Пайвандҳои дастрасӣ

Хабари нав

Хабарҳо

Даргузашти як гирифтори саратон дар Гуантанамо

Ҳарбиёни Иёлоти Муттаҳида мегӯянд, як боздоштшудаи афғони Гуантанамо, Абдулраззоқи 68-сола, аз бемории саратон даргузашт. Ба гуфтаи онҳо, Абдулраззоқ яке аз фармондеҳони ҷунбиши Толибон буда, дар моҳи январи соли 2003 дар Афғонистон асир афтодааст. Дар моҳи октябр маълум шуд, ки ӯ саратон дорад ва табобати кимиёӣ натиҷа надодааст.

Ҳамаи хабарҳои имрӯзро дар инҷо бихонед

Дороиҳои фарзандони вазири пешини амнияти Озарбойҷон дар Бритониё ошкор шуд

Анор Маҳмудов

Фарзандони вазири пешини амнияти давлатии Озарбойҷон Элдар Маҳмудов соҳиби хонаҳои гаронарзиш дар Бритониё мебошанд. Аз ҷумла, як хонае, ки дар шаҳри Лондон ба онҳо нисбат дода мешавад, 21 миллион доллар нарх дорад.

Президенти Озарбойҷон Илҳом Алиев Элдар Маҳмудовро соли 2015 бе шарҳ аз мақоми вазири амнияти давлатии кишвараш барканор кард. Бар асоси маълумот дар бораи муштариёни Бонки ҷазираҳои Кайман, ки моҳи ноябри соли 2019 дар пайи як ҳамлаи ҳакерӣ расонаӣ шуд, хонаводаи Маҳмудовҳо соҳиби тиҷорате ба маблағи наздики 111 миллион доллар ҳастанд.

Тибқи таҳқиқоте, ки дар асоси маълумоти мазкур анҷом шудааст, қариб ними ин пулҳо тавассути ширкати марбут ба писари 26-солаи Маҳмудов -- Анор ва духтари 31-солааш -- Наргис ба даст омадаанд.

Муаллифони таҳқиқот мегӯянд, дар миёни иншооти марбут ба хонаводаи Маҳмудовҳо чанд бинои тиҷорӣ дар шаҳрҳои соҳилии Пул ва Борнмут ба маблағи тақрибан 16,7 миллион доллар низ ҳаст.

Ба Анор Маҳмудов дар шаҳри Лондон бинои чорошёнае нисбат дода мешавад, ки ҳудуди 21,4 миллион доллар арзиш дорад.

Соли 2018 маълум шуд, модарарӯси Маҳмудов - Замира Хоҷиева, ки дар Лондон зиндагӣ мекунад, дар 10 сол дар маркази тиҷории маъруфи пойтахти Бритониё -- Harrods беш аз 21 миллион доллар харҷ кардааст.

Моҳи феврали соли равон дархости Хоҷиева барои бекор кардани қарори ҳабси дороиҳояш бекор карда шуд. Ин қарор ӯро вазифадор мекунад, ки манбаи дороиҳояшро ошкор кунад.

Муаллифони таҳқиқот ҳамчунин муайян кардаанд, ки Маҳмудовҳо дар Испания, Литва ва Люксембург низ ширкату хона доранд.

Трамп мехоҳад барои қатъи нооромиҳо аз нерӯ истифода кунад

Суханронии Доналд Трамп рӯзи 1 июн дар Вашингтон

Президенти ИМА Доналд Трамп мегӯяд, ки барои поён додан ба бетартибӣ ва яғмогариҳо, ки пас аз марги марди сиҳёпӯст ба дасти пулис дар чандин шаҳри Амрико сар заданд, аз ҳамаи имкониятҳо, ба ҷумла нерӯҳои мусаллаҳ истифода хоҳад кард.

Раҳбари ИМА гуфт, агар сарони аёлатҳо ин корро накунанд, ӯ худаш ба шаҳрҳои ноором артиш хоҳад фиристод.

Вай рӯзи 1-уми июн ба ҳамаи аёлатҳо дастур додааст, ки барои ҷорӣ кардани тартибу низом аз нерӯҳои Горди миллии ИМА истифода кунанд.

Бино бар қонунгузории Амрико, президент метавонад дар ҳолатҳои фавқулода нерӯҳои мусаллаҳро дастбакор кунад. Чунин фармон одатан, барои кумак ба амрикоиҳо ҳангоми офатҳои табиӣ мумкин аст, вале иҷрои он ҳамчунин ба иродаи ниҳодҳои федерол ва ҳукуматҳои маҳаллӣ бастагӣ дорад.

Президенти ИМА инчунин вандализм ва ғоратгариҳоро, ки 31-уми май дар Вашингтон ва дигар бахшҳои Амрико дар робита бо эътирозҳо аз марги марди африқоитабор Ҷорҷ Флойд ҳангоми боздошташ рӯзи 25-уми май дар Миннеаполиси аёлати Миннесота рух дод, шадидан маҳкум кард.

Тазоҳурот баъд аз он оғоз гирифт ва паҳн шуд, ки бино бар навори видеоӣ корманди пулис дар дастони марди сиёҳпӯст завлона мезанад ва барои беҳаракат нигаҳ доштани ӯ бо зонуяш сахт гардани Флойдро ба замин зер мекунад. Илтиҷои марди сиёҳпӯст, ки “ман нафас гирифта наметавонам” ба шиори ин тазоҳурот табдил ёфт.

Чаҳор афсари пулис, ки дар ин воқеа ширкат доштанд, аз кор ронда шуда, гумонбари асосӣ боздошт шуд ва зидди ӯ парвандаи ҷиноӣ боз гашт.

Вале норозиён мегӯянд, ин чораҳои қонеъкунанда нестанд ва ҳамчунин бахши бузурге аз мардуми ИМА аз маҳдудиятҳои марбут ба бемории ҳамагири коронвируси нав норозиянд.

Узбекистон низоъ дар марз бо Қирғизистонро "рӯйдоди дорои аҳамияти маҳаллӣ" гуфт

Муноқиша дар марзи Қирғизистон ва Узбекистон. 31 май, 2020.

