Пайвандҳои дастрасӣ

Хабари нав

Хабарҳо

Бадшавии вазъи озодии матбуот дар Тоҷикистон

Тибқи гузориши созмони байнулмилалии «Freedom House» барои соли 2007, дар Тоҷикистон вазъи озодии матбуот бадтар шудааст. Дар байни 195 кишвари ҷаҳон, ки сатҳи озодии матбуоти онҳо мавриди таҳқиқи ин созмон қарор гирифтааст, Тоҷикистон дар 166-ум зина ҷой дода шудааст. Ин мавқеъ назар ба гузориши соли гузаштаи «Freedom House» як зина поинтар аст. Ин дар ҳолест, ки Афғонистон аз рӯи ин нишондод беш аз даҳ зина болотар аз Тоҷикистон қарор гирифтааст, яъне озодии матбуот дар ин кишвар ба маротиб беҳтар будааст. Дар поинтарин зинаҳои рӯйхати «Freedom House» Узбакистон ва Туркманистон ҷой гирифтаанд.

Ҳамаи хабарҳои имрӯзро дар инҷо бихонед

Фаъолон гуфтанд, “ба хотири фишор ба сунниҳо” як масҷиди тоза сохташудаистода дар Эрон тахриб шуд

Эроншаҳр. Макони масҷиде, ки тоза бунёд мешуд ва бо тасмими мақомот, тахриб карда шуд

Фаъолони балучӣ гуфтанд, ки мақомоти эронӣ як масҷидеро, ки дар ҳоли сохта шудан дар Эроншаҳри вилояти Сиистон ва Балучистон буд, “ба хотири фишор ба аҳли суннат” тахриб карданд. Ташаббуси Балучиҳои Аврупо бо нашри изҳороте гуфт, ки тахриби зербинои масҷид 23-юми январ рух дод, ҳарчанд ин муассиса тамоми иҷозатномаҳои лозимии мақомотро гирифта буд. Вале шаҳрдори Эроншоҳ Нураҳмад Дархуш ба оҷонсии IRNA гуфт, ки сохтмон иҷозатнома надошт. IRNA гуфт, ки макони бунёди масҷид ҳамчун майдони боз барои намозгузорон сабтином шуд ва “бар асоси қонунҳо, шифти болояш набояд сохта мешуд”.

Дар ин гузориш омадааст, ки Эроншаҳр – макони зисти аксар қавми балуч - 500 масҷиди аҳли суннат дошта, 80 масҷидаш барои намозгузорони шиамазҳаб хидмат мекунад.

Фаъолони балуч гуфтанд, ки мақомот дар чанд ҳафтаи гузашта сохтмони ду масҷиди дигари аҳли суннатро дар минтақа қатъ карданд. Онҳо гуфтанд, ки қарори мазкур зери фишори намояндагони Раҳбари олии Эрон Алии Хоманеӣ ва вазорати иттилоот гирифта шудааст.

Дар гузашта ҳам аққалиятҳои қавмиву динӣ аз фишор ва табъйизи давлат шикоятҳо кардаанд.
Моҳи январ дар номааш ба номи Оятулло Хоманеӣ раҳбари маъруфи сунниҳои Эрон Мавлоно Абдулҳамид аз он чи ки, ба гуфтааш, “бархӯрди табъизомез нисбати сунниҳо” номид, интиқод кард. Ӯ гуфт, “42 сол баъди ғалабаи Инқилоби исломӣ, сунниҳои Эрон ҳамоно бо мушкилот ва нигарониҳо дар заминаи ҳуқуқи маданӣ рӯбарӯ ҳастанд” ва афзуд, ки сунниҳо дар Эрон “шаҳрвандони дараҷаи ду” мебошанд.

Оятулло Орифй, раиси маъракаи фаъолони Балуч дар сӯҳбат бо шабакаи Би-Би-Си гуфт, ки дар ду моҳи гузашта гурӯҳи онҳо ҳодисаҳои қатли 16 узви ин ҷомеаро сабт кардаанд.

Маркази ҳуқуқи башари Эрон, воқеъ дар Ню-Йорк моҳи декабр гузориш дод, ки дар Сиистон ва Балучистон ҳукми қатли 3 зиндонии балуч ба иҷро даромад. Ин афродро барои узвият дар гурӯҳҳои ҷангҷӯи суннимазҳаб гунаҳгор карданд, ки дар гузашта дар Эрон ҳамлаҳо анҷом додаанд.

Мустафо Нилӣ, як ҳомии ҳуқуқи башар дар сӯҳбат бо ҳафтаномаи “Эътимод” 18-уми декабр гуфт, ки дастикам 10 зиндонӣ дар маҳбаси Зоҳидон ба марг маҳкум шудаанд ва онҳоро дар фаъолиятҳои оппозитсионӣ зидди Ҷумҳурии Исломӣ гунаҳгор мекунанд. Фаъолони ҳуқуқ гуфтанд, ки дар ду ҳафтаи гузашта дар шаҳру манотиқи мухталифи Эрон 50 фаъоли курдтабор бо иттиҳоми номаълум боздошт шудаанд. Кова Кирмоншоҳӣ, сухангӯи Шабакаи ҳуқуқи башари Курдистон дар сӯҳбат бо Радио Фардо гуфт, ки бовар дорад дар пушти ин ҳама саркӯбҳо Сипоҳи посдорони инқилоби исломӣ истодааст. Кирмоншоҳӣ гуфт, ки “аксари боздоштшудаҳо фаъолони сиёсиву маданӣ, фарҳангӣ ва муҳитзистӣ, ҳатто фаъолони ҳунар мебошанд ва танҳо шумори ками онҳо шаҳрвнадони қаторӣ ҳастанд”. Айни замон, ӯ гуфт, ки далели боздошту фишорҳои охирро намедонад ва изҳори нигаронӣ кард, ки ба боздоштшудаҳо ба хотири эътирофҳои маҷбурӣ фишор хоҳанд овард.

