Пайвандҳои дастрасӣ

Хабари нав

Хабарҳо

Путин: Дар бойкоти интихобот ИМА даст дорад

Владимир Путин, раиси ҷумҳурии Русия дирӯз ИМАро дар он муттаҳам кард, ки САҲАро водор кардааст, аз ирсоли нозиронаш ба интихоботи парлумонии 2 декабри Русия даст кашад. Путин гуфт:

"Бар пояи иттилое, ки мо дастрас кардаем, ин тасмим бо машварати вазорати хориҷаи Амрико гирифта шуд. Ва дар ҳақиқат ҷои шубҳа нест, ки он дар равобити мо бо Амрико таъсир хоҳад гузошт".

Путин афзуд, ки ҳадафи онҳо "ғайриқонунӣ" талаққӣ додани интихоботи парлумонии Русия мебошад. Ҳайати нозирони САҲА гуфтааст, ки аз ширкат дар ҷараёни арзёбиҳои интихоботи Русия бо ин сабаб даст мекашад, ки Маскав шароити фаъолияти онҳоро амалан ғайримумкин кардааст. Кремлин ин созмонро дар он муттаҳам кард, ки аризаҳои ширкат дар интихоботро носаҳҳеҳ пур кардааст. Бо ин вуҷуд, Маҷмаи парлумонии САҲА ҳамроҳ бо Шӯрои Ассамблеяи парлумонии Аврупо тасмим доранд, 100 вакили худро барои назорат аз интихобот ба Русия фиристанд. Дар ҳоле, ки вокуниши Амрико ба изҳороти ахири Путин ҳанӯз маълум нест, аммо Кохи Сафед, Иттиҳодияи Аврупо, Шӯрои Аврупо, Фаронса ва Олмон дар робита ба саркӯби ширкатдорони намоишҳои эътирозии зиддиҳукуматӣ дар Маскаву Санкт-Петербург аз ҷониби полис изҳори нигаронӣ карданд. Раиси ҷумҳурии Амрико Ҷорҷ Буш гуфт, ки аз ин ҳодиса "амиқан нигарон" аст. Дар пайи ин саркӯбҳо, Гарри Каспаров, як раҳбари мухолифин барои панҷ рӯз ба зиндон андохта шуд. Дирӯз қозии додгоҳи Маскав ҳукми Каспаровро таъйид кард ва гуфт, ки Каспаров аз рӯзи шанбе дар боздошт ба сар мебарад.

Ҳамаи хабарҳои имрӯзро дар инҷо бихонед

Теъдоди гирифторони COVID-19 дар Тоҷикистон аз 3900 нафар гузашт

Вазорати тандурустии Тоҷикистон гуфт, дар шабонарӯзи гузашта 123 каси дигар ба COVID-19 гирифтор шудаанд ва то рӯзи 31-уми май теъдоди умумии беморон ба 3930 нафар расид. Ба иттилои расмӣ, 2004 кас шифо ёфтааст ва теъдоди фавтидагон тағйир наёфтааст ва ба 47 нафар мерасад.

Мутахассисон ва теъдоди зиёде аз мардум ба дурустии омори расмӣ шубҳа доранд ва мегӯянд, мумкин аст, теъдоди гирифторону талафот аз беморӣ дар Тоҷикистон зиёд бошад. Ҳамарӯза дар шабакаҳои иҷтимоӣ доир ба марги фарде дар ин ё он гӯшаи кишвар гузориш мерасад ва корбарон ҳам менависанд, ки он фард бар асари бемории илтиҳоби шуш ва ё "коронавирус" вафот кардааст. Бар асоси феҳрасти ғайрирасмӣ дар Интернет шумори ҷонбохтагон аз коронавирус ва "илтиҳоби шуш" бештар аз 300 нафарро ташкил медиҳад. Ин феҳрастро бар асоси хабари расонаҳо, шабакаҳои иҷтимоӣ ва иттилои наздикони фавтидагон таҳия мекунанд.

Вазорати тандурустӣ ва ҳифзи иҷтимоии аҳолӣ дар баёнияи расмӣ дар вебсайташ ҳамчунин навиштааст, “то имрӯз, 31 майи соли равон дар мамлакат 1886 нафар зери назорати табибон қарор дошта, дар як шабонарӯзи охир 377 нафар пас аз шифо ёфтан ба хонаҳояшон рухсат дода шудаанд.” Ҳайати Созмони Ҷаҳонии Тандурустӣ, ки вазъи густариши бемории COVID-19 ва маргумир аз ин беморӣ дар Тоҷикистонро арзёбӣ мекард, рӯзи 12-уми май гуфт, суръати густариши беморӣ нигаронкунанда аст.

Вазорати тандурустӣ мегӯяд, ки ҳукумат ва вазорат тамоми чораҳоро барои пешгирӣ аз CОVID-19 ва табобати беморон меандешад. Коронавируси нав, ки охири соли гузашта дар шаҳри Вуҳани Чин кашф шуд, то кунун ба беш аз 5 миллион нафар дар саросари ҷаҳон сироят карда, беш аз 300 ҳазор касро куштааст.

Арабистони Саудӣ 90 ҳазор масҷидро барои ибодат боз кард

Намозгузорӣ дар Масҷиди Макка дар шаби Лайлатулқадр. 19-уми майи соли 2020

Баъд аз ду моҳи танаффус ҳукумати Арабистони Саудӣ дари ҳазорон масҷид дар саросари кишварро барои намозгузорон боз кард. Айни замон ба мардум дастур шудааст, барои эмин мондан аз сирояти коронавирус, меъёрҳои сахти беҳдоштиро риоят кунанд. Шаҳри Макка, зиёратгоҳи мусулмонон ба рӯи мардум баста мемонад.

Масҷид-ул-Ҳаром дар Байтулмуққадас, ки баъд аз Маккаву Мадина саввумин макони муқаддас барои мусулмонон ба ҳисоб меравад, боз шуд. Ин масҷидро моҳи март бастанд. Дар Арабистони Саудӣ 90 ҳазор масҷидро баъд аз поксозӣ аз вирусу микробҳо бо маводи зиддиуфунӣ боз карданд.

