Пайвандҳои дастрасӣ

Хабари нав

Қаҳрамони Тоҷикистон-2018 дар Лигаи қаҳрамонҳои AFC-2019 иштирок мекунад


Конфедератсияи футболи Осиё (AFC) рейтинг ё феҳрасти нави техникӣ ё фанниро эълон кард. Маҳз бар асоси ин рейтинг квотаҳо барои ширкат дар мусобиқаҳои бошгоҳии AFC дар солҳои 2019-2020 тақсим карда мешавад. Дар ин бора дар сомонаи расмии Федератсияи футболи Тоҷикистон рӯзи 7-уми декабр хабар дода шудааст.

Ба иттилои ин манбаъ, Тоҷикистон дар рейтинги нав бо 30,433 имтиёз дар байни 46 федератсияи миллии AFC ҷойгоҳи 12-ум ва дар минтақаи “Ғарб” мақоми 7-умро касб кардааст, ки ин имкон медиҳад Тоҷикистон ба ҳаққи ширкат дар даври пешакии Лигаи қаҳрамонҳои AFC дар мавсимҳои 2019-2020 мушарраф шавад. Ин маънои онро дорад, ки қаҳрамони Тоҷикистон-2018 ҳуқуқи иштирок дар Лигаи қаҳрамонҳои AFC-2019-ро аз марҳилаи пешакӣ ба даст меорад.

Дар мавриди агар қаҳрамони Тоҷикистон ба марҳилаи гурӯҳии Лигаи қаҳрамонҳои AFC роҳ ёбад, онгоҳ дар Ҷоми AFC-2019 ҷоизадорони нуқра ва биринҷии мусобиқоти қаҳрамонии Тоҷикистон-2018 иштирок мекунанд. Агар бошгоҳи зӯртарини Тоҷикистон ба марҳилаи гурӯҳии Лигаи қаҳрамонҳо роҳ ёфта натавонад, онгоҳ ширкати худро дар марҳилаи гурӯҳии Ҷоми AFC-2019 идома медиҳад.

Бояд гуфт, ки барои гирифтани иҷоза ҷиҳати ширкат дар Лигаи қаҳрамонҳои AFC дар мавсимҳои 2019-2020 қаҳрамони Тоҷикистон бояд аз тасрифоти ҳатмии парвона ё литсензия гузарад. Бошгоҳ бидуни парвона ба мусобиқоти асосии бошгоҳии Осиё роҳ дода намешавад.

Ёдовар мешавем, қаҳрамони Тоҷикистон-2017 - дастаи “Истиқлол”-и Душанбе - ширкати худро дар мусобиқоти Ҷоми AFC-2018 рӯзи 7-уми марти соли оянда дар майдони худ шуруъ мекунад. Рақиби “Истиқлол” дар даври аввали марҳилаи гурӯҳӣ ғолиби ҷуфти плей-офф мешавад.

Дар мавриди агар ғолиби Ҷоми Тоҷикистон - дастаи «Хуҷанд»-и шаҳри Хуҷанд – тавонад ба марҳилаи гурӯҳии мусобиқот роҳ ёбад, онгоҳ «Истиқлол» дар ибтидои Ҷоми AFC-2018 рӯзи 7-уми март муқобили хуҷандиҳо бозӣ мекунад.

Ба ҷуз «Истиқлол» дар марҳилаи гурӯҳии мусобиқот қаҳрамони Қирғизистон - «Олой»-и Ӯш ва ғолиби мусобиқоти қаҳрамонии Туркманистон, ки рӯзҳои наздиктарин маълум мешавад, мубориза мебаранд. Боз як ширкаткунандаи даври гурӯҳӣ дар минтақаи Марказӣ аз рӯи натиҷагирии бозиҳои плей-офф муайян хоҳад шуд.

Дастаи «Хуҷанд», ҷоизадори нуқраи мусобиқоти имсолаи қаҳрамонии кишвар ва Ҷоми Тоҷикистон, ба мубориза барои Ҷоми AFC-2018 аз даври плей-офф шуруъ менамояд. Рақиби «Хуҷанд» дар марҳилаи плей-оффи Ҷоми AFC ғолиби ҷуфти даври пешакӣ миёни барандаи Ҷоми Қирғизистон - «Дордой»-и Бишкек ва ҷоизадори нуқраи мусобиқоти қаҳрамонии Туркманистон мегардад.

Дастаи “Хуҷанд” нахустин бозиашро дар доираи плей-оффи Ҷоми AFC-2018 рӯзи 13-уми феврал дар меҳмонӣ, бозии ҷавобиро 20-уми феврал дар майдони худ анҷом медиҳад.

Марҳилаи гурӯҳии Ҷоми AFC-2018 дар минтақаи Марказӣ 7-уми март оғоз ёфта, 16-уми май ба поён мерасад. Ба даври баъдии мусобиқот танҳо ғолиби гурӯҳ роҳ меёбад. Пас аз анҷоми марҳилаи гурӯҳӣ бозиҳои ниманиҳоӣ ва ниҳоии байниминтақавӣ баргузор мешаванд. Бозии асосӣ ё ниҳоии Ҷоми AFC-218 рӯзи 27-уми октябр барпо мегардад.

Конфедератсияи футболи Осиё рӯзи 7-уми декабр дар сомонаи расмии худ эълон кардааст, ки маблағи бунёди ҷоизаҳои мусобиқаҳои бошгоҳӣ – Лигаи қаҳрамонҳо ва Ҷоми AFC - аз мавсими соли оянда афзун мешавад. Ҳамакнун маблағи ҷоизаи Лигаи қаҳрамонҳои AFC 6 миллион доллар, Ҷоми AFC 2,25 миллион долларро ташкил медиҳад.

Агар имсол ба ғолиби Лигаи қаҳрамонҳои AFC 3 миллион доллар ва ба финалист 1,5 миллион доллар супурда шуда бошад, пас дар мавсими оянда ғолиби мусобиқоти асосии бошгоҳии Осиё 4 миллион доллар ва финалист 2 миллион доллар мегиранд.

Ғолиби Ҷоми AFC-2018 бо ҷоизаи молӣ ба маблағи 1,5 миллион доллар ва финалисти мусобиқот ба маблағи 750 ҳазор доллар мукофотонида мешаванд. Солҳои 2016- 2017 маблағи ҷоизаҳои ин мусобиқот 1,5 миллион долларро ташкил медод, ки ба ғолиб 1 миллион доллар ва ба финалист 500 ҳазор доллар супорида мешуд.

Шарҳҳоро бинед (1)

Корбарони азиз! Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!
Ин баҳс баста шудааст.

Шарҳҳо

Шарҳи нав расид
Идома
XS
SM
MD
LG