СММ ба кормандонаш гуфт, ба ҳавопаймоҳои покистонӣ нанишинанд

Исломобод, фурудгоҳи байналмилалии "Беназир"

СММ ба кормандонаш ҳушдор дод, ки аз хидмати ҳавопаймоҳои сабтшудаи покистонӣ истифода накунанд, чун, ба хулосаҳои ин ниҳод, бархе халабонҳои покистонӣ ихтисоси худро дуруст намедонанд. Дар як ҳушдоре ба номи кормандони СММ, ки 23-юми январ матнашро матбуоти покистонӣ дарёфт кардааст, Идораи СММ оид ба мудирияти низомҳои амн (UNSMS) гуфтааст, дар паи тафтиши иҷозатномаҳои шубҳаноки парвоз машварат медиҳад, ки ба ҳангоми “истифода аз операторҳои сабтшудаи покистонӣ эҳтиёт ба кор бурда шавад”. Санаи нашри ин ҳушдор маълум нест.

Моҳи июни соли 2020 Покистон эълон кард, ки дар паи садамаи ҳавопаймое, ки бо марги 97 нафар анҷомид, санҷише барпо ва 262 халабон дар нақзи талаботи имтиҳонсупорӣ гумонбар дониста шуд. Машварати СММ ба ин маъност, ки ҳатто дар сурати парвоз дар дохили кишвар кормандони СММ бояд аз нишастан ба ҳавопаймоҳои маҳаллӣ худдорӣ кунанд.

Оҷонсии The News-и Покистон менависад, ки кормандони СММ метавонанд аз ҳавопаймоҳои Сомон-Эйр-и Тоҷикистон, Kam Air-и сабтшуда дар Афғонистон ва “Узбекистон ҳаво йуллари” истифода кунанд.

Дар даҳ соли гузашта чор ҳавопаймои сабтшудаи покистонӣ суқут карда, боиси кушта шудани 450 мусофир ва ҳайати халабонҳо шуданд.

Моҳи маи порсол ҳавопаймое, ки аз Лоҳур ҳаракат мекард, дар як минтақаи аҳолинишини Карочӣ суқут кард. Собиқ вазири умури ҳавопаймоӣ Ғулом Сарвархон он замон гуфт, ки сабаби фоҷеа иштибоҳи инсон буда, пилот ё халабон аз рӯи муқаррарот амал накард.

Рогозин гуфт, Facebook саҳифаашро муваққатан баст

Дмитрий Рогозин - раҳбари Роскосмос

Раҳбари баҳсбарангези идораи коиноти Русия Дмитрий Рогозин гуфт, ки ширкати Facebook як рӯз баъди раддубадалҳои хашини ӯ бо Майкл Макфол, собиқ сафири ИМА дар Маскав саҳифаи ӯро муваққатан баст. 23-юми январ, замоне, ки ҳазорҳо сокини Русия дар саросари ин кишвар бидуни ҳарос аз боздошт бо талаби озод кардани раҳбари мухолифон Алексей Навалний ба хиёбонҳо рехтанд, Макфол дар саҳифаи худ дар Твиттер назарҳои худро баён кард. Макфол ҷасорати эътирозгарони рус дар муқобили президент Владимир Путинро ситоиш кард ва хашми бисёр сокинони дигари Русия, аз ҷумла Рогозинро барангехт, ки талош намуданд эътирозгарони ватаниро бо кори ниҳодҳои қудратии амрикоӣ ба ҳангоми бархӯрд бо хушунатҳои Капитол дар таърихи 6-уми январ қиёс кунанд. Рогозин гуфт, ки ИМА бояд аввал мушкилоти дохилии худро ҳал кунад ва ба дигар кишварҳо машварат надиҳад. Ӯ инчунин ИМА-ро дар мудохила ба умури Русия айбдор кард, вале ҳеҷ далеле наовард. Айни чунин изҳориназарҳои Рогозин дар Фейсбук баъдан боиси баста шудани саҳифааш гардид.

160 эътирозгари беларусӣ боздошт шуд

23 январ, Минск. Дар як навиштаҷоти эътирозгарон омадааст: "Игор Лосик 40 рӯз аст гуруснанишинӣ мекунад"

Дар намоишҳои эътирозии Беларус рӯзи 24-уми январ тахминан 160 нафар боздошт шуд. Ин мардум бо талаби истеъфои Александр Лукашенко, ки августи соли 2020 гуфт, дар интихоботи президентӣ пирӯз шудааст, ба хиёбонҳо баромада буданд. Эътирозгарон дар шиорҳои рӯзи якшанбеи худ инчунин ба зиндонии сиёсӣ Игор Лосик ҳамраъйӣ баён карданд. Ӯ аз миёнаҳои моҳи декабр ба ин сӯ ба нишони эътироз даст ба гуруснанишинӣ задааст. Лосик як блогнависи маъруф ва мушовири Радиои Озодӣ дар масоили фанновариҳои нави матбуотӣ - охири моҳи июн бо иттиҳоми кӯмак дар беназмиҳои ҷамъиятӣ боздошт шуд. Аз рӯи ин иттиҳом то се соли ҳабс пешбинӣ мешавад. 15-уми декабр ӯро иловатан барои кӯмак дар беназмиҳои ҷамъиятӣ гунаҳгор карданд, ки баъди интихоботи пурбаҳси 9-уми август тамоми Беларусро фаро гирифт. Лосик баъди эълони иттиҳоми нав даст ба гуруснанишинӣ зад. Ӯро дар боздоштгоҳи Окрестинаи воқеъ дар канори Минск нигоҳ медоранд. Ба қавли Amnesty International, ин муассиса “ҳаммаънои шиканҷа” мебошад. Собиқ боздоштшудаҳо, ки дар ин муассиса нигаҳдорӣ шудаанд, мегӯянд, ки нозирони боздоштгоҳи Окрестина боздоштшудаҳоро бераҳмона мезананд. Рӯзи 24-уми январ аз намоишҳои эътирозии бетанаффуси сокинони Беларус баъди интихоботи президентӣ 170 рӯз пур шуд ва дар 30 соли раҳбарии Лукашенко ин бӯҳрони бесобиқаи сиёсӣ мебошад.

Маҷлиси намояндагон дар мавзӯи "таҳрики шӯриш" аз ҷониби Трамп тасмим мегирад

20-уми январ, Вашингтон. Доналд Трамп бар хилофи анъанаҳо, дар маросими савгандёдкунии президенти баъдӣ Ҷо Байден иштирок накард ва пеш аз ин маросим ба хонааш дар аёлати Флорида парвоз кард.

