Пайвандҳои дастрасӣ

Хабари нав

Хабарҳо

Амири Қатар ба Тоҷикистон меояд

hs

Ҳамад бин Халифа ал-Сонӣ, амири Қатар, як давлати арабӣ дар Халиҷи Форс бо як сафари расмӣ ба Тоҷикистон меояд.


Вазорати умури хориҷаи Тоҷикистон, ки ин хабарро ироа намудааст, тафсили бештаре оид ба аҳдоф ва барномаи сафари амири Қатар ба Тоҷикистон надодааст. Сафари амир ал-Сонӣ ба Тоҷикистон дар таърихи 27 август оғоз меёбад.


Моҳи майи соли ҳолӣ Эмомалӣ Раҳмон, раисҷумҳури Тоҷикистон аз Қатар боздиди расмӣ намуда буд. Дар ҷараёни он сафар, чаҳор санади ҳамкорӣ миёни Тоҷикистон ва Қатар дар соҳаҳои иқтисодиву тиҷоратӣ ва фаннӣ имзо шуда буд.

Ҳамаи хабарҳои имрӯзро дар инҷо бихонед

Дар Душанбе ва баъзе минтақаҳои дигари Тоҷикистон барф борид. ВИДЕО

Акс аз барфбории соли гузашта дар Сангвор. Моҳи апрели 2019

Шоми 8-уми апрел дар шаҳрҳои Душанбеву Панҷакент ва баъзе аз минтақаҳои дигари Тоҷикистон барф борид. Аз ҳоло кишоварзон ва сокинони деҳаҳо нигаронанд, ки сардии ҳаво метавонад ҳосили дарахтон ва зироати онҳоро нобуд кунад. Маркази обу ҳавошиносии Тоҷикистон эҳтимоли сард шудани ҳаво ва боридани барфро дар рӯзҳои 8 ва 9-уми апрел пешбинӣ карда буд. Бино иттилои марказ, "шаби 8-уми апрел ва субҳи 9-уми апрел дар водиҳои вилояти Хатлон, ноҳияҳои тобеи марказ ва вилояти Суғд эҳтимол барф меборад." Масъулони марказ мегӯянд, ҳавои сард ба Тоҷикистон аз Русия тавассути Қафқоз ворид шудааст. Хеле кам мешавад, ки дар моҳи апрел дар Тоҷикистон барф борад. Соли гузашта дар ҳамин моҳ дар ноҳияи Сангвори минтақаи Рашт барф борида буд.

Туркманистон машқҳои оммавӣ баргузор кард

Худи Қурбонгулӣ Бердимуҳаммадов ҳам гӯиё дучархасаворӣ баромадааст.

Рӯзи 7-уми апрел дар Туркманистон дар Рӯзи Ҷаҳонии Сиҳатӣ машқҳои оммавии варзишӣ баргузор карданд, ҳарчанд баръакси ин дар кишварҳои дигар барои роҳ надодан ба густариши коронавируси нав ба мардум дастур додаанд, ки аз ҳам фосила бигиранд.

Дар Туркманистон ба гуфтаи мақомот, ҳеҷ мавриди сирояти беморӣ сабт нашудааст ва ҳаргуна баррасии мавзуъ дар ин бора мамнӯъ аст. Рӯзи 7-уми апрел Қурбонгулӣ Бердимуҳаммадов, раиси ҷумҳури худкомаи Туркманистонро дар телевизион намоиш доданд, ки ҳамроҳ бо гурӯҳи хурде аз мақомоти расмӣ асп ва дучархасаворӣ мекард.

Худи ӯ фақат ҳафтаи гузашта бори аввал коронавирусро дар мазҳари ом ба забон овард. Матбуоти давлатӣ гузориш дод, ки дар шаҳри Ишқобод 3500 нафар ва дар тамоми Туркманистон 7000 нафар ҳамроҳ дучархасаворӣ кардаанд. Бахши туркмании Радиои Озодӣ гузориш дод, ки ҳафтаи гузашта маъмурони амниятӣ, ки либоси оддӣ ба бар доштанд, чанд касро, ки доир ба коронавирус гап мезаданд, бо худ бурданд.