Вазорати корҳои хориҷии Узбекистон низои марзии рӯзи 31 майро бо Қирғизистон "рӯйдоди дорои аҳамияти маҳаллӣ" унвон кард. Дар ин бора Вазорати корҳои хориҷии Узбекистон дар саҳифа "Фейсбук" навишт.

"Омӯзиши сабабҳои рӯйдод аз сӯи мақомоти расмии ду кишвар нишон дод, ки дар натиҷаи баҳсҳо атрофи поккории ҷӯйҳои оби "Чашма" байни ду сокини Узбекистону Қирғизистон низоъ бархостааст", - менависад Вазорати корҳо хориҷии Ӯзбекистон.

Ин вазорат захм бардоштани сокинони ду кишварро эътироф кардааст. Ба гуфтаи вазорат, ба маҷруҳон кӯмаки тиббӣ расонида шудааст.

Ҷонибҳои расмӣ ба созиш расидаанд, ки дар оянда бидуни гуфтугӯи қаблӣ ба поккории ҷӯйҳо иҷозат надиҳанд.

Оби чашмаи маъруф ба "Чашм" сокинони Узбекистону Қирғизистонро бо оби ошомиданиву полезӣ таъмин мекунад.

Дар вилояти Бодканди Қирғизистон, ки бо ҷазирақаламрави Сӯхи Узбекистон ҳаммарз аст, 31 май миёни сокинони ду кишвар низоъ сар зад. Ҷонибҳо ба самти якдигар санг ҳаво дода, чанд хона низ аз ҳар ду ҷониб сӯхт. Дар бораи захмиён низ хабар дода мешавад.

Дафтари матбуоти ҳукумати вилояти Ботканд хабар дод, ки муноқиша соати 12:30 байни сокинони деҳаи қирғизии Чечме ва сокинони маҳаллаи Чашмаи Сӯх бархостааст. Ба гуфтаи манбаъ, ҷанҷоли лафзӣ дар бораи онки чашма ба кӣ тааллуқ дорад, ба муноқишаву сангандозӣ ва хушунат печидааст.

Пизишке аз шаҳри Бишкек соҳиби "визаи тилоӣ"-и амири Дубай шуд

Чинора Жантошева, табиби қирғиз.

Чинора Жантошева, пизишки қирғизистонӣ, ки дар Амороти Муттаҳидаи Арабӣ (АМА) кор мекунад, аз сӯи амири Дубай Мактум ибни Рашид ал-Мактум барои саҳмгузориаш дар мубориза зидди коронавирус бо "визаи тилоӣ" қадрдонӣ шуд. Ин навъи виза имкон медиҳад, ки 10 сол дар АМА кор кард.

Чинара Жантошева 11 соли охир дар бемористони Rashid Hospital фаъолият мекунад. Вай мегӯяд, ҳеч гоҳ чунин шумори зиёди беморон ба беморхона муроҷиат накардаанд, ки ин охирҳо муроҷиат мекунанд.

"Дар тамоми тӯли фаъолиятам ман бо чунин шумори зиёди маргу мир рӯ ба рӯ набудам. Албатта, ҳолатҳои густариши бемориҳои гузаранда мавҷуд буд, аммо чунин паҳншавии босуръати уфунатро бори аввал мебинам", - гуфт вай.

Сар аз соли 2019 дар АМА ба сармоягузорони хориҷӣ ва мутахассисони ботаҷрибаи хориҷӣ "визаи тилоӣ" тақдим мекунанд. Дар гузашта АМА ба чанде аз сармоягузорони хориҷӣ чунин виза додааст.

Чинара Жантошева мегӯяд, тасаввур намекард, ки рӯзе соҳиби ин гуна виза мешавад.

Дар маҷмуъ дар АМА ба 212 пизишки хориҷӣ чунин виза тақдим кардаанд. Бино ба оморҳои мухталиф, аз 3 то 5 ҳазор қирғизистонӣ дар АМА зиндагӣ дорад.

Теъдоди гирифторони COVID-19 дар Тоҷикистон аз марзи 4000 нафар гузашт

Вазорати тандурустии Тоҷикистон эълон кард, ки дар шабонарӯзи гузашта 83 гирифтори нави COVID-19-ро сабти ном кардааст ва то рӯзи 1-уми июн теъдоди умумии беморон ба 4013 нафар расид. Ба иттилои расмӣ, айни замон бештар аз 1814 нафар таҳти муоина қарор доранд ва талафот аз ҳамон 47 нафари чанд рӯзи пеш зиёд нашудааст. Дар баёнияи расмии вазорат, ки дар вебсайташ нашр кард, омадааст, “дар як шабонарӯзи охир 201 нафар пас аз шифо ёфтан ба хонаҳояшон рухсат дода шуданд”.

Мутахассисон ба дурустии омори расмӣ шубҳа доранд ва мегӯянд, мумкин аст, теъдоди гирифторону талафот аз беморӣ дар Тоҷикистон зиёд бошад. Бар асоси феҳрасти ғайрирасмӣ дар Интернет шумори ҷонбохтагон аз коронавирус ва "илтиҳоби шуш" бештар аз 300 нафарро ташкил медиҳад. Ин феҳрастро бар асоси хабари расонаҳо, шабакаҳои иҷтимоӣ ва иттилои наздикони фавтидагон таҳия мекунанд.

Вазорати тандурустӣ мегӯяд, ки ҳукумат ва вазорат тамоми чораҳоро барои пешгирӣ аз CОVID-19 ва табобати беморон меандешад. Коронавируси нав, ки охири соли гузашта дар шаҳри Вуҳани Чин кашф шуд, то кунун ба беш аз 6.2 миллион нафар дар саросари ҷаҳон сироят карда, беш аз 372 ҳазор касро куштааст.

Муҳандиси собиқадор ва ошкорбаёни "Барқи тоҷик" даргузашт

Ғуломиддин Сайфиддинов аз муҳандисони собиқадоре буд, ки бо лаҳни тунд амалкардҳои мақомотро танқид мекард.

