихановская тақрибан даҳ дар сад овоз гирифтааст. Мухолифон бо ин натиҷаҳо розӣ нестанд.
Дар Минск тазоҳурот ба зидди Александр Лукашенко идома ёфт
Бо вуҷуди саркӯби бераҳмонаи тазоҳургарон дар Ҷумҳурии Белорус рӯзи чаҳорум аст, ки ҳазорон нафар ба нишони эътироз ба зидди раиси ҷумҳур Александр Лукашенко ба кӯчаҳо мебароянд. Рӯзи 12-уми август ҳазорон нафар дар Минск ва дигар шаҳрҳои Беларус ба кӯчаҳо баромаданд ва аз натиҷаҳои интихоботе, ки дар он Александр Лукашенко пирӯз эълон шуд, эътироз карданд. Лукашенко 26 сол боз раҳбари Беларус аст.
Мақомоти интизомӣ ба мардум таҳдид кардаанд, ки дар сурати тазоҳурот латукӯб ва ё боздошт мешаванд. Мақомот рӯзи 12-уми август эътироф карданд, ки ба зидди тазоҳургарон аз аслиҳа истифода бурдаанд. То кунун дар ҷараёни эътирозҳо ду нафар ҳалок шудаанд. Дар чанде аз гӯшаҳои Минск садҳо нафар саф кашида ва мошинҳо бо суст кардани суръат монеи ҳаракати мошинҳои пулис шуданд.
Айни тазоҳурот дар дигар шаҳрҳои Беларус сурат гирифт. Ба гуфтаи мақомоти расмии Беларус баъди интихоботи рӯзи 9-уми август ва шуруи эътирозҳо то кунун 6 ҳазор нафар дастгир ва садҳо тани дигар маҷруҳ шудаанд. Ба гуфтаи Кумиссиёни Марказии Интихоботӣ Александр Лукашенко 80 дар сади раъйи мардумро ба даст овардааст ва рақиби аслии ӯ Светлана Тихановская камтар аз 10 дар сади ороро соҳиб шудааст.