Вазорати умури исломӣ гуфт, ба мардум миллионҳо паёмак фиристода ва огаҳ кардааст, ки ҳангоми ибодат ва намозҳои дастаҷамъӣ меъёрҳои беҳдоштиро рияот кунанд. Аз ҷумла фосилаи думетриро нигаҳ доранд, ҳамеша ниқоби тиббӣ дошта бошанд ва вақти салом кардан ба ҳам даст надиҳанд.

Дар Афғонистон 710 зиндонии дигари Толибро озод карданд

900 Толибро рӯзи 26-уми май озод карданд.

Дар остонаи музокироти сулҳ барои поён додан ба ҷанги 18-сола ҳукумати Афғонистон ва Толибон теъдоди дигаре аз зиндониёну асиронро озод кардаанд. Ҷовид Файсал, сухангӯи Шӯрои Амнияти Миллии Афғонистон рӯзи 30-уми май гуфт: “Ҳукумат 710 зиндонии Толибро дар рӯзҳои гузашта аз зиндонҳои Пули Чархӣ ва Парвон ва зиндонҳо дар дигар вилоятҳои кишвар озод кардааст.”

Дар маҷмӯъ баъди имзои аҳдномаи Амрикову Толибон дар моҳи феврал, ки бахше аз он раҳо кардани зиндониёну асирон аст, ҳукумати Афғонистон 2700 зиндонии Толибро раҳо кардааст. Суҳайл Шоҳин, сухангӯи дафтари сиёсии Толибон дар Қатар рӯзи 30-уми май гуфт, ки онҳо 73 маъмури амниятии ҳукуматро дар вилоятҳои Балх, Қундуз, Лугар, Пактиё, Хӯст ва Пактико озод кардаанд. Ба қавли ӯ, то кунун Толибон 420 намояндаи ҳукуматро аз асорати худ раҳо кардаанд.

Фазонаварди амрикоӣ ба Истгоҳи Байналмилалии Кайҳонӣ мепайвандад

Фазонавард рӯзи 30-уми май ба кайҳон партоб шуд.

Интизор меравад, имрӯз як фазонаварди хусусӣ, ки ду кайҳоннаварди амрикоиро, ба Истгоҳи Байналмилалии Кайҳонӣ бурд, 31-уми май ба ин истгоҳ насб шавад. Доф Ҳарли ва Боб Бенкен то чанд соати дигар ба истгоҳе, ки 400 километр дуртар аз курраи Замин давр мезанад, ворид мешаванд ва чаҳор моҳ онҷо мемонанд.

Кайҳоннавардони амрикоӣ, ки аз Маркази Кайҳоннавардии Кеннедӣ дар аёлати Флорида рӯзи 30-уми май парвоз карданд, ба ду кайҳоннаварди рус ва як амрикоӣ мепайванданд. Бори аввал аст, ки тақрибан 10 соли ахир фазонаварди Амрико ба Истгоҳи Байналмилалии Кайҳонӣ парвоз мекунад. То ҳол кайҳоннавардони амрикоиро, фазонавардҳои Русия ба истгоҳи байналмилалӣ мебурданд.

Доналд Трамп, раиси ҷумҳури Иёлоти Муттаҳида, ки шоҳиди партоби фазонавард буд, гуфт, ки ин кор мояи ифтихори амрикоиҳо шуд ва изҳори умедворӣ кард, ки парвози фазонавард рӯҳияи амрикоиҳоро дар ин замони душвори пандемияи коронавирус ва нооромиҳои ахир боло мебарад.

Генерали бознишастаи тоҷик дар Кӯлоб даргузашт

Абдулваҳҳоб Искандаров

Абдулваҳҳоб Искандарзода, як генерали собиқ ва бознишастаи тоҷик ва аз раҳбарони пешини Раёсати умури дохилӣ дар вилояти Бадахшон дар синни 63-солагӣ даргузашт ва сабаби марги ӯро низ бемории СОVID-19 медонанд. Яке аз ҳамкорони Искандарзода рӯзи 31-уми май ба Радиои Озодӣ гуфт: “Қариб 15 рӯз дар хона бемор буд ва имшаб соатҳои 10 ба 11 шаб даргузашт. Бемории дил ҳам доштанд ва табобат мегирифтанд.” Ӯ дар шаҳри Кӯлоб зиндагӣ мекард.

Ба қавли мусоҳиби Радиои Озодӣ, зоҳиран вируси нав ба Абдулваҳҳоб Искандарзода ҳангоми ширкат дар маросими дафни бародараш Абдусалом Искандарзода, сардори собиқи Раёсати Бозрасии давлатии автомобилӣ дар минтақаи Кӯлоб сироят кардааст. Ин афсари тоҷик тақрибан ду ҳафта пеш даргузашт. Абдулваҳҳоб Искандарзодаро соати шаши субҳи 31-уми май дар оромгоҳи рақами 2 дар Кӯлоб дафн кардаанд.

Табибон доир ба сабабҳои марги генерали тоҷик чизе нагуфтаанд. Абдулваҳҳоб Искандарзода охири соли 2014 сардори Раёсати вазорати корҳои дохилӣ дар Вилояти Мухтори Кӯҳистони Бадахшон таъин шуда, моҳи августи соли 2017 рутбаи генералиро гирифта буд. Баъди танқидҳои президент Эмомалӣ Раҳмон дар мавриди риоят нашудани тартиботи ҷамъиятӣ дар вилоят моҳи сентябри соли 2018 аз ин мақом барканор шуд ва то як сол пеш муовини сардори Раёсати корҳои дохилаи вилояти Хатлон буд.

Шумори гирифторони COVID-19 дар Тоҷикистон аз 3800 гузашт, омори талафот бетағйир аст

Акс аз бойгонӣ

Вазорати тандурустии Тоҷикистон гуфт, дар шабонарӯзи гузашта 121 каси дигар ба коронавируси нав гирифтор шуданд ва шумори умумии беморон то 30-юми май ба 3807 нафар расид.

Мақомот мегӯянд, то ин дам беш аз 1800 нафар аз бемории ҳамагир шифо ёфтаанд.

Ба иттилои расмӣ дар чаҳор рӯзи гузашта касе аз коронавируси нав нафавтидааст. Теъдоди расмии ҷонбохтагон аз ин беморӣ дар Тоҷикистон 47 нафар аст, вале дар феҳрасти ғайрирасмӣ дар Интернет шумори ҷонбохтагон аз коронавирус ва "илтиҳоби шуш" то 30-уми май зиёда аз 360 кас ҳисоб шудааст.

