Пайвандҳои дастрасӣ

Дар роҳи Душанбе – Хуҷанд як мошини сабукрав ба садама дучор шуд, ки дар пайи он 5 нафар кушта шудааст. Дар ҳодисаи дигар дар гарданаи Шаршари вилояти Хатлон 3 нафар ба ҳалокат расидаанд.

Хабарнигори Радиои Озодӣ дар вилояти Суғд Шоҳини Равшан хабар дод, ки ин ҳодиса дар шоҳроҳи Душанбе – Хуҷанд дар гарданаи Шаҳристони вилояти Суғд ба вуқӯъ пайвастааст.

Гуфта мешавад, як мошини сабукрави «Нива» ба сабаби харобӣ ва душворгузарии қисмате аз роҳ аз ҷодда берун шуда, аз баландии 800 метр ба ҷарӣ сарозер рафтааст.

Мақомоти бозрасии автомобилии вилоят таъйид карданд, ки 5 нафар сарнишини ин мошин, бо шумули ронандаи он Шуҳрат Маҳмудови 30-сола, дар ҷои ҳодиса ба ҳалокат расидаанд.

Дар ҳамин ҳол, бар тибқи иттилоъи Идораи Бозрасии автомобилии давлатии ВКД-и кишвар (ИБАД), дар гарданаи Шаршари вилояти Хатлон бар асари як ҳодисаи дигари садамаи автомобилӣ 3 нафар ба ҳалокат расидаанд.

Гуфта мешавад, ронандаи мошини сабукрави «Мерседес» Намоз Буйдоқов аз уҳдаи идораи мошин дар минтақаи ағбаи Шаршари ҷоддаи Душанбе – Кӯлоб намебарояд. Дар натиҷа мошин аз роҳ берун шуда, аз баландии 80 метр ба ҷарӣ меафтад ва бар асари ин садама 3 нафар – ронанда ва ҳамсару духтари шашсолаи онҳо – дар ҷои ҳодиса кушта мегарданд. Дар ҳамин ҳол ду писари ин хонавода бо ҷароҳатҳои вазнини ҷисмонӣ ба бемористони марказии ноҳияи Данғара интиқол дода шуданд.

Ин ҳам дар ҳолест, ки, бино бар иттилоъи ИБАД, дар таййи як ҳафта дар кишвар 42 ҳодисаи садамаи автомобилӣ қайд гардидааст, ки дар онҳо 14 нафар ҳалок ва 49 нафари дигар ҷароҳатҳои вазнини ҷисмонӣ бардоштаанд.

Назари хонандагон

New Comments Available

Агар сухане, назаре ё хабаре доред, бемалол ба мо занг занед ё SMS (паёмак) фиристед:

Дар Душанбе:

+992 988 65 94 63
+992 988 65 94 64

Дар Прага:

+420 724 053 959

Машваратдодашуда

XS
SM
MD
LG