Вирус Вуҳанро раҳо кард, гиребони Аврупову Амрикоро сар надодааст

Нақлиёти умумӣ дар Вуҳан ба кори маъмулӣ шурӯъ кард.

Дар шаҳри Вуҳони Чин, ки пандемияи коронавируси нав аз онҷо оғоз ёфт, муқаррароти манъи равуоро комилан бардоштанд. Айни замон теъдоди қурбониёни бемории КОВИД-19 дар Аврупо ва Иёлоти Муттаҳидаи Амрико ҳамчунон зиёд мешавад. Хотимаи маҳдудияти якмоҳаи равуо ва гаштугузор дар Вуҳон, маркази пайдоиши вирус, ки то кунун 82 ҳазор нафарро дар ҷаҳон куштааст, як нишонаи умедворкунанда ба ҳисоб меравад.

Аз тарафи дигар вирус ҳамчунон дар кишварҳои зиёде бедодгарӣ мекунад ва мардуми зиёдтарро мекушад. Бино ба омори расмӣ, коронавируси нав дар Вуҳон 50 ҳазор нафарро бемор кард ва аз ин миён 2500 нафарашон фавтидаанд. Вале мунтақидон мегӯянд, ҳукумати Чин рақамҳои воқеиро пинҳон доштааст ва матбуоти зери назари ҳукумат ҳам воқеиятро намегӯяд.

Дар Аврупо Борис Ҷонсон нахуствазири бемори Бритониё рӯзи дуввумашро дар шӯъбаи эҳёгарии шифохонае дар Лондон сипарӣ кард. Эдвард Аргар, вазири тандурустӣ гуфт, вазъи Борис Ҷонсон, ки аз бемории КОВИД-19 муолиҷа мегирад, “мӯътадил” ва “рӯҳияааш ҳам хуб аст”. Донишгоҳи Ҷон Ҳопкинси Амрико, ки иттилоъ дар бораи сироят ва маргумир аз бемориро ҷамъ мекунад, гуфт, рӯзи 7-уми апрел дар Иёлоти Муттаҳида 1800 кас аз ин беморӣ фавтиданд. То кунун КОВИД-19 дар саросари ин кишвар ҷони тақрибан 13 ҳазор нафарро гирифтааст.

Корхонаи "Трансформатор"-и Бохтар бозсозӣ мешавад. ВИДЕО

Корхонаи "Трансформатор"-и шаҳри Бохтар

Корхонаи "Трансформатор"-и шаҳри Бохтар баъд аз солҳои зиёд бозсозӣ шуда, дар назар аст, иқтидори истеҳсолиашро зиёд кунад. Ин корхонаи азим бо ширкатҳои русӣ қарордод бастааст.

Назаралӣ Давлатшоев, мудири корхонаи "Трансформатор"-и шаҳри Бохтар мегӯяд, "баъди азнавсозии корхона мо ҳам сифатан хуб мешавад, ҳам арзиши аслии маҳсулот арзонтар шавад ва ҳам дар бозори ҷаҳонӣ ҷойи худро меёбад".

Корхонаи саҳомии "Трансформатор" дар Бохтар яке аз азимтарин корхонаҳои тавлиди трансформаторҳо дар Тоҷикистон аст. Замони Шӯравӣ дар корхонаи "Трансформатор" зиёда аз 1200 нафар кор мекард.

Бино ба камбуди молӣ чанд соли пеш истеҳсолро ба маротиб кам карда, даҳҳо кормандро ба рухсатии бемузд фиристод. ​Шарофат Ҳасанова, корманди собиқи корхона, баъди солҳо дигарбора ба кор даъват шуд.