Ин феҳрастро бар асоси хабари расонаҳо, шабакаҳои иҷтимоӣ ва иттилои наздикони фавтидагон таҳия мекунанд. Мақомот рӯйхати алтернативиро қабул надоранд ва дастрасӣ ба онро дар ҳудуди кишвар масдуд кардаанд.

ХАБАРУ ГУЗОРИШҲОИ БЕШТАРРО ДАР БОРАИ КОРОНАВИРУС ДАР ТОҶИКИСТОН ДАР ИНҶО БИХОНЕД

САҲА аз мамнуъ шудани сомонаи "Ахбор" дар Тоҷикистон нигаронӣ кард

Дерлим Ҳезир, намояндаи Созмони Амнияту Ҳамкории Аврупо дар умури озодии матбуот, аз қарори Додгоҳи олии Тоҷикистон барои бастани сомонаи "Ахбор" дар ҳудуди кишвар ҷиддан ибрози нигаронӣ кард.

Вай 29-уми май дар изҳороте гуфт, "аз маҳдуд кардани дастрасӣ ба сомонаи хабарии "Ахбор" дар қаламрави Тоҷикистон изҳори нигаронӣ мекунам."

Дерлим Ҳезир афзуд, "ба сурати давомдор масдуд кардани сомонаи хабарӣ дар Интернет нақзи ҷиддии озодии баён буда, аз чорчӯби дархости аз сомона бардоштани матлаби мушаххас хеле фаротар меравад. Ёдовар мешавам, ба назар гирифтани асли таносуб ҳангоми қабули ҳар гуна қарори марбут ба озодии матбуот муҳим аст."

Додгоҳи олии Тоҷикистон дар оғози имсол сомонаи мустақили "Ахбор"-ро, ки қароргоҳаш дар шаҳри Прага аст, ба рӯйхати вебсайтҳои мамнуъ дар кишвар ворид кард.

Мақомот торнаморо ба он айбдор карданд, ки гӯё ба созмонҳои дар Тоҷикистон мамнӯи наҳзати исломӣ ва Паймони миллӣ, эътилофи чаҳор созмони мухолифин дар Аврупо, "хидмат мекунад".

Мирзои Салимпур, муассис ва сардабири “Ахбор”, гуфт, сомонаи зери раҳбарии ӯ ба ҳеч созмон ё ниҳоде тааллуқ надорад ва бастанаш "як амали ғайриқонунӣ ва ҳамлаи рӯйирост ба озодии матбуот аст".

Мақомоти Додгоҳи олӣ гуфтанд, қарор дар бораи бастани ин сомонаҳо рӯзи 18-уми феврал содир шуда, аз 19-уми март ба иҷро даромадааст.

Созмонҳои байнулмилалӣ чанд сол боз Тоҷикистонро ба саркӯби дигарандешон ва маҳдудияти озодии баён танқид мекунанд.

Сомонаи "Ахбор" моҳи ноябри соли 2016 дар маркази Ҷумҳурии Чех ба кор оғоз карда, хабарҳои марбут ба Тоҷикистону минтақаро бе парда бозтоб медиҳад. Мирзои Салимпур мегӯяд, дар муддати фаъолияти тақрибан чаҳорсолаи сомона хабару гузоришҳои нашркардаи онҳоро беш аз 20 миллион бор дидаанд. Сомона беш аз ду сол дар Тоҷикистон дастнорас буд.

Генерал Ҳэдфилд гуфт, ҳавопаймоҳои ҷангии Русия дар Либия нишастанд

Тасвирҳои поин омадани ҳавопаймоҳои ҷангии Русия дар Либия

Маркази фармондеҳии Амрико дар Африқо иддаои Маскавро рад кард, ки гӯё ҳавопаймоҳои ҷангии ин кишвар дар Либия ҷойгир нашудаанд.

Генерал Грегори Ҳэдфилд гуфт, бар асоси назорати Иёлоти Муттаҳида, 14 ҳавопаймои ҷангии навъи МиГ-29 ва Су-24 пас аз парвоз аз Русия дар пойгоҳи ҳавоии Ал-Ҷуфра дар Либия нишастанд.

Ин пойгоҳ дар ҳоли ҳозир аз муҳимтарин марказҳои Халифа Ҳафтар, фармондеҳи Артиши Миллии Либия ба шумор меравад.

Муовини фармондеҳи Маркази фармондеҳии Амрико дар Африқо рӯзи 29-уми май ба хабарнигорон гуфт, фаъолиятҳои Русия дар Либия ва пуштибониаш аз нирӯҳои Халифа Ҳафтар “нигаронкунанда” аст.

Иёлоти Муттаҳида ва ҷомеаи байнулмилалӣ ҳукумати Либияро, ки машғули набард бо артиши худхондаи Либия аст, ба расмият мешиносанд.

Русия мегӯяд, бо ҳамаи ҷонибҳои дахил дар ҷанги дохилии Либия дар тамос аст, то буҳрони ин кишвар бо гуфтугӯ ҳаллу фасл шавад.

Як маъмури пулис ба қатли марди сиёҳпӯсти амрикоӣ муттаҳам шудааст

Норозиён аз қатли Ҷорҷ Флойд. Миннесота, 28-уми майи 2020

Дерек Чаувин, маъмури пулис дар аёлати Миннесота, ба қатли як марди сиёҳпӯсти амрикоӣ муттаҳам шудааст.

Мақомот рӯзи 29-уми май гуфтанд, ки Чаувин аввал Ҷорҷ Флойдро боздошт кардаву дасташро бастааст ва сипас ба замин хобонда, зонуяшро ба гулӯи дувумӣ гузоштааст.

Шахсе, ки аз наздикии маҳалли ҳодиса мегузашт, ин саҳнаро сабт карда ва дар шабакаҳои иҷтимоӣ гузошт. Дар видео марди 46-сола батакрор аз пулис мехоҳад, то пойи худро аз гулӯи ӯ бигирад, вале пулис тавваҷуҳ намекунад. Мард дертар дар шифохона ҷон додааст.

Пас аз ин ҳодиса мардум эътироз карда, хоҳони тантанаи адолат шуданд. Волии аёлати Миннесота гуфт, “ин ҳафтаи душвор буд. Мардуми мо, бахусус ҷомеаи сиёҳпӯстони мо, чунин садама диданд, ки дар ҳарф гунҷоиш надорад.”