Рӯзи 25-уми январ Маҷлиси намояндагони зери назари демократҳои ИМА қарор аст собиқ президент Доналд Трампро расман дар “таҳрики шӯриш” муттаҳам бикунад. Ин иттиҳом, ки бештар хусусияти расмӣ дорад, баъдан ба баррасии Сенат ирсол мешавад ва додситонҳо талош мекунанд бо дарёфти раъйи зарурӣ Трампро аз талоши дастёбӣ ба мансаби президентӣ дар оянда боздоранд. Рӯзи 13-уми январ, як ҳафта пеш аз тарки мақом кардани Трамп, Маҷлиси намояндагон бо тарафдории 232 нафар ва мухолифати 197 вакил ба импичменти Трамп розӣ шуд. Барои эълони иттиҳом дар нисбати Трамп ба сенаторҳои демократ мувофиқати 17 вакили ҷумҳурихоҳ кифоят мекунад. Вале бовар намеравад, ки ин кор амалӣ шавад. Дар шарҳи талоши эълони иттиҳом ба Трамп ҳодисаҳои 6-уми январи соли ҷорӣ дар Конгресс тасвир шудаанд, вақте издиҳоми тарафдорони Трамп ба бинои Капитол ҳамла карда даст ба беназмиҳо заданд ва дар ин ҳодисаҳо 5 нафар кушта шуд. Трамп нахустин президенти ИМА шуд, ки дар замони раҳбариаш ду дафъа импичмент шуд ва аввалин касест, ки баъди тарки қудрат метавонад дар додгоҳ посухгӯ шавад. Хушунат дар ҳоле бархост, ки Трамп натиҷаҳои интихоботи президентии 3-юми ноябри порсолро эътироф накард ва бидуни далел гуфт, ки натиҷаҳо “тақаллуб” шудааст. Трамп пеш аз ҳамлаи издиҳом ба Конгресс хитоб ба тарафдоронаш гуфт, “мисле, ки ҷаҳаннам бошад, биҷангед”. Дар ҳоле, ки ҳамон рӯз бисёр ҷумҳурихоҳҳо Трампро интиқод карданд, танҳо чанд нафар ба маҳкум кардани президенти ҳамоно маҳбуб дар миёни як қишри мардум ва аъзои ҷумҳурихоҳҳо изҳори омодагӣ кардааст. Онҳо мегӯянд, мурофиаи додгоҳӣ боиси ҷудоиандозӣ мешавад ва дурустии тасмими муҳокимаи ӯ баъди аз қудрат рафтани президентро зери суол бурданд.

Дар таркиши балони газ дар Панҷакент 12 нафар захмӣ шуданд

Шаҳри Панҷакент. Акс аз бойгонӣ.

Дар натиҷаи таркидани як балони газ дар чойхонаи "Самарқанд" дар шаҳри Панҷакент 12 нафар ҷароҳат бардошта, ба бемористон расонда шудаанд. Мақомот мегӯянд, дар ин ҳодиса касе нобуд нашудааст.

Дафтари матбуоти Вазорати корҳои дохилии Тоҷикистон хабар дод, ки ҳодиса пеш аз чоштгоҳи рӯзи душанбе, 25-уми январ руй додааст. Ба гуфтаи сарчашма, сокини деҳаи Майкатаи ҷамоати Амондара Ёлқин Тиллоев чойхонаро ба иҷора гирифта будааст.

Мақомот гуфтаанд сабаби таркиш "риоя карда нашудани қоидаҳои бехатарӣ" аст.

Дар бораи ин ҳодиса аз сарчашмаҳои мустақил то кунун маълумоти пурра дастрас нест. Як хабарнигори маҳаллӣ ба Радиои Озодӣ гуфт, ки шояд шумораи захмиён аз 15 нафар бештар бошад.

Вазорати корҳои дохилии Тоҷикистон мегӯяд, ки ба тафтиши ин ҳодиса оғоз кардааст.

Байдену Макрон ҳамкориҳои наздики ИМА ва Аврупоро баррасӣ карданд

Ҷо Байден 20-уми январ дар мақоми президенти нави ИМА савганд ёд кард

Президентони Фаронса ва ИМА - Эммануэл Макрон ва Ҷо Байден ба мувофиқа расиданд, ки дар масоили мубориза бо коронавирус ва тағйироти иқлим ҳамкорӣ мекунанд. Сӯҳбати нахустини телефонии онҳо рӯзи 24-уми январ баргузор шуд. Дар изҳороти дафтари президенти Фаронса омадааст, ки ду раҳбар “барои ҳамкорӣ ба хотири сулҳ дар Ховари Наздику Миёна, бахусус дар ҳалли масоили ҳастаии Эрон изҳори омодагӣ карданд”. Ҳафтаи гузашта Макрон аз тасмими Байден барои бозгашти ИМА ба созишҳое, ки аз он президенти пешин Доналд Трамп хориҷ шуда буд, истиқбол кард. Дар оғоз Макрон талош мекард бо Трамп равобити хубе барпо кунад, вале баъдан муносибатҳои ҳарду сардтар шуд. Сӯҳбати телефонии Байден ба Макрон, ки тахминан як соат идома дошт, бо ҳадафи оддӣ шудани муносибатҳои ду ҷониб барпо гардид. Кохи Сафед дар изҳороте гуфт, ки Байден ба ҳамкориву ҳамоҳангӣ дар масоили мисли созиши Париж дар заминаи тағйироти иқлим, тадбирҳои зидди COVID-19 ва иқтисоди ҷаҳонӣ тааҳҳуд кардааст. Дар изҳорот инчунин дар бораи тақвияти ҳамкориҳо дар чаҳорчӯби НАТО ва ҳамкориҳо бо Иттиҳоди Аврупо гуфта шудааст. Дар сӯҳбати президентони ИМА ва Фаронса масоили Чин, Ховари Миёна, Русия ва минтақаи Соҳил низ матраҳ шуд.