Ғуломиддин Сайфиддинов яке аз мутахассисони варзида ва муҳандисони соҳаи энергетика дар синни 79- солагӣ дар шаҳри Душанбе даргузашт. Ҳамсараш Дилбар Сайфиддинова рӯзи 1-уми июн ба Радиои Озодӣ гуфт, ки шавҳараш рӯзи 31-уми май фавтид ва шоми ҳамон рӯз ӯро дар оромгоҳи Сариосиёи Душанбе ба хок супурданд.

Хонум Сайфиддинова афзуд: “Аз бемории дил ранҷ мекашид. Аҳволаш вазнин шуд ба беморхонаи “Якум Советский” бурдем, аз шушашон якуним литр об гирифтанд. Баъдан табибон гуфтанд, хона баред, ки ин ҷо ягон касалии дигар нагиранд”. Баъди овардан ба хона, Ғуломиддин Сайфиддинов вафот кардааст. Дар бемористони мазкур умдатан гирифорони илтиҳоби шуш ва СОVID-19-ро муолиҷа мекунанд.

Муҳандиси варзидаи тоҷик, тақрибан 40 сол дар Вазорати энергетика, ширкати “Барқи тоҷик” ва дигар корхонаҳои бузурги Душанбе кор кардааст. Солҳои ахир бепарда аз камбудиҳои соҳаи энергетика ва кори ширкати “Барқи тоҷик”- ро танқид мекард, ки аз бузургтарин ширкатҳои давлатӣ ва қарздори Тоҷикистон аст. Пас аз чунин танқидҳо ӯро аз “Барқи тоҷик” ба нафақа фиристоданд, ҳарчанд мегуфт, ӯро барои ошкоргӯӣ аз кор ронданд.

Дилбар Сайфиддинова гуфт, ҳамсараш барои ошкорбаёнӣ озору азияти зиёд медид ва барояш мушкилиҳо сохта мешуд. Хонаи шахсии Сайфиддинов ба гуфтаи наздиконаш соли 1994 аввал ғорат ва баъдан тасарруф шуд. Ӯ то охири умр барои бозпас гирифтани хонааш саъй мекард, вале бенатиҷа. Солҳои охири умри худро Ғуломиддин Сайфиддинов дар манзили иҷора ба сар бурд.

Тазоҳуроти ҷонибдорони Алмосбек Отамбоев дар Бишкек

Норозиён ҳамчунин озодии сарвазири пешин Сафар Исҳоқовро низ талаб карданд.

Ҷонибдорони президенти пешин ва боздоштшудаи Қирғизистон Алмосбек Отамбоев дар назди додгоҳи ноҳияи Якуми майи шаҳри Бишкек эътироз мекунанд.

Ба иттилои хабарнигори бахши қирғизии Радиои Озодӣ аз маҳалли таҷаммуъ, дар назди додгоҳи Якуми май мухолифони Отамбоев низ бо талаби зиндонӣ кардани ӯ ҷамъ шудаанд.

"Раиси Бундёи "Мээр жазӣ" Иргалай Бекмуратова мегӯяд, "Отамбоев бояд барои ҷиноятҳое посух гӯяд, ки дар давраи президентияш анҷом додааст".

Вале ҷонибдори президенти пешини Қирғизистон раҳоии Отамбоев ва онҳоеро талаб доранд, ки ҳамроҳи ӯ боздошт шуда буданд. Вакили порлумони Қирғизистон Ирина Карамушкина гуфт, тазоҳуроти мухолифони Отамбоевро мақомот баргузор кардаанд.

Додгоҳи Якуми май имрӯз баррасии парвандаи ҳаводиси деҳаи Кой-Тошро идома медиҳад.

Рӯзҳои 7-8 августи соли гузашта дар деҳаи Кой-Тош "амалиёти иҷборан эҳзор кардани президенти пешини Қирғизистон ба бозпурсӣ" баргузор шуда, дар натиҷаи задухӯрди нерӯҳои пулис бо ҷонибдорони Отамбоев даҳҳо кас осеб диданд. Аз ҷумла, як афсари Кумитаи амнияти ин кишвар ҷон бохт.

Алмосбек Отамбоев дар ҳоли ҳозир дар боздоштгоҳи муваққатии Кумитаи амнияти Қирғизистон қарор дошта, ба ӯ то 26 соли зиндон таҳдид мекунад. Додситонии кулли Қирғизистон Отамбоевро дар чандин ҷинояти сангин, аз ҷумла дар робита ба ҳаводиси Кой-Тош, ғайриқонунӣ озод кардани соҳибнуфузи ҷиноӣ Азиз Батукаев, фасодкорӣ ва ғайра айбдор кард. Дар маҷмуъ нисбати Отамбоев 14 айб эълом шудааст.

Эрон гуфт, агар Венесуэла хоҳад, интиқоли нафтро идома медиҳад

Бовар меравад, ки панҷ нафткаши эронӣ ба Венесуэла бо арзиши 45,5 миллион доллар маҳсулоти нафтӣ интиқол доданд

Сухангӯи вазорати хориҷаи Эрон Аббос Мусавӣ гуфт, ки дар сурати дарёфти дархостҳои Венесуэла барои интиқоли бештари маводи сӯхт ба ин кишвари Амрикои Ҷанубӣ, омода аст ҳамкорӣ кунад. Ҳам Эрон ва ҳам Венесуэла дар заминаи додугурифтҳои нафтӣ таҳти таҳримҳои ИМА қарор доранд. Дар нишасти хабарии рӯзи 1 июн, ки дар як пахши зиндаи телевизионӣ намоиш дода шуд, Мусавӣ гуфт, ки “Эрон аз ҳуқуқаш дар заминаи тиҷорати озод бо Венесуэла истифода карда омода аст дар сурати дарёфти дархости Каракас захираҳои бештарро ба ин кишвар интиқол диҳад”. Дар ҳафтаҳои гузашта Эрон ба Венесуэла панҷ киштии ҳомили маводи сӯхтро интиқол дод. Венесуэла дар умқи бӯҳрони иқтисодӣ аз камбуди ин мавод азият мешавад.
ИМА ҳукуматҳо, бандарҳои баҳрӣ, ширкатҳои таъминкунандаву бимаро ҳушдор дод, ки дар сурати кӯмак карданашон ба нафткашҳои эронӣ онҳоро муҷозот мекунад. То кунун чор нафткаш ба обҳои Венесуэла ворид шуда, ба иттилои ширкати таҳлилии Refinitiv Eikon, ду ададаш аллакай дар роҳ ба Эрон қарор доранд. Баъди соли 2018 аз созиши ҳастаӣ бо Эрон хориҷ шудани ИМА бо як қарори президент Доналд Трамп, равобити миёни ИМА ва Эрон пуртаниш боқӣ мемонад. Ин созиш соли 2015 миёни Эрон ва шаш қудрати ҷаҳонӣ имзо шуд, вале Трамп гуфт, ки Эрон фаъолиятҳояш дар заминаи пуштибонӣ аз гурӯҳҳои ҷангҷӯ дар Ховари Миёнаро идома дода, вазъи амниятии минтақаро халалдор мекунад. Эрон ин иттиҳомотро рад кардааст.