Пулиси муттаҳам ва се ҳамкорашро аз вазифа сабукдӯш кардаанд. Мақомот мегӯянд, қазияро таҳқиқ доранд.

188 шаҳрванди дармондаи Тоҷикистонро аз Дубай оварданд

Акс аз бойгонӣ

Як ҳавопаймои ширкати "Сомон Эйр" 188 шаҳрванди бандмондаи Тоҷикистонро аз маркази Имороти Муттаҳидаи Араб ба Душанбе овард. Парвози чартерӣ ё ғайринақшавӣ шоми 29-уми май сурат гирифт.

Мақомоти Тоҷикистон гуфтанд, теъдоди дигаре аз шаҳрвандони дармондаро ҳавопаймои ширкати Fly Dubai рӯзи 31-уми май меорад.

Тоҷикистон аз нимаи дувуми моҳи март бо ҳадафи пешгирӣ аз сирояти коронавируси нав парвозҳои байналмилалиро қатъ кард. Ба ин сабаб садҳо шаҳрванди кишвар дар Русияву Туркия, Қазоқистону Ҳиндустон, Олмон ва Дубай дармонданд.

Ҳукумати Тоҷикистон ду ҳафта пеш ба иҷрои нақшаи марҳила ба марҳила овардани онҳо аз хориҷа оғоз кард.

То ин дам даҳҳо нафарро аз Русияву Ҳиндустон ва Туркия баргардонданд.

Посухи мақомот ба тақрибан 80 муҳоҷири дармондаи тоҷик дар Беларус. ВИДЕО

Акс аз бойгонӣ

Ҳудуди 80 муҳоҷири тоҷик, ки дар Беларус дармондаанд, дар назди сафорати Тоҷикистон дар Минск ҷамъ шуданд.

Масъулони сафорат ба онҳо гуфтаанд, нақша ҳаст, ки муҳоҷирони дармондаро ҳарчи зуд ба ватан баргардонанд.

Як масъули сафорат мегӯяд, дар навбати аввал муҳоҷиронеро мебаранд, ки тасодуфан ба Беларус омада, дар инҷо дармонданд. Онҳое, ки дар Беларус кор мекунанд ва ё қаблан ҷойи кор доштанд, дертар фиристода хоҳанд шуд.

Аз охири моҳи март парвози ҳавопаймоҳо ба Тоҷикистон қатъ шуд ва садҳо муҳоҷири тоҷик дар кишварҳои гуногун дармонданд. Дар ду ҳафтаи ахир теъдоде аз онҳоро аз Русияву Туркия ва Ҳиндустон ба ватан баргардонданд.

Сабти 123 мавриди нави гирифторӣ ба коронавирус дар Тоҷикистон

Озмоишгоҳи нав дар шаҳри Хуҷанд

Вазорати тандурустии Тоҷикистон хабар дод, ки дар шабонарӯзи гузашта 123 мавриди дигари гирифторӣ ба коронавируси навро сабт кард ва шумори умумии беморон то 29-уми май ба 3686 нафар расид. Ба иттилои расмӣ то ин дам 1769 нафар шифо ёфта, дар се рӯзи гузашта касе нафавтидааст. Теъдоди умумии ҷонбохтагон аз COVID-19 дар Тоҷикистон 47 нафар аст.

Бо ин вазъ шубҳаҳо ба оморҳои расмӣ зиёд аст ва бисёриҳо мегӯянд, мақомот на ҳама ҳақиқатро дар бораи коронавирус баён медоранд.

Бар асоси феҳрасти ғайрирасмӣ дар Интернет, шумори ҷонбохтагон аз коронавирус ва "илтиҳоби шуш" то 29-уми май зиёда аз 360 кас ҳисоб шуда буд.

Ин феҳрастро бар асоси хабари расонаҳо, шабакаҳои иҷтимоӣ ва иттилои наздикони фавтидагон таҳия мекунанд. Мақомот ин рӯйхатро қабул надоранд ва дастрасӣ ба онро дар ҳудуди кишвар масдуд кардаанд.

Бахши нави ДНС-ҳои амрикоӣ ба Русия ирсол мешаванд

Дастгоҳи нафаскашии сунъии Hamilton-C2 дар як беморхонаи Маскав

Ҳукумати ИМА ба унвони як иқдоми ҳусни ният ба Маскав барои бори дуюм Дастгоҳҳои нафаскашии сунъӣ (ДНС) ирсол мекунад, ки барои кӯмак дар мубориза бо коронавирус дар Русия нигаронида шудааст, вале ин тасмим мавриди суоли мунаққидони президент Доналд Трамп қарор гирифт. Сухангӯи ширкати Vyaire Medical дар Чикаго дар сӯҳбат бо Радиои Озодӣ гуфт, рӯзи 30 май 150 адад ДНС ба Маскав ирсол мешавад. Патрик Оконнор гуфт, ки қаблан дар моҳи май тавассути USAID ба Русия 50 чунин дастгоҳ ирсол шуда буд. Сухангӯ аз шарҳи бештари мавзӯъ худдорӣ кард, аз ҷумла, маълум нест, ки оё арзиши ин дастгоҳҳо ва харҷи роҳи онҳо чанд аст. 50 адад ДНС, ки рӯзи 21 май ба Русия ирсол шуд, аз ҷониби сафорати ИМА дар Маскав ҳамчун “ёрии башардӯстона” арзёбӣ шудааст. Он замон мақомот гуфтанд, ки қимати куллии 200 вентилятор тахминан 5,6 миллион доллар мешавад ва ИМА “харҷи 100-дарсадии нарху интиқол ва васоили аввалияро” пӯшиш медиҳад. Русия ҳанӯз дар ин замина изҳори назар накардааст. Русия рӯзи 29 май дуюмин кишвар дар ҷаҳон аз ҷиҳати шумори олудашудаҳо ба коронавирус буд ва дар ин кишвар дар робита бо дурустии иттилои расмӣ дар бораи ҳалокати инсонҳо бар асари COVID-19 шубҳаҳо баён мешавад.

