Расонаҳои индонезӣ аз қавли як мақоми расмӣ дар вазорати нақлиёти он кишвар мегӯянд, як ҳавопаймои ширкати AirAsia, ки аз шаҳри Сурабая (Surabaya) дар Индонезия равонаи Сингапур буд, тамосаш бо бурҷи муроқибат қатъ шудааст. Мақомҳои ширкати AirAsia гуфтанд, ки амалиёти ҷустуҷӯи ҳавопайморо оғоз мекунанд.
Ҳодӣ Мустафо, ин мақоми расмии вазорати нақлиёти Индонезия гуфтааст, парвози QZ8501, дар соати 6:18 -и бомдоди рӯзи якшанбеи 28 декабр, алоқааш бо бурҷи муроқибати Ҷакарторо аз даст додааст.
Хабаргузориҳои Ройтерз ва Франс-пресс низ дар хабарҳои аввалия гуфтаҳои ин мақоми индонезиягӣ ба расонаҳои он кишварро бознақл кардаанд. Хабаргузории Ройтерз мегӯяд, як мақоми расмии дигари он кишвар навъи ҳавопайморо Airbus 320 ва шумораи мусофирон ва хадамаи парвозро 162 нафар гуфтааст.
Бинобар гузоришҳои расида ва ба гуфтаи мақомоти вазорати нақлиёти Индонезия, 149 нафар аз мусофирони ин ҳавопаймо шаҳрвандони индонезӣ ҳастанд. Як шаҳрванди сингапурӣ, як бритониёӣ, як малайзиягӣ ва се шаҳрванди Корея низ дар ҳавопаймо будаанд.
Ҳодӣ Мустафо гуфтааст, парвоз пеш аз нопадид шудан аз сафҳаи радар, хоста буд то дар "масири ғайримаъмулӣ" қарор гирад. Ин ҳавопаймо қарор буд соати 8:30 дар Сингапур ба замин биншинад.
Оқои Мустафо ба расонаҳои индонезӣ гуфтааст, вазъи ҳаво дар атрофи роҳе, ки ҳавопаймо иртиботи худ бо бурҷи муроқибатро аз даст додааст, хуб набудааст.
AirAsia як ширкати ҳавоии ироакунандаи парвозҳои арзони хусусӣ дар Малайзия аст. Ин ширкати ҳавопаймоӣ дар 100 масир дар 22 кишвари дунё хадамот ироа мекунад.