Дар доираи табодули асирон дар Афғонистон садҳо кас озод шуд

Толибони раҳошуда аз зиндонҳои ҳукумати Афғонистон

Ҳукумати Афғонистон ва ҳаракати "Толибон" теъдоди нави асиронро табодул карданд. Ин табодул дар доираи созиши гуфтугӯҳои нави сулҳ сурат мегирад.

Табодули асирон - яке аз шартҳои созишномаи моҳи февралие аст, ки байни Амрико ва ҳаракати "Толибон" баста шуд. Дар он созишнома ҳамчунин омадааст, ҷангҷӯёни "Толибон" наздики 1000 сарбози ҳукуматиеро озод мекунанд, ки ба асорат гирифтаанд.

"Сар аз дирӯз ҳукумат 710 маҳбуси толибро аз зиндонҳо раҳо кард", - хабар дод Ҷовид Файсал, сухангӯи Шӯрои миллии амнияти Афғонистон рӯзи 30 май.

Аз замони ба имзо расидани созишномаи байни ИМА ва толибон Кобул дар маҷмуъ 2700 маҳбусро озод кардааст. Суҳайл Шоҳин, сухангӯи ҳаракати "Толибон" дар Қатар гуфт, рӯзи 30 май ҷангҷӯён 73 сарбози ҳукуматиро аз зиндон раҳо карданд. Ба гуфтаи вай, толибон дар маҷмуъ 420 сарбози неруҳои ҳукуматиро аз асорат озод кардаанд.

Вазирони собиқи Бритониё хостори иқдоми ҷиддитар дар робита бо Ҳонгконг шуданд

Эътирози сокинони Ҳонгконг дар ҳавои боронӣ ҳам идома дошт

Ҳафт вазири хориҷаи пешини Бритониё рӯзи 1 июн аз нахуствазир Борис Ҷонсон даъват карданд, ки як гурӯҳи ҷаҳонии назорат аз болои вазъ дар Ҳонгконг ва бархӯрди мақомоти Чин дар заминаи ташдиди назорат бар ин минтақаи нимамухторро таъсис диҳад. Қабули қонуни амнияти миллӣ дар ин минтақаи муҳими тиҷоратӣ аз ҷониби Чин мавриди нигаронии кишварҳои ғарбӣ шуд. Ин қонун, ки қонунгузории Ҳонгконгро сарфи назар мекунад, аз ҷониби мақомоти чинӣ ҳамчун зарурат барои мубориза бо “терроризм” ва “ҷудоиталабӣ” муҳим дониста шудааст.

Қонун бо вуҷуди ҳафт моҳ эътирозҳои сартосарии нирӯҳои демократӣ дар Ҳонгконг қабул шуд. Мухолифони ин қонун ҳарос доранд, ки акнун мақомот аз паи саркӯби дигарандешон шуда, мақоми мухторияти собиқ минтақаи мустаъмираи Бритониё барҳам мехӯрад. Соли 1997 Пекин баъди таҳти назорат даровардани Ҳонгконг ваъда дода буд, ки мақоми мухторияти Ҳонгконг ҳифз мешавад. Бритониё, ИМА, Австралия ва Канада бо нашри изҳороти муштарак нақшаи Пекинро ба боди танқид кашиданд, вале собиқ вазирони хориҷаи Бритониё аз Ҷонсон даъват ба амал оварданд,ки дунболи иқдомҳои сахттаре шавад.

Бародари вазири кори Қазоқистон бо моҷарои ришват барканор шуд

Kazakhstan - Birzhan Nurymbetov

Тимурҷон Нуримбетов, бародари Бирҷон Нуримбетов, вазири меҳнат ва ҳифзи иҷтимоии аҳолии Қазоқистон аз мақоми роҳбарии раёсати ҳамоҳангсозии шуғли аҳолӣ ва барномаи иҷтимоии вилояти Ҷамбули он кишвар истеъфо дод.

Истеъфои вай дар пайи як ҷанҷоли порагирӣ сурат гирифт.

Тимурҷон Нуримбетов 18 феврали соли ҷорӣ дар ин мақом таъйин шуда буд.

Расонаҳо миёнаҳои моҳи апрел хабар доданд, ки Тимурҷон Нуримбетов дар дарёфти пора дар ҳаҷми 22 ҳазор доллар гумонбар мешавад.

Тимурҷон бародари Бирҷон Нуримбетов, вазири меҳнат ва ҳифзи иҷтимоии аҳолии Қазоқистон аст. Вай соли 1966 дар вилояти Ҷамбил таваллуд шудааст. То ин замон дар мақомҳои мухталифи вилояти Ҷамбил кор мекард.

Қирғизистон ва Ӯзбекистон низои марзиро ҳамроҳ таҳқиқ мекунанд

Дар ин низоъ дар Сух се хона сӯзонда шуданд

Қубодбек Боронов, ноиби аввали сарвазири Қирғизистон ва Абдулло Орифов, сарвазири Ӯзбекистон мулоқот карданд.

Аз ҳукумати Қирғизистон хабар доданд, ҷонибҳо низои ахири марзии байни деҳаҳои Қирғизистону Ӯзбекистонро баррасӣ ва хостори таҳқиқи якҷояи ҳодисаи рухдода шуданд.