Твиттер изҳороти Трамп дар бораи бенизомиҳои Миннеаполисро бо рамзи “таҳрики хушунат” ишора кард

Ҳушдори Твиттер дар бораи изҳороти Трамп

Шабакаи иҷтимоии Твиттер ба як изҳороти президенти ИМА Доналд Трамп дар бораи бенизомиҳо дар шаҳри Миннеаполис рамзи “таҳрик ба хушунат” гузошт ва гуфт, ки ин навиштаҷот қоидаро нақз мекунад, вале пок намешавад. Ин таҳаввулот ихтилофи тоза эҷодшуда миёни Трамп ва Твитерро амиқтар кард, чун як рӯз пеш аз ин Трамп қароре имзо кард, ки масунияти қонунии шабакаҳои иҷтимоии мисли Твиттер ва Фейсбукро барои матолиби дар саҳифаҳои онҳо нашршаванда заъиф мекунад. Трамп дар изҳороти ахираш навишт, ки ба Миннеаполис низомиён сафарбар шуданд, чун баъди марги як сиёҳпӯсти бесилоҳ, ки бо гумони нигаҳдошти пулҳои қалбакӣ боздошт шуд, мақомот бо бенизомиҳои афзоянда рӯбарӯ ҳастанд. Трамп навишт: “Ин КАЛЛАБУРҲО хотираи Ҷорҷ Флойдро бешараф мекунанд ва ман намемонам, ки чунин шавад. Ҳоло бо волӣ Тим Волтс сӯҳбат кардам ва гуфтам, ки низомиён тамоми вақт дар канорашон хоҳанд буд. Дар сурати ҳар мушкил назорат таъмин мешавад ва агар дуздӣ шуд, тирандозӣ оғоз мешавад. Ташаккур”.

Дар посух Твиттер гуфт, ки ин изҳорот қоидаҳои Твитерро нақз мекунад, чун мазмунаш таҳрими хушунат аст. Вале бо ин вуҷуд, ба навиштаи Твиттер, онро пок намекунад, чунки ба манфиати ҷомеа хоҳад буд.
Қабл аз ин баъди ду навиштаи Трамп дар бораи овоздиҳӣ тавассути почта, ки гӯё ба тақаллуб сабаб мешавад, Твиттер гуфт, ки ин навиштаҳо ба ҳақиқат наздик нест ва ин иқдоми Твиттер мояи хашми президент шуд. Ӯ рӯзи 28 май қароре имзо кард, ки сохторҳои давлатиро вазифадор мекунад, ҷорӣ кардани танзими кори ширкатҳои фароҳамкунандаи кори шабакаҳои иҷтимоиро мавриди омӯзиш қарор медиҳанд. Вале коршиносон шубҳа доранд, ки татбиқи қарор бидуни ризоияти Конгресс имконнопазир аст ва додгоҳ ҳам онро пуштибонӣ нахоҳад кард.

Ҳавопаймои "Уралские авиалинии" 22 муҳоҷир ва 6 тобутро ба Душанбе овард

Як ҳавопаймои ширкати "Уралские авиалинии" 22 шаҳрванди Тоҷикистон ва тобути шаш муҳоҷири фавтидаро аз Маскав ба Душанбе овард. Парвози чартерӣ ё ғайринақшавӣ 29-уми май сурат гирифт.

Як манбаъ дар сафорати Тоҷикистон дар Русия гуфт, ҳукми ихроҷи 22 муҳоҷир барвақт содир шуда, онҳо дар боздоштгоҳҳои Маскав қарор доштанд. Ҳавопаймо дар роҳи бозгашт шаҳрвандони Русияро ба Маскав мебарад.

Дар наворе, ки рӯзи 29-уми май корбарони Радиои Озодӣ аз фурудгоҳи Душанбе фиристоданд, дида мешавад, гурӯҳе аз мусофирон барои парвоз ба Русия омода мешаванд.

Интизор меравад, рӯзи 30-юми май низ як ҳавопаймои чартерӣ аз Санкт-Петребург ба Тоҷикистон биояд.

Қаблан сафири Тоҷикистон дар Русия гуфта буд, онҳо дар мадди аввал ихроҷшудаҳоро ба ватан мефиристанд. Дар баробари онҳо, садҳо муҳоҷири қатории тоҷик мехоҳанд ба Тоҷикистон баргарданд.

Ҳанӯз маълум нест, парвозҳои маъмулӣ миёни Тоҷикистону Русия кай барқарор мегардад ва ҳамингуна марзҳои байни кишварҳо кай боз мешавад. Парвозҳои байналмилалӣ ба Тоҷикистон нимаи дувуми моҳи март қатъ шудааст.

Рӯйхати "сиёҳ"-и Бонки Миллӣ нав шуд. Номи 2647 касро ворид кардаанд

Акс аз бойгонӣ

Шумори шаҳрвандони Тоҷикистон, ки ҳукумат онҳоро дар робита бо терроризм муттаҳам карда, зери пайгард қарор додааст, дар ҳафт моҳи ахир беш аз 200 нафар афзудааст.

Рӯйхатти "сиёҳ"-и Бонки Миллӣ бори аввал се сол пеш таҳия шуд ва ҳар сол саффи "афроди алоқаманд ба терроризм" дар он бештар мешавад.

Баъзе афроде, ки номи худро дар ин рӯйхатти "сиёҳ" ёфтаанд, бо ин иттиҳом розӣ нестанд. Онҳо мегӯянд, дар як қатор ҷой додани террористон ва мухолифони сиёсӣ "аз рӯйи адолат нест".

Дар феҳрасти наве, ки Бонки Миллӣ рӯзи 27-уми май нашр кард, дар маҷмӯъ 2647 шаҳрванди Тоҷикистон "шахсони ба терроризм алоқаманд” эътироф шудаанд. Моҳи октябри соли 2019 дар ин феҳраст номи 2392 нафар дарҷ шуда буд.

Ин феҳрастро Департаменти мониторинги молиявии Бонки Миллӣ тартиб медиҳад, ки бо FATF (Financial Action Task Force) – Созмони байналмилалии мубориза бо шустушӯи пул ҳамкорӣ дорад.

Феҳрасти созмонёфтаи "шахсони алоқаманд бо терроризм" ба созмонҳои молиявӣ ва ташкилоти қарзии кишварҳои узви ин созмон дастрас хоҳад буд.

