Дар изҳороти созмон аз 30-юми май гуфта мешавад, дар Узбекистон шумори онҳое, ки барои “таҳқири президент дар Интернет” зиндонӣ шудаанд, меафзояд.
Тибқи маълумоти созмон, қонунгузории Узбекистон барои онҳое, ки ба “Таҳқири оммавӣ ё туҳмати президенти Ҷумҳурии Узбекистон бо истифода аз матбуот ё воситаҳои дигари ахбори ом, шабакаҳои иртиботӣ ё интернет” айбдор дониста мешаванд, то 3 сол корҳои ислоҳӣ ё аз 2 то 5 соли зиндонро пешбинӣ мекунад.
Ба гуфтаи ҳомиёни ҳуқуқ, иттиҳоме, ки 5 сол зиндонро пешбинӣ мекунад, нақзи ҳуқуқи инсон ба ҳисоб меравад. “Мардум дар Узбекистон бояд имкон дошта бошанд, ки президент ва мансабдорони дигарро ошкоро танқид кунанд," - омадааст дар изҳорот.
Созмон соли гузашта дар бораи 5 шаҳрванди Узбекистон, ки бо ҷурми таҳқир ё туҳмати президент аз озодӣ маҳрум шудаанд, хабар дода буд.