Ду мақомдори Ӯзбекистону Қирғизистон содиқ мондан ба созишҳои аз қабл ҳосилшударо ёдовар шуданд ва ҳамчунин ба ҷавобгарӣ ҷалб кардани омилони низоъро ваъда доданд.

Дар вилояти Бодканди Қирғизистон, ки бо ҷазирақаламрави Сӯхи Ӯзбекистон ҳаммарз аст, 31 май миёни сокинони ду кишвар низоъ сар зад. Ҷонибҳо ба самти якдигар санг ҳаво дода, чанд хона низ аз ҳар ду ҷониб сӯхт. Дар бораи захмиён низ хабар дода мешавад.

Дафтари матбуоти ҳукумати вилояти Ботканд хабар дод, ки муноқиша соати 12:30 байни сокинони деҳаи қирғизии Чечме ва сокинони маҳаллаи Чашмаи Сӯх бархостааст. Ба гуфтаи манбаъ, ҷанҷоли лафзӣ дар бораи онки чашма ба кӣ тааллуқ дорад, ба муноқишаву сангандозӣ ва хушунат печидааст.

Эътироз аз марги марди сиёҳпӯст боиси беназмиҳои бештар дар ИМА шуд

31 май, дар назди Кохи Сафед

Баъди марги марди сиёҳпӯсти бесилоҳ ҳангоми боздошташ аз ҷониби полис дар шаҳри Миннеаполиси аёлати Миннесота, эътирозҳо дар заминаи нобаробарии нажодӣ боло ва чандин шаҳри ИМА-ро фаро гирифт.

Дар муқобили Кохи Сафед дар Вашингтон дар боғи Лафайет аз субҳи 31 май мардум таҷаммӯъ ва эътироз мекунанд. Дар шиори эътирозгарон матнҳои мисли “ҳаёти сиёҳпӯстон муҳим аст”, “тир холӣ накунед” ва “бидуни адолат сулҳ намешавад” навишта шудааст.

Бархе эътирозгарон ба сӯи афсарони дар беруни Кохи сафед истода зарфҳои пластикӣ партофтанд. Баъди фарорасии шаб, вақте дасти кам ду ҳолати сӯхтор дар дохил ваё назди боғ мушоҳида шуд, полис аз гази ашковар ва норинҷакҳои нурзо (норинҷакҳое бо садои баланд) истифода кард, то ки мардум пароканда шавад.

Дар шаҳри Ню-Йорк ҳадди аққал як мошин оташ зада шуд ва ҳазорҳо нафар аз кӯчаву хиёбонҳо раҳпаймоӣ карда дар қароргоҳи полис дар минтақаи Таймс Сквер ба ҳамраъйии афроди аз ҷониби полис кушташуда лаҳзае сукут карданд.
Президент Доналд Трамп дар Твиттер навишт, ки гурӯҳи “Антифа”-ро, ки ҳамчун як ташаккули чапгаро қаламдод мешавад, созмони террористӣ эътироф мекунад. Бархе мақомоти федеролии ИМА ба ин бовар ҳастанд, ки ҳамин созмон дар пушти эътирозҳову бенизомиҳои ҷамъиятӣ қарор дорад.

Сарвазири Арманистон ба коронавирус мубтало шуд

Никол Пашинян, сарвазири Арманистон. 27 май, 2020.

Никол Пашинян, сарвазири Арманистон мубталои коронавирус шуд. Дар ин бора вай дар саҳифаи "Фейсбук" хабар дод.

Пашинян гуфт, ки аъзои хонаводааш ҳам ба ин вирус мубтало шудаанд. Айни ҳол бемории вай бидуни ҳарорат пушти сар мешавад, аммо Пашинян фаъолияташро фосилавӣ идома хоҳад дод.

Дар Арманистон 9 282 ҳолати мубталоӣ ба коронавирус ва 131 ҳолати марг аз КОВИД-19 сабт шудааст.

Сар аз 16 март дар Арманистон ҳолати фавқулода эълом шудааст, ахиран ин ҳолатро то 13 июн тамдид карданд. 18 май дар кишвар нақлиёти ҷамъиятӣ ба гардиш даромада, аммо мусофирон вазифадоранд, ки дастпӯш ва ниқоб пӯшанд. Марказҳои тиҷорӣ ҳам боз шуданд, вале нуқтаҳои ғизои умумӣ ҳамоно баста боқӣ мондаанд.

Маскав маҳдудиятҳои иҷтимоиро кам мекунад, Бразилия нуқтаи доғ боқӣ мемонад

31 май, майдони Сурхи Маскав

Баъди ду моҳи маҳдудиятҳо шурӯъ аз 1 июн дар Маскав марказҳои тиҷоратӣ, боғҳо ва тиҷоратҳои хурди мисли хадамоти либосшӯӣ дубора боз шуданд. Ин тасмим баъди як изҳороти президенти Русия Владимир Путин гирифта шуд, ки то ҳол 405 ҳазор нафарро сироят ва ҷони 4700 нафарро гирифтааст. Мардум ҳақ доранд барои кӯтоҳмуддат, масалан, барои харид ваё зарурати корӣ бар асоси иҷозати махсус берун бароянд. Бо ин вуҷуд мақомоти Маскав мегӯянд, тарабхонаву кафе ва толорҳои синамо феълан баста боқӣ мемонанд ва то 14 июн - замони побарҷо мондани қоидаҳои карантин баргузории маъракаҳои серҷамъият манъ аст. Маҳдудиятҳои иҷтимоӣ дар Маскав, мисли дигар нуқоти ҷаҳон, аз моҳи март шурӯъ мешавад. Айни замон дар Маскаву дигар манотиқи Русия як қишри аҳолӣ аз бекоршавии сареи қоидаҳои карантин норозӣ ҳастанд ва аз афзоиши якбораи ҳодисаҳои нави олудагӣ ҳарос доранд.
Ин дар ҳолест, ки шумори олудашудаҳо дар саросари ҷаҳон аз 6,1 миллион нафар гузашта, дар Бразилия ҳодисаҳои марг дар ҳоли афзоиш аст. Дар Бразилия, ки аз назари олудагии аҳолиаш ба ҷои дуюм дар ҷаҳон баромадааст, 515 ҳазор сироятшуда ва 29 ҳазор ҳолати марг сабт шудааст.