Боздошти ду киштӣ дар Индонезия ба ҳангоми эҳтимоли қочоқи нафти Эрон

24 январ, лаҳзаи ошкор шудани киштиҳои MT Horse (аз чап) ва MT Frea (аз рост) дар ҷазираи Борнеои Индонезия

Индонезия гуфт, ки ду киштии нафткаши Эрон ва давлати Панамаро бо иттиҳоми қочоқи нафт дар обҳои ин кишвари Осиёи ҷанубушарқӣ боздошт кардааст. Дар гузашта Эронро чандин бор дар он муттаҳам карданд, ки бо талоши фирор аз таҳримҳои ИМА, низоми назорати ҳаракати киштиҳоро хароб мекунад. Оҷонсии амнияти баҳрии Индонезия рӯзи 25-уми январ гуфт, ки нафткашҳои азими MT Horse ва MT Freya рӯзи гузашта дар обҳои вилояти Калимантан боздошт шуданд ва барои баргузории тафтишот ба ҷазираи Батам интиқол дода мешаванд. Сухангӯи ин оҷонсӣ гуфт, ки киштиронҳо нахостанд парчами давлати худро нишон диҳанд, системаи назорати ҳаракати киштиҳоро кушта ба тамосҳои радиоӣ посух надоданд. Мақомоти Индонезия гуфтанд, ки масъулини ду киштӣ лаҳзае ошкор ва дастгир шуданд, ки аз киштии MT Horse ба MT Freya нафтро интиқол бидиҳанд. Ҳамаи 61 сарнишини ду киштӣ боздошт шуданд. Вазорати хориҷаи Эрон гуфт, ки аз Индонезия дархост намуд ҷузъиёти ин ҳодисаи боздоштро ошкор кунад.

Ҳодисаҳои нохуш дар чанд рӯзи номусоидии ҳаво дар Тоҷикистон

Чанд рӯзи ахир Душанбе ва дигар манотиқи Тоҷикистон шоҳиди барфрезиҳои зиёд шудаанд

Ҳавои номусоиди чанд рӯзи ахир ҳодисаҳои нохушро дар Тоҷикистон афзоиш додааст. Сухангӯи Кумитаи ҳолатаҳои фавқуллода рӯзи 25 январ гуфт, ки барфрезии зиёд дар охири ҳафтаи гузашта баъзе аз қисматҳои роҳи мошингарди ноҳияҳои Шуғнон ва Ишкошими Вилояти мухтори кӯҳистони Бадахшонро баст. Баъди тоза кардани барф ҳоло роҳҳо дубора боз гардидаанд. Рӯзи 22 -юми январ дар ноҳияи Дарвоз садами мудҳиш рух дод. Сокини 46-солаи шаҳри Хоруғ бо панҷ мусофир ҳангоми ҳаракат ба самти Душанбе аз ӯҳдаи идораи мошини “Ланд Крузер”-аш набаромада, ба ҷарии 40-метр сарозер шуд. Дар натиҷа ронанда бо ду мусофир ба ҳалокат расиданд. Ду нафари дигар дар ҳолати вазнин ба беморхонаи шаҳри Кӯлоб интиқол ёфтанд. Кумитаи ҳолатҳои фавқуллода гуфт, боди сахт боми 8 бинои истиқоматӣ ва маъмуриро дар ноҳияҳои Исфара ва Ҳисор хароб кард. Касе дар пайи ин ҳодисаҳо осеб надидааст. Тибқи иттилои обуҳавошиносон, дар минтақаҳои кӯҳии Тоҷикистон эҳтимоли зиёди фаромадани тарма вуҷуд дорад.

Парвоз нест, вале қабули донишҷӯён бекор нашуд. Русия аз квотаҳо гуфт

Бархе донишгоҳҳо дар Русия бо риояи ҳатмии талаботи Роспотребнадзор ҷараёни таълими ҳузуриро идома медиҳанд

Намояндагии “Россотдрудничество” дар Тоҷикистон дар бораи шурӯи номнависӣ барои таҳсил дар макотиби олии Русия дар соли хониши 2021-2022 хабар медиҳад. Сабти довталабон тариқи вебсайт аз 20-уми январ то 20-уми феврали соли ҷорӣ идома хоҳад кард. Қаблан нахуствазири Русия Михаил Мишустин қарори зиёд кардани квотаро барои таҳсили шаҳрвандони хориҷӣ дар Русия имзо намуд. Тибқи он, дар соли нави хониш шумори квотаҳо 18 ҳазор, соли 2022 - 23 ҳазор ва шурӯъ аз соли 2023 - 30 ҳазор хоҳад буд. Тоҷикистон чун солҳои қаблӣ 630 квотаро соҳиб шудааст. Донишҷӯёни тоҷике, ки соли гузашта тибқи квота ба донишгоҳҳои Русия дохил шуданд, бинобар пандемияи коронавирус натавонистанд ба Русия сафар кунанд. Ба донишҷӯён тавсия дода шуд, ки дарсҳоро тариқи онлайнӣ бихонанд. Мақомоти рус гуфтанд, бозгашти донишҷӯён ба Русия дар сурати барқарор шудани парвозҳои доимӣ имконпазир хоҳад шуд.

АП: Парвози транзитӣ аз Тошканд ба Қазоқистон бидуни иҷозати ситод имкон надорад

Яке аз толорҳои пешвозгирии фурудгоҳи шаҳри Тошканд

Талоши бархе шаҳрвандони Тоҷикистон барои сафар ба Қазоқистон тавассути парвози транзитии шаҳри Тошканд натиҷа надод. Парвозҳои миёни Тошканду Душанбе ҳафтаи гузашта барқарор шудааст. Оҷонсии “Азия-Плюс” бо такя ба як манбаъ дар ҳукумати Тоҷикистон гуфт, ки сафари транзитӣ аз Узбекистон ба Қазоқистон дар ҳоле иҷозат аст, ки агар мусофирони тоҷик иҷозатномаи Ситоди муқобила бо коронавируси Қазоқистонро дошта бошанд. Яъне агар шумо ҳатто аз ягон корхонаву идораи Қазоқистон даъватнома доша бошед, вале бидуни иҷозатномаи Ситоди ҷумҳуриявии мубориза бо COVID-19– и Қазоқистон шуморо ба ин кишвар роҳ намедиҳанд. То ҳанӯз равуои ҳавоӣ байни Душанбе ва Алмаато барқарор нашудааст.

Даромади буҷаи Русия аз ҳисоби патенти муҳоҷирон коҳиш ёфт

Гурӯҳи муҳоҷирони узбек дар Маскав

Русия дар 11 моҳи соли гузашта аз ҳисоби пули патенти муҳоҷирон беш аз 577 миллион доллар фоида гирифтааст. Тибқи иттилои Вазорати корҳои дохилии Русия, соли 2018 ин нишондод 757 миллион доллар будааст.