Дар феҳрасти афроде, ки сохторҳои интизомии Тоҷикистон онҳоро дар экстремизм муттаҳам мекунанд, чандин фаъоли мухолифи ҳукумат ҳам ҳастанд. Дар миёни онҳо, аъзои созмонҳои дар Тоҷикистон мамнӯи “Гурӯҳи 24” ва ҲНИТ мебошанд, ки дар озодӣ ва дар берун аз Тоҷикистон ба сар мебаранд.

Дар кул ашхосе, ки Бонки Миллӣ онҳоро “афроди алоқаманд ба терроризм” медонанд, мегӯянд, барояшон то ҳол муаммо аст, ки чаро мақомоти тоҷик онҳоро дар терроризм ва ифротгароӣ муттаҳам мекунанд. Дар ҳоле ки, ба гуфтаи онҳо, бештар ба фаъолиятҳои сиёсӣ машғуланд.

Дар ҳамин ҳол, феҳрасти шахсони ҳуқуқӣ ва ё созмонҳое, ки бо терроризм алоқаманд ҳастанд, низ нав шудааст. Дар ин феҳраст, номи даҳ созмони дар Тоҷикистон мамнӯъ зикр шудааст. Ба фарқ аз рӯйхатти пешина ин бор номи “Паймони миллии Тоҷикистон” – эътилофи созмонҳои мухолифин дар хориҷа илова шудааст.

Додгоҳи олии Тоҷикистон моҳи октябри соли 2019 "Паймони Миллии Тоҷикистон", эътилофи ниҳодҳои мухолифи давлатро дар хориҷа созмони ифротгаро ва террористӣ эълон кардааст. Аъзои эътилоф ҳалномаро беасос хонданд.

Марафони дави Бостон тирамоҳ ҳам барпо намешавад

17 апрели соли 2017, гурӯҳи занон дар марафони Бостон ширкат мекунанд

Дар ИМА барои аввалин бор дар 124 сол баргузории марафони Бостон, ки ба 14 сентябр таъин шуда буд, бекор карда шуд. Дар ин бора шаҳрдори Бостон Мартин Уолш дар сайти расмии марафони дав хабар дод. Қаблан ҳам дави маъруфи серҷамъият бо сабаби пандемияи коронавирус аз 20 апрел ва 14 сентябр паспарто шуд, вале ҳоло ташаббускоронаш гуфтанд, ки онро ба шакли виртуалӣ баргузор мекунанд. Иштирокдорон бояд 42 километр масофаро дар 6 соат убур карда тасдиқи дави худро ба ташкилкунандагон фиристанд. Дар поёни он ба ширкатдорон футболка, нишон ва як рамзи давандаи марафон тақдим мешавад. Ҳар сол дар марафони Бостон даҳҳо варзишгари касбиву беш аз 30 ҳазор дӯстдорони дави варзишӣ иштирок ва беш аз як миллион нафар ҳамасола аз ин маросим мушоҳида мекунанд. Масъулон гуфтанд, ки ташкили чунин маъракаи серодам бо риояи меъёрҳои бехатарӣ ва фосилагирӣ имконнопазир хоҳад буд ва маълум аст, ки ин масъала то тирамоҳ ҳам ҳалли худро намеёбад. Марафони Бостон аввалин бор соли 1897 бо иштироки 15 нафар баргузор шуд. Соли 1918 бо сабаби ҷанги якуми ҷаҳон он ба шакли эстафета баргузор шуд. Соли 2013 баъди он ки дар марраи ниҳоии марафон ҳамлаи террористӣ рух дод, маърака боздошта шуд. Дар он ҳодиса се нафар кушта ва 300 нафар захмӣ шуд.

Трамп дар бораи қонуни амниятӣ дар Ҳонгконг як эълон хоҳад кард

Сокинони Ҳонгконг шадидан мухолифи қабул шудани қонун дар бораи амнияти миллӣ ҳастанд ва чандин рӯз эътироз карданд

Президенти ИМА Доналд Трамп гуфт, ки рӯзи 29 май дар як нишасти хабарӣ дар робита бо Чин ва қабули қонун оид ба амнияти миллӣ дар Ҳонгконг як эълон хоҳад кард. Трамп ваъда дод, ки дар робита бо қабул шудани қонун рӯзи 28 май як вокуниши тунд хоҳад кард, вале шарҳи бештар надод. Нигарониҳо вуҷуд дорад, ки Чин аз роҳи ин қонун озодии минтақаи Ҳонгконг ва мақоми нимамухтори онро барҳам мезанад. Трамп ҳақ дорад, ки ба имтиёзҳои Ҳонгконг нуқта гузорад, вале ҳоло маълум нест, ки оё ҳамин тавр хоҳад кард ё на. Эҳтимол меравад, Трамп таҳримҳои ҳадафмандона, тарруфаҳои нав ва маҳдудиятҳои бештарро болои ширкатҳои чинӣ ҷорӣ кунад. Анҷумани миллии мардумӣ рӯзи 28 май тарҳи қонунро қабул кард. Қонунгузории нав хиёнат, сарнагуншавӣ, ошӯб ва мудохилаи хориҷиро манъ мекунад. Он инчунин ба Пекин имкон медиҳад, ки барои ҷилавгирӣ аз эътирозҳо дар Ҳонгконг посгоҳҳои оҷонсиҳои амниятии маҳаллӣ таъсис шаванд. Сарвазири Чин Ли Кесян дар ташреҳи қонун гуфт, ки қонунгузорӣ субот ва шукуфоии шаҳрро тақвият хоҳад дод ва ба принсипи конститутсионии Чин дар қиболи Ҳонгконг оид ба "як кишвар, ду система" мувофиқат мекунад.

Президенти Косово ҳукми додгоҳи конститутсионӣ дар бораи нахуствазирро истиқбол кард

Ҳошим Тачӣ ва Албин Куртӣ

Президенти Косово Ҳошим Тачӣ ҳукми додгоҳи конститутсионии кишварро, ки бо таъини нахуствазири нав ба ҷои иҷрокунандаи вазифаи сарвазир Албин Куртӣ розӣ шуд, истиқбол намуд. Тачӣ гуфт, муҳим аст, ки ҳар иқдом мутобиқ бо конститутсияи Косово анҷом шавад. Ӯ дар изҳороти фейсбукии худ рӯзи 28 май гуфт, ки Косово дар муқобили чолишҳои зиёд қарор дорад, аз ин рӯ барои ташкили ҳукумати нав набояд вақти беҳуда сарф шавад.
Абдулло Ҳотӣ, ки Тачӣ нахуствазир таъин кард, ҳамчунин аз ин қарор истиқбол намуд ва гуфт, ки фурсати “ваҳдат ба хотири оянжаи давлат ва шаҳрвандони мо расидааст”. Ҳоло интизор меравад, ки ҳизби чапгарои “Худмухторӣ” ба нишони эътироз аз қарори додгоҳ ва бо талаби баргузории интихоботи пеш аз мӯҳлат мардумро ба эътирозҳои сартосарӣ даъват бикунад.