Талоши худсӯзии як зани узбекистонӣ баъди тахриби манзилаш

Як сокини 38-солаи вилояти Навоии Узбекистон баъди тахриби манзилаш, талош кард, назди бинои мақомоти маҳаллӣ худро оташ занад. Рӯзи 28-уми май дар шабакаҳои иҷтимоӣ навори ин зан нашр шуд.

Мақомоти вилояти Навоӣ гуфтанд, зан худро оташ назада, балки танҳо таҳдиди худсӯзӣ кардааст.

"Наздик набиё, ман худро месӯзонам, бигзор ҳоким назди ман ояд. Ман бе хона мондам, бе сарпаноҳ мондам", -мегӯяд ин зан дар навори нашршуда.

Афроди огаҳ аз қазия гуфтанд, мақомот манзили ин занро, ки аз 300 метри мураббаъ иборат буд, рӯзи 25-уми май тахриб карданд.

Ба гуфтаи мақомот, манзили ин зан ғайриқонунӣ бунёд ва ба ҳамин далел тахриб шуд.

Дар Узбекистон пештар аз ин ҳам ҳодисаҳои шабеҳ рух додааст. Чанде аз сокинон баъди тахриби хонаҳояшон худсӯзӣ ва ё таҳдид ба худсӯзӣ кардаанд.

Ҳомиёни ҳуқуқ аз Туркманистон хостанд, сарояндаи ҳамҷинсгароро озод кунад

Дидбони Ҳуқуқи Башар ва ё Ҳюман Райтс Вотч (HRW) мақомоти Туркманистонро ба озод кардани сарояндаи маъруф ва шариконаш даъват кард, ки ба гуфтаи созмон, ба хотири ҳамҷинсгароӣ зиндонӣ шудаанд. HRW мегӯяд, додгоҳи Туркманистон 7 май ҳунармандро ба бачабозӣ айбдор ва ду сол аз озодӣ маҳрум кардааст.

Расонаҳо пештар хабар дода буданд, ки сароянда ва муҷрии машҳури туркман Г.С. миёнаҳои моҳи марти соли равон дар шаҳри Ишқобод ҳамроҳи ҳудуди даҳ нафари дигар, аз ҷумла "дӯстписараш" бо айби ҳамҷинсгароӣ дастгир шудааст. Бархе аз боздоштшудаҳо дертар озод шуда, тафтишот нисбати боқимондаҳо, аз ҷумла Г. С. идома дошт.

Дар миёни боздоштшудаҳо дар авввал афроди машҳур дар шоу-бизнес ва мӯди Туркманистон низ будааст. Вале ба далели ахлоқӣ аз зикри номи онҳо, ки дасти кам се нафарашон маълуманд, худдорӣ мешавад.

Дар Туркманистон барои ҳамҷинсгароӣ ба ҷавобгарии ҷиноӣ мекашанд.

Теъдоди гирифторони COVID-19 дар Тоҷикистон аз 3900 нафар гузашт

Вазорати тандурустии Тоҷикистон гуфт, дар шабонарӯзи гузашта 123 каси дигар ба COVID-19 гирифтор шудаанд ва то рӯзи 31-уми май теъдоди умумии беморон ба 3930 нафар расид. Ба иттилои расмӣ, 2004 кас шифо ёфтааст ва теъдоди фавтидагон тағйир наёфтааст ва ба 47 нафар мерасад.

Мутахассисон ва теъдоди зиёде аз мардум ба дурустии омори расмӣ шубҳа доранд ва мегӯянд, мумкин аст, теъдоди гирифторону талафот аз беморӣ дар Тоҷикистон зиёд бошад. Ҳамарӯза дар шабакаҳои иҷтимоӣ доир ба марги фарде дар ин ё он гӯшаи кишвар гузориш мерасад ва корбарон ҳам менависанд, ки он фард бар асари бемории илтиҳоби шуш ва ё "коронавирус" вафот кардааст. Бар асоси феҳрасти ғайрирасмӣ дар Интернет шумори ҷонбохтагон аз коронавирус ва "илтиҳоби шуш" бештар аз 300 нафарро ташкил медиҳад. Ин феҳрастро бар асоси хабари расонаҳо, шабакаҳои иҷтимоӣ ва иттилои наздикони фавтидагон таҳия мекунанд.

Вазорати тандурустӣ ва ҳифзи иҷтимоии аҳолӣ дар баёнияи расмӣ дар вебсайташ ҳамчунин навиштааст, “то имрӯз, 31 майи соли равон дар мамлакат 1886 нафар зери назорати табибон қарор дошта, дар як шабонарӯзи охир 377 нафар пас аз шифо ёфтан ба хонаҳояшон рухсат дода шудаанд.” Ҳайати Созмони Ҷаҳонии Тандурустӣ, ки вазъи густариши бемории COVID-19 ва маргумир аз ин беморӣ дар Тоҷикистонро арзёбӣ мекард, рӯзи 12-уми май гуфт, суръати густариши беморӣ нигаронкунанда аст.

Вазорати тандурустӣ мегӯяд, ки ҳукумат ва вазорат тамоми чораҳоро барои пешгирӣ аз CОVID-19 ва табобати беморон меандешад. Коронавируси нав, ки охири соли гузашта дар шаҳри Вуҳани Чин кашф шуд, то кунун ба беш аз 5 миллион нафар дар саросари ҷаҳон сироят карда, беш аз 300 ҳазор касро куштааст.

Арабистони Саудӣ 90 ҳазор масҷидро барои ибодат боз кард

Намозгузорӣ дар Масҷиди Макка дар шаби Лайлатулқадр. 19-уми майи соли 2020

Баъд аз ду моҳи танаффус ҳукумати Арабистони Саудӣ дари ҳазорон масҷид дар саросари кишварро барои намозгузорон боз кард. Айни замон ба мардум дастур шудааст, барои эмин мондан аз сирояти коронавирус, меъёрҳои сахти беҳдоштиро риоят кунанд. Шаҳри Макка, зиёратгоҳи мусулмонон ба рӯи мардум баста мемонад.