Дар ин вазорат гуфтанд, ки аз моҳи январ то ноябри соли 2020 дар ҳудуди Русия каме беш аз миллион нафар муҳоҷирон патент гирифтаанд, дар ҳоле, ки соли 2019 - 1 миллиону 700 ҳазор нафар соҳиби патенти кор шудаанд.

Қаблан эълон шуда буд, ки сафари шаҳрвандони хориҷӣ ба ин кишвар бо сабаби пандемияву маҳдудиятҳо 50 фоиз коҳиш ёфтааст. Русия соли 2015 муқаррароти доштани ҳатмии патенти корро ҷорӣ кард ва буҷаи он кишвар ҳар сол аз ҳисоби пардохтҳои муҳоҷирони корӣ миллионҳо доллар фоида мебинад. Муҳоҷирон бе патент ҳаққи кор дар Русияро надоранд ва дар сурати надоштани он ҷарима ва аз қаламрави он кишвар ихроҷ мешаванд. Феълан нархи патенти кор дар ҳудуди шаҳри Маскав 5341 рубл, дар вилояти Маскав 5092 рубл ва шаҳри Санкт-Петербург 3993 рублро ташкил медиҳад.

Мақомоти тоҷик сафари сохтмончиёни тоҷик ба Иркутскро тасдиқ карданд

Фурудгоҳи шаҳри Иркутск

Вазорати меҳнати Тоҷикистон мегӯяд, гурӯҳи аввали сохтмончиёни тоҷик ҳафтаи равон ба шаҳри Иркустки Русия барои кор интиқол дода мешаванд. Қарор аст садҳо шаҳрванди Тоҷикистон дар ин шаҳри Русия дар мувофиқа бо се ширкати сохтмонӣ бо ҷойи кор таъмин шаванд. Вазорат рӯзи 25 январ ба Радиои Озодӣ гуфт, ки ҳамаи хароҷоти муҳоҷирони тоҷик - шурӯъ аз парвозу ҳуҷҷатгузорӣ то таъмин бо хӯроку хобгоҳ ва карантини дуҳафтаина, аз ҳисоби ширкатҳои сохтмонӣ пардохта мешавад. Вазорати меҳнати Тоҷикистон мегӯяд, сафари муҳоҷирони корӣ ба Иркутск дар чаҳорчӯби созишномае сурат мегирад, ки бо дастури муовини сарвазири ҳукумати Русия Татяна Голикова қабул шудааст.

Дар шароити пандемияи коронавирус ва маҳдудиятҳои иҷтимоӣ, ки бисёр соҳаҳои иқтисоди Русияро фаро гирифтааст, сафари корҷӯёни хориҷӣ, аз ҷумла шаҳрвандони Тоҷикистон, ки Русия бозори асосии кори онҳо ба шумор мешавад, аз соли гузашта ба ин сӯ манъ шудааст. Камбуди нирӯи кории дохиливу боздошта шудани корҳо дар бисёр соҳаҳо, аз ҷумла сохтмон, барои соҳибкорону корхонаҳо мушкилоти зиёд эҷод кардааст.

Иркутск дар 5-ҳазоркилометрии шаҳри Душанбе ҷойгир буда, шаҳри шашуми калонтарини минтақаи Сибири Русия – макони зисти беш аз 600 ҳазор сокин мебошад.

Дейзи Синделар иҷрокунандаи вазифаи президенти РАО/РО шуд

Дейзи Синделар журналисти собиқадори Радиои Аврупои Озод/Радиои Озодӣ иҷрокунандаи вазифаи президенти ин муассиса таъин шуд

Бо қарори раҳбари кунунии Созмони расонаҳои ҷаҳонии Амрико (USAGM), Дейзи Синделар иҷрокунандаи президенти Радиои Аврупои Озод/Радиои Озодӣ таъин шуд. Инчунин дар изҳороти 24-уми январи Келу Чао, иҷрокунандаи мақоми Раиси USAGM гуфта мешавад, ки Бей Фанг - президенти Радиои “Осиёи озод” (RFA) ва Келли Салливан - иҷрокунандаи президенти Шабакаи суханпарокании Ховари Миёна (MBN) таъин мешаванд. Чао гуфт, “боварии зиёд дорам, ки ин раҳбарон журнализми баландсифати мустақил, бетарафона ва касбиро таъмин хоҳанд кард”.

Синделар, ки дар вазифаи муовини президент ва сардабири РАО/РО кор мекард, ба мақоми иҷрокунандаи вазифаи президенти ин расона баргашт. Ӯ дар ин мақом баъди дар моҳи июни соли 2020 аз вазифаи президенти РАО/РО барканор шудани Ҷейми Флай кор карда буд.

Чао бо як қарори худ аз 22-юми январ президенти РАО/РО Тед Липиенро ҳамроҳ бо ду раҳбари RFA ва MBN ҳамагӣ як моҳ баъди таин шудани онҳо ба ин мақом барканор кард. Як рӯз пеш аз ин тасмимаш, мудир ва муовини мудири Радиои “Садои Амрико”-ро барканор кард ва раҳбари дафтари суханпарокании Куба ба истеъфо рафт.

Ин тағйирот баъди он сурат гирифт, ки Майкл Пак - дастнишондаи президенти пешин Доналд Трамп – дар чанд соат баъди сари кор омадани президенти нави ИМА Ҷо Байден дар таърихи 20-уми январ аз мақоми раҳбари USAGM истеъфо дод. Демократҳову ҷумҳурихоҳҳо дар ИМА Пакро барои сиёсатҳову таъиноташ интиқод мекарданд. Ин коргардони филмҳои мустанад моҳи июни солли 2020 дар мақомаш тасдиқ шуд ва аз он замон то кунун барои мудохилааш ба сиёсати таҳририяи бунгоҳҳои хабарии зери назараш мавриди интиқод буд.

USAGM бо 800 миллион доллар буҷаи солона панҷ шабакаро зери назар дорад. Инҳо “Садои Амрико”, Радиои Аврупои Озод/Радиои Озодӣ, Радиои “Осиёи озод”, Шабакаи суханпарокании Ховари Миёна ва дафтари суханпарокании Куба мебошанд. Дар маҷмӯъ ин ҳама расонаҳоро 350 миллион нафар дар ҳафта тавассути барномаҳои радиоӣ, телевизионӣ ва интернетӣ дарёфт мекунанд. “Садои Амрико” ва радиои Куба тобеи ҳукумати ИМА аст. РАО/РО, “Осиёи озод” ва Шабакаи Ховари Миёна сохторҳои мустақил ва ғайритиҷоратӣ буда, бо пули андозсупорандаҳои ИМА тавассути Конгресс маблағгузорӣ мешаванд.