Ба ВКД-и Русия эҷоди замимаи рейтинги иҷтимоии муҳоҷиронро машварат доданд

Мардони тоҷики мунтазири кор дар канори Душанбе. 10 апрели соли 2020


Дар Русия коршиносоне, ки бо Вазорати умури дохилии ин кишвар ҳамкорӣ мекунанд, ба ин ниҳод пешниҳод карданд, ки замимаи вижа оид ба “баҳои иҷтимоӣ” ваё рейтинги иҷтимоии муҳоҷирони корӣ ҷорӣ шавад. РИА “Новости” менависад, ки ин замима метавонад як барномаи ҳатмӣ барои истифода шавад ва “рейтинги эътимоди иҷтимоӣ” ба муҳоҷирони корӣ гардад.

Замима бояд иттило дар бораи мақоми иҷтимоиву ҳуқуқии муҳоҷир, маълумоти биометрӣ, вазъи сиҳҳатӣ, қонуншиканиҳо ва ҷинояткориҳои аз ҷониби ӯ содиршударо дар худ гунҷоиш бидиҳад. Агар муҳоҷир нахоҳад, ки маълумот дар бораи ӯ ба замимаи “Мигрант” ворид шавад, рейтинг ё баҳои иҷтимоии ӯ поин меравад.
То эпидемияи коронавирус дар Русия бар асоси ҳисобҳои мухталиф аз 9 то 11 миллион муҳоҷир кор мекард. То соли 2024 аҳолии Русия танҳо аз ҳисоби муҳоҷирон метавонад зиёд шавад.
Таҷрибаи баҳодиҳии сартосарӣ то ҳол дар бархе манотиқи Чин таҷриба шудааст. Бар асоси таҳлили иттилои зиёд система ба ин афрод хариди билети нақлиёт, дастрасӣ ба таҳсил, кор дар сохторҳои давлатӣ ва ёрии иҷтимоиро иҷоза медиҳад. Вале ин низомро ҳомиёни ҳуқуқ дар Чин ва берун аз он ба шиддат интиқод мекунанд.

Пандемия: Аврупо маҳдудиятҳоро сабуку Осиё шадидтар мекунад

Беморхонаи Кавасаки дар Ҷопон

Дар ҳоле, ки кишварҳои аврупоӣ тадбирҳои маҳдудкунандаро тадриҷан сабук мекунанд, маҳдудиятҳои тоза ҷоришуда дар Осиё баёнгари он аст, ки охири пандемия ҳанӯз маълум нест. Шумори афроди бар асари COVID-19 фавтида дар саросари ҷаҳон аз марзи 360 ҳазор нафар гузашта олудагии беш аз 5,8 миллион нафар тасдиқ шудааст. Кореяи Ҷанубӣ, ки барои пайгирии қатъӣ аз бӯҳрони беҳдоштӣ ва роҳандозии тестҳои сартосарӣ, вале бидуни ҷорӣ кардани тадбирҳои шадиди маҳдудкунанда ситоиш мешуд, баъди чанд рӯзи баргашт ба таҳсил рӯзи 29 май беш аз 200 мактабро баста дубора донишҷӯҳоро барои таҳсили фосилавӣ ба хона баргардонид. Сеул гуфт, ки дар 24 соати гузашта дар ин кишвар 79 ҳодисаи нави олудагӣ ба қайд гирифта шуд ва ин омори баландтарин дар ду моҳи гузашта мебошад. Ҷопон, ки чанд рӯз пеш маҳдудиятҳоро бекор намуд, дар минтақаи Фукуока ҳодисаҳои нави олудагӣ ба вирусро ошкор кард.
Дар Аврупо коҳиши ҳодисаҳои олудагӣ ва марг бар асари коронавирус мушоҳида мешавад ва дар дар Фаронса нахуствазир Эдуард Филиппе гуфт, ки “озодӣ қоида ва маҳдудият истисно хоҳад буд”. Дар Фаронса аз ҳафтаи оянда нишастан дар ҳавлиҳои тарабхонаҳо ва зиёрат аз осорхонаҳо бо ниқоби тиббӣ иҷозат мешавад. Бритониё ҳам омода мешавад, ки ҳафтаи оянда кӯдаконро ба мактабҳо фиристода фурӯшгоҳҳоро дубора боз кунад. Дар Русия, ки 380 ҳазор ҳолати олудагии тасдиқшуда дорад ва баъди ИМА ва Бразилия дар ҷои сеюм аст, шумори марги инсонҳо дар Маскав дар моҳи апрел ду баробар бештар шуд. Мақомоти Маскав гуфтанд, ки шумори фавтидаҳо дар моҳи апрел на 639, балки 1561 нафарро ташкил додааст. Дар ИМА, ки шумори фавтидаҳо аз коронавирус аз 101 ҳазор нафар гузаштааст, мизони бекорӣ аз 40 миллион нафар ҳам гузашт. Дар Бразилия дар чор моҳи соли ҷорӣ панҷ миллион нафар бекор шуд. Дар Амрикои Лотинӣ вазъият вахим мемонад ва ин қора ба як нуқтаи доғ табдил шудааст.

Ҷеенбеков дар Ҷашни Ғалаба дар Маскав ширкат мекунад

Президентҳои Қирғизистон ва Русия. Акс аз бойгонӣ.

Президенти Қирғизистон Сооронбой Ҷеенбеков дар ҷашнҳои бахшида ба 75-солагии пирӯзӣ дар Ҷанги Дувуми Ҷаҳонӣ дар шаҳри Маскави Русия ширкат мекунад. Дар ин бора Толгонай Стамалиева, котиби матбуотии раиси ҷумҳури Қирғизистон хабар дод.

Пештар аз ин расонаҳои Русия ҳам навиштанд, ки Ҷеенбеков дар Ҷашни Ғалаба ширкат хоҳад кард.