Корхонаи "Трансформатор"-и Бохтар бозсозӣ мешавад
лутфан мунтазир бошед

Феълан кор намекунад

0:00 0:02:26 0:00

Корхонаи "Трансформатор" соли 2017 дубора корро аз сар гирифт, вале то ҳол натавонистааст ба ҳолати пешина баргардад. Ба гуфтаи масъулони корхона, Тоҷикистон дар як сол ба ҳазор трансформатори нав ниёз дорад.

Феълан барои истеҳсоли истгоҳи барқӣ ё трансформатор маҳсулоти хомро аз Узбекистону Русия ва Чин меоранд. Харидорони асосии трансформаторҳо ширкати “Барқи тоҷик” аст.

Соли 2016 Кумитаи давлатии сармоягузорӣ саҳмияҳои корхонаи “Трансформатор”-ро ба фурӯш гузошт, вале бо талоши роҳбарияти феълиаш корхона аз тендер ё музояда гирифта шуд ва бо сармояи хусусӣ дигарбора ба кор идома дод. Шарти асосӣ ин буд, ки корхонаро дубора фаъол ва шумораи коргаронро бештар кунад. Масъулини корхона умедворанд, бо фаъол шудани нерӯгоҳҳои барқӣ ва бекор шудани маҳдудияти барқ дар Тоҷикистон, кори ин корхона ҳам дубора равнақ меёбад.

Дар Покистон 7 ҷангҷӯро кушта, силоҳҳояшонро гирифтаанд

Вазиристони Шимолӣ борҳо саҳнаи ҳамлаву бомбгузориҳои хунин шудааст.

Артиши Покистон мегӯяд, бо юриш ба ду пинҳонгоҳи Толибон дар марзи Афғонистон 7 нафари онҳоро кушт. Дар баёнияи расмӣ аз рӯзи 7-уми апрел омадааст, ки чаҳор ҷангҷӯро дар вилояти Вазиристони Шимолӣ куштанд, ки дар солҳои гузашта ба пойгоҳи чанде аз гурӯҳҳои ифротии дохилӣ ва хориҷӣ табдил ёфтааст.

Се ифротгарои дигар дар минтақаи қабоилнишини Муҳманд нобуд карда шудаанд. Дар баёнияи артиши Покистон омадааст, ки нерӯҳои амниятӣ ҳамчунин аз ҳарду пинҳонгоҳ аслиҳа ёфта ва мусодира кардаанд. Ҳоло маълум нест, ифротгароёни маҳвшуда узви кадом гурӯҳе будаанд. Хабари артиши Покистонро аз дигар манобеъ тасдиқ кардан, имконнопазир аст.

Рӯҳонӣ хост, IMF барои иқтисоди беҳоли Эрон зудтар қарз бидиҳад

Рӯҳоние дар ҳоли истироҳат дар Исфаҳон.

Ҳасан Рӯҳонӣ, раиси ҷумҳури Эрон аз Сандуқи Байналмилалии Пул хост, ба кишвараш қарзи чанд миллиардоллариеро ихтисос бидиҳад, ки барои мубориза бо хуруҷи бемории КОВИД 19 тақозо кардааст. “Ӯ рӯзи 8 -уми апрел дар нишасти ҳукумат, ки дар телевизион намоиш доданд, гуфт: “Мо узви Сандуқи Байналмилалии Пул ҳастем. Ва инҷо дар қарз додан набояд ҳеҷ табъизе вуҷуд дошта бошад.”

Бонки Марказии Эрон моҳи гузашта аз Сандуқи Байналмилалии Пул хост, аз хазинаи кӯмакҳои фаврии махсус барои мубориза бо коронавирус 5 миллиард доллар қарз бидиҳад. Эрон яке аз кишварҳоест, ки гирифторону қурбониёни КОВИД-19 дар он бисёр зиёд аст. Ба гуфтаи мақомот, то кунун вирус ба 62 500 нафар сироят карда ва 3800 касро куштааст, вале мутахассисон мегӯянд, ки Эрон ҳақиқатро пинҳон медорад ва миқёси густариши вирус васеътар аз он аст, ки гуфта мешавад.