Се сокини Леваканд дар кӯҳи Хоҷамастон бедарак шудаанд

Мақомоти Кумитаи ҳолатҳои фавқулоддаи Тоҷикистон мегӯянд, ки барфи баланд дар кӯҳҳои атрофи деҳаи Зағертии шаҳри Леваканд (собиқ Сарбанд), амалиёти ҷустуҷӯи се сокини ин маҳалро ба душворӣ рӯбарӯ кардааст.

Се сокини ин деҳа -- Баён Салихови 45-сола, писари ӯ Муҳтоҷиддини 14-сола ва ҳамсояи онҳо Рустам Саидови 22-сол панҷ рӯз қабл барои пайдо кардани чорвои худ ба кӯҳи Хоҷамастон баромаданд, вале бедарак шуданд.

Муродҷон Муҳиддинов, як масъули Кумитаи ҳолатҳои фавқулодда дар шаҳри Левакант гуфт, вақте ин афрод бегоҳии панҷшанбе ба ҷустуҷӯи чорвои худ ба кӯҳ рафтанд, барф набудааст, вале шабона ҳаво тағйир карда, барфи зиёд боридааст. Ба гуфтаи КҲФ, ҳоло сатҳи барф дар ин маҳал ҳудуди як метрро ташкил медиҳад ва кори наҷотдиҳандагонро дар пайдо кардани ин афрод душвор кардааст.

Сокинони деаи Зағертӣ гуфтанд, ки охирин тамоси онҳо аз кӯҳ соати шаши шоми 21-уми январ будааст.

Кумитаи ҳолатҳои фавқулоддаи Тоҷикистон қаблан аз мардум хоста буд, ки рӯзҳои 22-23 январ қоидаҳои бехатариро риоя кунанд, ба кӯҳҳо нараванд ва низ ба ронандаҳо маслиҳат дод, ки дар сурати яхбандӣ ва ҳавои пурборишу сард, аз сафарҳои безарурат даст кашанд.

Охири ҳафтаи гузашта дар бисёре аз минтақаҳои Тоҷикистон барфи сангин борид.

ИА дар заминаи боздошти Навалний ва саркӯби эътирозгарон вокуниш мекунад

Маскав, 24 январ. Полис як фаъоли мухолифон Павел Крисевичро, ки ба тарафдоронии Алексей Навалний даст ба эътироз зад, боздошт карданд

Қарор аст, вазирони умури хориҷии Иттиҳоди Аврупо имрӯз, 25-уми январ вокуниши иттиҳод ба боздошти Алексей Навалний, пешвои мухолифони Русияро баррасӣ мекунанд. Рӯзе аз ин пештар маъмурони пулис ҳангоми тазоҳурот ба тарафдории Алексей Навалний дар шаҳрҳои гуногуни Русия бештар аз ҳазорон нафарро дастгир карданд. Жозеп Боррел, масъули сиёсатҳои хориҷии Иттиҳодияи Аврупо гуфт, дар нишасти рӯзи 25-уми январ “қадамҳои баъдӣ” нисбат ба Русияро баррасӣ мекунанд. Чанде аз кишварҳои иттиҳодия хостаанд, ки ба зидди Русия таҳримоти иловагӣ эъмол шавад. Бар асоси иттилои маркази ОВД-Инфо, дар ҷараёни тазоҳуроти рӯзи 23-уми январ дар саросари Русия бештар аз 3700 тазоҳургар дастгир шудаанд. Аз ҷумла, дар Маскав тақрибан 1500 нафарро дастгир кардаанд ва дар инҷо чанд нафар ҳам ҳангоми бархурд бо пулис маҷруҳ шудаанд. Кишварҳои ғарбӣ бархӯрди дурушт бо тазоҳургаронро танқид карданд. Жан Ив Ле Драян, вазири умури хориҷии Фаронса рӯзи 24-уми январ гуфт, амалкарди маъмурони пулис Русия, “лағжиш ба самти худкомагӣ” дар Русия аст. Дар тазоҳурот ба тарафдории Алексей Навалний дар Маскав, Санкт Петербург ва дигар шаҳрҳои Русия даҳҳо ҳазор нафар ширкат карданд. Ӯро ҳафтае пеш баъди бозгашташ аз Олмон ба Маскав дар фурудгоҳ дастгир карданд. Ӯ баъди заҳролудшавӣ бо як заҳри қаттол барои муолиҷа ба Берлин бурданд.

Дар Узбекистон мудири як коргоҳ баъди бозпурсӣ дар идораи пулис худро овехт

Маркази барқу гармидиҳии "Ново-Ангрен"

Ҷасади раҳбари яке аз сехҳои Маркази барқу гармидиҳии "Ново-Ангрен"-и вилояти Тошканди Узбекистон С. Ш.-ро, ки чанде қабл дар он таркиш ба амал омада буд, 23 январ дар манзили зисташ овезон пайдо карданд.

Сухангӯи ҳукумати вилояти Тошканд Беҳзод Кабулов ва хадамоти матбуотии Додситонии кулли Узбекистон низ хабарро тасдиқ карданд.

Марди 40-сола сехеро раҳбарӣ мекард, ки 20 январ дар натиҷаи таркише дар он ду зану як мард ҷон бохта, се тани дигар захмӣ шуданд. Ба гуфтаи манбаи сомонаи Gazeta.uz, мудири сехро дар доираи парвандаи таркиш ба бозпурсӣ даъват карда буданд.

Дар қисми 5-уми ​Маркази барқу гармидиҳии "Ново-Ангрен"-и вилояти Тошканд 20 январ таркиш рух дод. Додситонӣ дар робита ба ин ҳодиса бо банди "Нақзи қоидаҳои ҳифзи меҳнат, ки боиси марги инсон мешавад" парванда боз кардааст.

Ба иттилои Вазорати энержии Узбекистон, Маркази барқу гармидиҳии "Ново-Ангрен"​ ба ҳар як хонаводаи ҳалокшудагон 105 млн сӯм (наздики 10 ҳазор доллар) ҷуброн пардохт кардааст. Ҳамчунин ин хонаводаҳо 20-21 январ барои маросими дафн ҳудуди 500-долларии дигар дарёфт карда буданд.