Владимир Путин, президенти Русия эълом кард, ки Ҷашни Ғалаба 24 июн таҷлил шавад. Вай ҳамзамон ба зердастонаш дастур дод, ки омодагӣ бинанд. Ҷашни Ғалаба ҳамасола 9 май таҷлил мешуд, аммо густариши коронавирус соли ҷорӣ боиси таъхири таҷлили ҷашн шуд.

Дар Қирғизистон ва аксари кишварҳои пешини шӯравӣ чорабиниҳои оммавии бахшида ба 9 май соли ҷорӣ баргузор нашуданд.

Фавти чаҳор нафар дар як корхона дар Қазоқистон

Як корхона дар Қазоқистон. Акс аз бойгонӣ.

Чаҳор коргар дар корхонае дар вилояти Оқтеппаи Қазоқистон фавтида, ду тани дигар бистарӣ шудаанд. Дар ин бора аз раёсати назорат дар соҳаи меҳнат ва идораи ҳифзи сиҳатии вилояти Оқтеппа хабар доданд.

Ҳодисае, ки боиси марг ва бистарии коргарон шуд, рӯзи 28 май рух дод. Мақомот гуфтанд, ҳангоми поккории зарфи партовҳои кимиёӣ як коргар ҷароҳат бардошт ва панҷ тан аз ҳамкорони вай дохили зарф шуда, талоши наҷоти маҷруҳро карданд. Дар натиҷа ҳамаи ин коргарон аз ҳарорати моддаҳои кимиёӣ ҷароҳат бардоштанд, ки чаҳор танашон фавтида, ду тани дигар бистарӣ шуданд.

Мақомоти вилояти Оқтеппа гуфтанд, дар пайи ин ҳодиса парвандаи ҷиноӣ боз шуда, таҳқиқ идома дорад.

Корхонаи моддаҳои кимиёӣ дар канораи Оқтеппа ҷойгир аст, ки маҳсулоти кимиёӣ истеҳсол мекунад. Ин маҳсулот дар саноати ҳавопаймоӣ, нафтӣ ва дору истифода мешавад.

Беназмиҳои оммавӣ дар Миннеаполис баъди фавти як сиёҳпӯст

Беназмиҳо дар Миннеаполис. 27 май, 2020.

Дар шаҳри Миннеаполиси аёлати Миннесоти Амрико рӯзи севум аст, ки беназмиҳо идома доранд. Мардум баъди он даст ба беназмӣ заданд, ки сокини сиёҳпӯсти шаҳр Ҷорҷ Флойд пас аз боздошт аз сӯи пулис ба ҳалокат расид.

Флойди 46-сола пас аз боздошт зуд ба беморхона интиқол ёфта, 25 май ҷон бохт. Видеое, ки дар шабакаҳои иҷтимоӣ нашр шуд, нишон медиҳад Флойд бо дастони баста дар замин хобида, маъмурони сафедпӯсти пулис гардани ӯро зер кардаанд. Вай чанд бор мегӯяд, ки нафаскашияш мушкил шудааст ва ӯро раҳо кунанд. Ин сокини Миннеаполис ҳангоми боздошт мусаллаҳ набуд ва сабаби дастгиршуданашро сохтакории ҳуҷҷат меноманд.

Баъди оғози тафтиши ҳодиса аз сӯи Бюрои федеролии тафтишот чаҳор корманди пулис, ки дар боздошти Флойд даст доштанд, аз мақом барканор шуданд. Шаҳрдори Миннеаполис Ҷейкоб Фрей талаб кард, ки маъмурон ба ҷавобгарӣ кашида шаванд. Муовини пешини президент ва номзади эҳтимолӣ ба мақоми президентии ИМА Ҷо Байден даъват кард, ки пулисҳои барканоршуда барои "амали нафратоварашон" ба ҷавобгарӣ кашида шаванд.

Бетартибиҳои оммавӣ шоми 26 май оғоз шуда, то ҳол идома доранд. Эътирозгарон дар назди бинои пулис ҷамъ шуда, бархе аз онҳо ба самти бино санг ҳаво доданд. Кормандони пулис дар посух аз гази ашковар истифода карданд. Дар бораи харобкориҳо, ғорат ва оташ задани фурӯшгоҳҳо низ хабар дода мешавад.

Вазири адлияи ИМА рӯзи панҷшанбе гуфт, марги Ҷорҷ Флойд-ро таҳқиқ мекунанд.

Вазорати тандурустӣ гуфт, 139 нафари дигар бемор шуданд, талафот "нест"

Мақомоти Вазорати тандурустӣ гуфтанд, ки дар як шабонарӯзи гузашта 139 мавриди собитшудаи бемории COVID-19 – ро сабт кардаанд. Дар баёнияи вазорат аз рӯзи 28-уми май омадааст, ки то имрӯз теъдоди гирифторон ба 3563 нафар расид, вале талафот бетағйир мондааст.

Ба қавли мақомот, коронавируси нав то кунун сабаби марги 47 нафар дар Тоҷикистон шудааст ва 1674 кас шифо ёфтаанд. Мутахассисон ва теъдоди зиёде аз мардум ба дурустии омори расмӣ шубҳа доранд ва мегӯянд, миқёси сирояти беморӣ ва талафот бузургтар аст.

Як вебсайти навтаъсисе, ки маълум нест, кӣ сохтааст, https://kvtj.info/ гузоришҳо доир ба маргу мир дар замони пандемия дар Тоҷикистонро ҷамъ меорад ва бар асоси ҳисобҳои он аз замони сирояти беморӣ дар кишвар то кунун бештар аз 300 нафар ҷон додаанд.

Ҳамарӯза дар шабакаҳои иҷтимоӣ доир ба марги фарде дар ин ё он ҷо гузориш мерасад ва корбарон ҳам менависанд, ки сабаби марг “илтиҳоби шуш ва ё "коронавирус" будааст. Мақомоти Тоҷикистон бори аввал рӯзи 30-юми апрел гуфтанд, ки дар кишвар 15 мавриди сирояти коронавируси навро сабт кардаанд, ҳарчанд то ин рӯз доир ба марги чандин нафар аз бемории «илтиҳоби шуш» гузориш шуда буд.

Ёфтҳои бештар

XS
SM
MD
LG