Масҷид-ул-Ақсо дар Байтулмуққадас, ки баъд аз Маккаву Мадина саввумин макони муқаддас барои мусулмонон ба ҳисоб меравад, боз шуд. Ин масҷидро моҳи март бастанд. Дар Арабистони Саудӣ 90 ҳазор масҷидро баъд аз поксозӣ аз вирусу микробҳо бо маводи зиддиуфунӣ боз карданд.

Вазорати умури исломӣ гуфт, ба мардум миллионҳо паёмак фиристода ва огаҳ кардааст, ки ҳангоми ибодат ва намозҳои дастаҷамъӣ меъёрҳои беҳдоштиро рияот кунанд. Аз ҷумла фосилаи думетриро нигаҳ доранд, ҳамеша ниқоби тиббӣ дошта бошанд ва вақти салом кардан ба ҳам даст надиҳанд.

Дар Афғонистон 710 зиндонии дигари Толибро озод карданд

900 Толибро рӯзи 26-уми май озод карданд.

Дар остонаи музокироти сулҳ барои поён додан ба ҷанги 18-сола ҳукумати Афғонистон ва Толибон теъдоди дигаре аз зиндониёну асиронро озод кардаанд. Ҷовид Файсал, сухангӯи Шӯрои Амнияти Миллии Афғонистон рӯзи 30-уми май гуфт: “Ҳукумат 710 зиндонии Толибро дар рӯзҳои гузашта аз зиндонҳои Пули Чархӣ ва Парвон ва зиндонҳо дар дигар вилоятҳои кишвар озод кардааст.”

Дар маҷмӯъ баъди имзои аҳдномаи Амрикову Толибон дар моҳи феврал, ки бахше аз он раҳо кардани зиндониёну асирон аст, ҳукумати Афғонистон 2700 зиндонии Толибро раҳо кардааст. Суҳайл Шоҳин, сухангӯи дафтари сиёсии Толибон дар Қатар рӯзи 30-уми май гуфт, ки онҳо 73 маъмури амниятии ҳукуматро дар вилоятҳои Балх, Қундуз, Лугар, Пактиё, Хӯст ва Пактико озод кардаанд. Ба қавли ӯ, то кунун Толибон 420 намояндаи ҳукуматро аз асорати худ раҳо кардаанд.

Фазонаварди амрикоӣ ба Истгоҳи Байналмилалии Кайҳонӣ мепайвандад

Фазонавард рӯзи 30-уми май ба кайҳон партоб шуд.

Интизор меравад, имрӯз як фазонаварди хусусӣ, ки ду кайҳоннаварди амрикоиро, ба Истгоҳи Байналмилалии Кайҳонӣ бурд, 31-уми май ба ин истгоҳ насб шавад. Доф Ҳарли ва Боб Бенкен то чанд соати дигар ба истгоҳе, ки 400 километр дуртар аз курраи Замин давр мезанад, ворид мешаванд ва чаҳор моҳ онҷо мемонанд.

Кайҳоннавардони амрикоӣ, ки аз Маркази Кайҳоннавардии Кеннедӣ дар аёлати Флорида рӯзи 30-уми май парвоз карданд, ба ду кайҳоннаварди рус ва як амрикоӣ мепайванданд. Бори аввал аст, ки тақрибан 10 соли ахир фазонаварди Амрико ба Истгоҳи Байналмилалии Кайҳонӣ парвоз мекунад. То ҳол кайҳоннавардони амрикоиро, фазонавардҳои Русия ба истгоҳи байналмилалӣ мебурданд.

Доналд Трамп, раиси ҷумҳури Иёлоти Муттаҳида, ки шоҳиди партоби фазонавард буд, гуфт, ки ин кор мояи ифтихори амрикоиҳо шуд ва изҳори умедворӣ кард, ки парвози фазонавард рӯҳияи амрикоиҳоро дар ин замони душвори пандемияи коронавирус ва нооромиҳои ахир боло мебарад.

Генерали бознишастаи тоҷик дар Кӯлоб даргузашт

Абдулваҳҳоб Искандаров

Абдулваҳҳоб Искандарзода, як генерали собиқ ва бознишастаи тоҷик ва аз раҳбарони пешини Раёсати умури дохилӣ дар вилояти Бадахшон дар синни 63-солагӣ даргузашт ва сабаби марги ӯро низ бемории СОVID-19 медонанд. Яке аз ҳамкорони Искандарзода рӯзи 31-уми май ба Радиои Озодӣ гуфт: “Қариб 15 рӯз дар хона бемор буд ва имшаб соатҳои 10 ба 11 шаб даргузашт. Бемории дил ҳам доштанд ва табобат мегирифтанд.” Ӯ дар шаҳри Кӯлоб зиндагӣ мекард.

Ба қавли мусоҳиби Радиои Озодӣ, зоҳиран вируси нав ба Абдулваҳҳоб Искандарзода ҳангоми ширкат дар маросими дафни бародараш Абдусалом Искандарзода, сардори собиқи Раёсати Бозрасии давлатии автомобилӣ дар минтақаи Кӯлоб сироят кардааст. Ин афсари тоҷик тақрибан ду ҳафта пеш даргузашт. Абдулваҳҳоб Искандарзодаро соати шаши субҳи 31-уми май дар оромгоҳи рақами 2 дар Кӯлоб дафн кардаанд.

Табибон доир ба сабабҳои марги генерали тоҷик чизе нагуфтаанд. Абдулваҳҳоб Искандарзода охири соли 2014 сардори Раёсати вазорати корҳои дохилӣ дар Вилояти Мухтори Кӯҳистони Бадахшон таъин шуда, моҳи августи соли 2017 рутбаи генералиро гирифта буд. Баъди танқидҳои президент Эмомалӣ Раҳмон дар мавриди риоят нашудани тартиботи ҷамъиятӣ дар вилоят моҳи сентябри соли 2018 аз ин мақом барканор шуд ва то як сол пеш муовини сардори Раёсати корҳои дохилаи вилояти Хатлон буд.