Дар эътирозҳои Русия бештар аз 3,5 ҳазор кас боздошт шудааст

Пулиси Русия дар ҷараёни эътирози тарафдорони Алексей Навалний, мунаққиди сиёсатҳои Кремл, зиёда аз 3,5 ҳазор касро боздошт кард. Намоишҳои рӯзи шанбеи 23-уми январ дар чандин шаҳри Русия, аз бузургтарин эътирози солҳои охир дониста шуд.

Дар Маскав, пойтахти Русия, норозиён дар майдони Пушкин бо пулис даргир шуданд. Пулис бархе аз онҳоро калтаккорӣ ва бо истифода аз нерӯ ба автобусҳо савор кард. Дар ниҳоят пулис гирдиҳамомадагонро аз ин майдон берун намуд, вале онҳо дар яккилометрии майдон ҷамъ омаданд ва ба тарафи кормандони пулис барф андохтанд.

Мақомоти шаҳр шумораи тазоҳуркунандагонро 4000 нафар номид, вале хабаргузории Reuters теъдоди онҳоро 40 ҳазор нафар гуфт.

Нашрияи OVD-Info, ки аз боздоштҳои сиёсӣ гузориш медиҳад, мегӯяд, дар Маскав на камтар аз 795 нафар боздошт шудаанд. Ин нашрия ҳамчунин аз ширкати зиёда аз 300 нафар дар Петербург хабар дода, гуфтааст, ба сурати умум дар 90 шаҳри Русия бештар аз 3500 нафар боздошт шудаанд.

Мақомоти Қирғизистон гумонбарони таҷовуз ба номуси наврасро ҷустуҷӯ доранд

Дар Қирғизистон пулис таҳқиқи таҷовузи наврасеро дар ҳамоми умумӣ шуруъ кард.

"Ҷустуҷӯи гумонбароне идома дорад, ки нисбати наврас таҷовузро раво диданд. Мақомоти қудратӣ дар пайи ҷамъоварии иттилоъ ҳастанд. Вазорати корҳои дохилӣ ваъда медиҳад, ки дар фурсатҳои наздик айбдорон пайдо хоҳанд шуд", - хабар доданд аз маркази матбуотии ВКД Қирғизистон.

Нашри як навор дар шабакаҳои иҷтимоӣ ва паёмакрасонҳои корбарони Қирғизистон дар рӯзҳои ахир баҳсу гуфтумонҳои зиёдеро ба бор овардааст. Дар навор дида мешавад, ки марде ноболиғеро таҷовуз мекунад. Дақиқ нест, ки ин навор кай ва дар куҷо сабт шудааст.

Сабти зилзилаи дувум дар як ҳафтаи охир дар Тоҷикистон

Акс аз бойгонӣ

Дар лаҳзаҳои аввали рӯзи 25-уми январ (00:01) заминларзаи сахте Тоҷикистонро такон дод. Дар як ҳафтаи охир бори дувум аст, ки ин ҳолат рух медиҳад. Чанде аз сокинон дар шабакаҳои иҷтимоӣ навиштанд, заминларзаро дар Душанбе ва минтақаҳои дигар эҳсос карданд. То ҳанӯз Маркази зилзиланигории Тоҷикистон дар ин бора иттилоъ надодааст. Маълум нест, ин ҳодиса хисороте ҳам доштааст ё не. Марказҳои зилзилашиносии ҷаҳон гуфтанд, заминларза дар 41-километрии ҷануби шаҳри Хоруғи вилояти Бадахшон ва дар умқи 107 километр рух додааст. Ба иттилои онҳо, шиддати заминларза дар марказаш ба 5.2 дараҷаи Рихтер баробар буд. Тоҷикистон дар яке аз минтақаҳои зилзилахези қораи Осиё ҷойгир аст. Дар гузашта бар асари зилзила дар гӯшаҳои кишвар чандин хона вайрон шудааст. Аз ҷумла, моҳи июли соли 2020 наздик ба 60 хонаи сокинони чаҳор деҳа дар ҷамоати Ширинчашмаи ноҳияи Тоҷикобод дар заминларза осеб дид.

Конгресс хоҳони таҳримҳои нав ба зидди Русия шуд, агар Маскав алайҳи Радиои Озодӣ иқдом кунад

Дафтари Радиои Озодӣ дар Маскав

Конгресси Амрико хостааст, агар Кремлин ба зидди фаъолияти Радиои Аврупои Озод/Радиои Озодӣ дар Русия (ҷарима ва ё маҳдудиятҳо) иқдом кунад, Вашингтон бо таҳримҳои нав ба Маскав ҷавоб диҳад.

Вакилони Ҳизби демократ ва Ҳизби ҷумҳурихоҳ дар номаи рӯзи 22-юми январ ба раиси ҷумҳур Ҷо Байден ҳамчунин хостаанд, барои тақвияти фаъолияти Радиои Озодӣ дар Белорус иқдом кунад.

Ин кишвар аз моҳи августи соли гузашта, пас аз эълони натиҷаҳои интихоботи президентӣ, ба ин тараф шоҳиди тазоҳуроти зиддиҳукуматӣ аст. Мақомоти Белорус гуфтанд, дар он интихобот Александр Лукашенко пирӯз шуд, вале мухолифон мегӯянд, дар интихобот тақаллуб сурат гирифт. Чандин кишвари аврупоӣ пирӯзии Лукашенкоро ба расмият нашинохтанд.

"Роскомнадзор", идораи танзими фаъолияти расонаҳо дар Русия, ин моҳ эълон кард, ки Радиои Озодиро садҳо ҳазор доллар ҷарима мебандад. Маскав радиоро барои нақзи муқаррарот муттаҳам кард.

Бино бар қонун дар Русия расонаҳоеро, ки аз хориҷ сармоягузорӣ мешаванд, “агенти хориҷӣ” мешиносанд. Ин қонун хабарнигорони Радиои Озодиро дар маърази муҳокимаи ҷиноӣ низ қарор медиҳад.

Радиои Аврупои Озод/Радиои Озодӣ, ки аз сӯи Конгресси Амрико маблағгузорӣ мешавад, ба муқаррароти Маскав тан надодааст, вале афзоиши ҷаримаҳои пулӣ шояд ин муассисаро маҷбур созад, ки фаъолияти хабарии худро дар Русия боздорад.

Ҳукми ду ҷавон барои навиштани шиори зидди Лукашенко дар Минск

Додгоҳи София Малашевич ва Тихана Клюкач

Дар шаҳри Минск ду ҷавони 18-соларо барои навиштани шиори зидди Александр Лукашенко, раҳбари худкомаи Белорус, бар рӯйи сипари маъмурони ОМОН ба зиндон маҳкум кардаанд.

Лукашенко аз соли 1994 дар сари қудрат аст. Ӯ иддао кард, ки дар интихоботи моҳи августи соли гузашта низ баранда шуд, вале мухолифон натиҷаи онро напазируфтанд.

Додгоҳи ноҳияи Октябр дар пойтахти Белорус София Малашевичро ба ду сол ва Тихана Клюкачро ба 18 моҳи зиндон маҳкум кард. Ҳардуи онҳо донишҷӯёни Омӯзишгоҳи шаҳри Брест, ғарби Белорус, ҳастанд. Ҳукм рӯзи 22-юми январ содир шудааст.

Додгоҳ Малашевичро ба авбошӣ ва таҳқири президент ва Клюкачро ба вайрон кардани тартиботи ҷамъиятӣ айбдор донистааст.

Ба қавли мақомот, ҳарду ҷавон дар эътирозҳо ба зидди Лукашенко дар Минск иштирок карда, яке дар рӯйи сипари маъмурони пулис навиштае гузоштааст ва дигар онро ба навор гирфтааст. Малашевич ва Клюкач ин гуфтаҳоро тасдиқ карда, вале аз додгоҳ хостаанд, онҳоро аз озодӣ маҳрум накунад.

Наздиконаш гуфтанд, ҷасади Карима Балочро аз Канада ба Покистон бурданд

Карима Балоч

Ҷасади Карима Балоч, фаъоли ҳуқуқи башарро аз Канада ба Покистон бурдаанд.

Бародараш Самир Балоч рӯзи 24-уми январ ба бахши покистонии Радиои Озодӣ гуфт, мақомоти маҳаллӣ маҳдудияти гаштугузор ҷорӣ карда, ба касе иҷоза намедиҳанд, то дар тазоҳурот иштирок кунанд.

Карима Балоч рӯзи 20-уми декабри соли 2020 дар шаҳри Торонтои Канада нопадид шуд ва як рӯз баъд ҷасадашро дар наздикии дарёча ёфтанд.

Пулиси Канада гуфт, марги ӯ ҷанбаи ҷиноӣ надорад, аммо хонаводааш мегӯянд, Карима Балоч аз Покистон таҳдид мешуд. Наздиконаш гуфтаанд, ба хотири ин таҳдидҳо дар Канада паноҳанда шуда буд ва мавзуъ бояд таҳқиқ шавад.

Созмони Афви Байнулмилал ва Кумисюни ҳуқуқи башари Покистон хоҳони пайгирии қазия шудаанд.

Ларри Кинг дар 88-солагӣ дар бемористон даргузашт

Ларри Кинг, акс аз соли 2007

Ларри Кинг, хабарнигори машҳури радио ва телевизиони Амрико, дар 88-солагӣ даргузашт.

Иллати марги ӯ то кунун расман эълом нашудааст, аммо сухангӯйи як шифохона гуфтааст, Ларри Кинг ба коронавирус мубтало шуда буд.

Ӯ дар тӯли фаъолияташ бо раҳбарони кишварҳои гуногун, ситораҳои синамо ва варзишкорону мардуми одӣ садҳо мусоҳиба анҷом додааст.

Аз ҷумла, Ларри Кинг бо Михаил Горбачев, раҳбари собиқ Иттиҳоди Шӯравӣ; Владимир Путин, раиси ҷумҳури Русия; президентҳои Амрико, аз Ричард Никсон гирифта то Барак Обама ва шахсиятҳое ба монанди Далай Ламаву Билл Гейтс суҳбат кардааст.

Кинг дар солҳои охир ба хотири ҳамкорӣ бо телевизиони Russia Today мавриди интиқод қарор гирифт.

Боздошти тақрибан 3400 эътирозгар дар Маскав ва шаҳрҳои дигари Русия

Қазон, 23-юми январи 2021

Дар ҷараёни эътирозҳо дар сартосари Русия, ки бо талаби озодии пешвои мухолифон Алексей Навалний ташкил шуд ва яке аз тазоҳуроти бузурги зиддиҳукуматӣ буд, ҳазорҳо нафарро дастгир кардаанд.

Ин тазоҳурот бо вуҷуди ҳавои сард ва латукӯби нирӯҳои вижаи пулис рӯзи 23-юми январ баргузор шуд.

Ҳоло маълум нест, эътирозҳо ба ҳукумати президент Владимир Путин чӣ таъсир хоҳанд дошт. Касе, ки солҳо боз зимоми қудратро дар даст дорад ва атрофиёнаш аксаран ӯро берақиб мепиндоранд. Ӯ метавонад то соли 2036 дар қудрат бимонад.

Аммо ҳузури даҳҳо ҳазор кас дар посух ба дархости Алексей Навалний ҷолиб будани “ҷанги” пешвои мухолифонро ба зидди фасод нишон медиҳад.

Навалний баъд аз эълони ҳукмаш рӯзи 18-уми январ аз мардум хост, ки ба кӯчаҳо бароянд. Раҳбари мухолифони Русияро рӯзи 17-уми январ, ҳангоми бозгашт аз Олмон, дар фурудгоҳи Шереметево дастгир карданд.

Ба иттилои гуруҳи ОВД-Инфо, рӯзи 24-уми январ дар сартосари Русия тақрибан 3400 кас боздошт шудаанд. Ниме аз боздоштҳо дар Маскав сурат гирифтааст. Аз ҷумла, Юлия Навалная, ҳамсари Алексей Навалний ва яке аз ҷонибдорони ӯ Любов Собол ҳам боздошт шудаанд.

Тасвирҳое, ки дар он нирӯҳои вижа эътирозгаронро дар Маскав ва шаҳрҳои дигар мезананд, бо вокунишҳои Вашингтону Брюссел рӯ ба рӯ шуд.

Ёфтҳои бештар

XS
SM
MD
LG