Шумори гирифторони COVID-19 дар Тоҷикистон аз 3800 гузашт, омори талафот бетағйир аст

Акс аз бойгонӣ

Вазорати тандурустии Тоҷикистон гуфт, дар шабонарӯзи гузашта 121 каси дигар ба коронавируси нав гирифтор шуданд ва шумори умумии беморон то 30-юми май ба 3807 нафар расид.

Мақомот мегӯянд, то ин дам беш аз 1800 нафар аз бемории ҳамагир шифо ёфтаанд.

Ба иттилои расмӣ дар чаҳор рӯзи гузашта касе аз коронавируси нав нафавтидааст. Теъдоди расмии ҷонбохтагон аз ин беморӣ дар Тоҷикистон 47 нафар аст, вале дар феҳрасти ғайрирасмӣ дар Интернет шумори ҷонбохтагон аз коронавирус ва "илтиҳоби шуш" то 30-уми май зиёда аз 360 кас ҳисоб шудааст.

Ин феҳрастро бар асоси хабари расонаҳо, шабакаҳои иҷтимоӣ ва иттилои наздикони фавтидагон таҳия мекунанд. Мақомот рӯйхати алтернативиро қабул надоранд ва дастрасӣ ба онро дар ҳудуди кишвар масдуд кардаанд.

ХАБАРУ ГУЗОРИШҲОИ БЕШТАРРО ДАР БОРАИ КОРОНАВИРУС ДАР ТОҶИКИСТОН ДАР ИНҶО БИХОНЕД

САҲА аз мамнуъ шудани сомонаи "Ахбор" дар Тоҷикистон нигаронӣ кард

Дерлим Ҳезир, намояндаи Созмони Амнияту Ҳамкории Аврупо дар умури озодии матбуот, аз қарори Додгоҳи олии Тоҷикистон барои бастани сомонаи "Ахбор" дар ҳудуди кишвар ҷиддан ибрози нигаронӣ кард.

Вай 29-уми май дар изҳороте гуфт, "аз маҳдуд кардани дастрасӣ ба сомонаи хабарии "Ахбор" дар қаламрави Тоҷикистон изҳори нигаронӣ мекунам."

Дерлим Ҳезир афзуд, "ба сурати давомдор масдуд кардани сомонаи хабарӣ дар Интернет нақзи ҷиддии озодии баён буда, аз чорчӯби дархости аз сомона бардоштани матлаби мушаххас хеле фаротар меравад. Ёдовар мешавам, ба назар гирифтани асли таносуб ҳангоми қабули ҳар гуна қарори марбут ба озодии матбуот муҳим аст."

Додгоҳи олии Тоҷикистон дар оғози имсол сомонаи мустақили "Ахбор"-ро, ки қароргоҳаш дар шаҳри Прага аст, ба рӯйхати вебсайтҳои мамнуъ дар кишвар ворид кард.

Мақомот торнаморо ба он айбдор карданд, ки гӯё ба созмонҳои дар Тоҷикистон мамнӯи наҳзати исломӣ ва Паймони миллӣ, эътилофи чаҳор созмони мухолифин дар Аврупо, "хидмат мекунад".

Мирзои Салимпур, муассис ва сардабири “Ахбор”, гуфт, сомонаи зери раҳбарии ӯ ба ҳеч созмон ё ниҳоде тааллуқ надорад ва бастанаш "як амали ғайриқонунӣ ва ҳамлаи рӯйирост ба озодии матбуот аст".

Мақомоти Додгоҳи олӣ гуфтанд, қарор дар бораи бастани ин сомонаҳо рӯзи 18-уми феврал содир шуда, аз 19-уми март ба иҷро даромадааст.

Созмонҳои байнулмилалӣ чанд сол боз Тоҷикистонро ба саркӯби дигарандешон ва маҳдудияти озодии баён танқид мекунанд.

Сомонаи "Ахбор" моҳи ноябри соли 2016 дар маркази Ҷумҳурии Чех ба кор оғоз карда, хабарҳои марбут ба Тоҷикистону минтақаро бе парда бозтоб медиҳад. Мирзои Салимпур мегӯяд, дар муддати фаъолияти тақрибан чаҳорсолаи сомона хабару гузоришҳои нашркардаи онҳоро беш аз 20 миллион бор дидаанд. Сомона беш аз ду сол дар Тоҷикистон дастнорас буд.

Генерал Ҳэдфилд гуфт, ҳавопаймоҳои ҷангии Русия дар Либия нишастанд

Тасвирҳои поин омадани ҳавопаймоҳои ҷангии Русия дар Либия

Маркази фармондеҳии Амрико дар Африқо иддаои Маскавро рад кард, ки гӯё ҳавопаймоҳои ҷангии ин кишвар дар Либия ҷойгир нашудаанд.

Генерал Грегори Ҳэдфилд гуфт, бар асоси назорати Иёлоти Муттаҳида, 14 ҳавопаймои ҷангии навъи МиГ-29 ва Су-24 пас аз парвоз аз Русия дар пойгоҳи ҳавоии Ал-Ҷуфра дар Либия нишастанд.

Ин пойгоҳ дар ҳоли ҳозир аз муҳимтарин марказҳои Халифа Ҳафтар, фармондеҳи Артиши Миллии Либия ба шумор меравад.

Муовини фармондеҳи Маркази фармондеҳии Амрико дар Африқо рӯзи 29-уми май ба хабарнигорон гуфт, фаъолиятҳои Русия дар Либия ва пуштибониаш аз нирӯҳои Халифа Ҳафтар “нигаронкунанда” аст.

Иёлоти Муттаҳида ва ҷомеаи байнулмилалӣ ҳукумати Либияро, ки машғули набард бо артиши худхондаи Либия аст, ба расмият мешиносанд.

Русия мегӯяд, бо ҳамаи ҷонибҳои дахил дар ҷанги дохилии Либия дар тамос аст, то буҳрони ин кишвар бо гуфтугӯ ҳаллу фасл шавад.

Ёфтҳои бештар

XS
SM
MD
LG