Пандемияи коронавирус ҳоли иқтисоди Эронро, ки аз таҳримоти иқтисодии Амрико сахт осеб дида буд, бадтар кард. Амрико соли 2018 аз созиши байналмилалии атомӣ бо Эрон хориҷ шуд ва таҳримоти иқтисодӣ ба зидди ин кишварро барқарор кард.

Вазирони Еврогруп ба созиш нарасиданд

Вазирони молияи кишварҳои узви Иттиҳоди Аврупо бо вуҷуди гуфтугӯҳои дароз дар бораи барномаи наҷоти иқтисоди иттиҳод аз бӯҳрони пешовардаи коронавирус сари қабули барнома ба созиш нарасиданд. Гуфтугӯҳои вазирон то субҳи 8-уми апрел идома кард. Марио Сентено, раиси Еврогруп ҳавзаи кишварҳои евро гуфт, “Баъд аз 16 соат мубоҳиса мо ба созиш наздик шудем, вале ҳоло ба даст наёмадааст. Ба гуфтаи ӯ, баррасии барнома рӯзи 9-уми апрел идома мекунад.

Бо афзоиши фишор барои коҳиши паёмадҳои карантини саросарӣ ба вазъи иқтисодӣ ва иҷтимоӣ дар Аврупо, вазирон рӯзи 7-уми апрел видеоконфронс баргузор карданд. Марио Сентено, гуфт, ки масъалаи таъсиси “тӯри эминии молӣ” -и 540 миллиард евроӣ дар миён аст. Масъалаи ихтилофи назар нашри авроқи гаронбаҳои муштараки Аврупо ба истилоҳ “коронабонд” аст.

Кишварҳои қарздори сахте ба мисли Итолиё ва Испониё мехоҳанд, дар ин замони сахт ба онҳо ҳамраъйӣ нишон дода, бори қарзи онҳоро сабуктар кунанд. Фаронса ҳам тарафдори ин пешниҳод аст, вале кишварҳои сарватманди Иттиҳодияи Аврупо ба мисли Олмон, Ҳолланд, Австрия ва Финландия ингуна пешниҳодро қабул надоранд, чун ба тахмини ин кишварҳо мумкин аст, дар ниҳояти амр молиётсупорандагони онҳо, қарзи кишварҳои заифтару осебпазири Иттиҳодияи Аврупоро бипардозанд.

Нахуствазири Бритониё ҳанӯз ҳам дар шӯъбаи эҳёгарӣ аст

Борис Ҷонсон чанде пеш ба бемории КОВИД-19 гирифтор шуд.

Борис Ҷонсон, нахуствазири Бритониё рӯзи дуввуми худро дар шӯъбаи эҳёгарии шифохонае дар шаҳри Лондон сипарӣ кард. Айни замон дар рӯзи 7-уми апрел дар он тарафи уқёнус дар Амрико теъдоди қурбониёни бемории КОВИД-19 аз 4000 нафар ҳам гузашт. Дар дигар гӯшаҳои ҷаҳон аз ҷумла Аврупо, манъи равуои зиёд ва нигаҳдории фосила аз ҳамдигар натиҷа додааст, ки суръати густариши вируси хатарнок сусттар мешавад.

Вазъи сиҳатии нахуствазири Бритониё, яке аз раҳбарони шинохта дар ҷаҳон, ки чанде пеш вирус ба ӯ ҳам сироят кард, ба қавли сухангӯяш “мӯътадил” аст ва ӯро барои “назорати дақиқ дар шӯъбаи эҳёгарӣ нигаҳ медоранд”. Дар саросари Бритониё то ҳол бештар аз 55 ҳазор нафар бемор шудаанд ва 6200 каси онҳо ҷон додаанд.

Дар шаҳри Ню Йорк дар як рӯз тақрибан 1000 нафар фавтид ва теъдоди қурбониён аз 4000 ҳазор тан гузашт. Дар саросари Амрико КОВИД-19 дар маҷмӯъ тақрибан 13 ҳазор нафарро кушта ва ба 400 ҳазор кас сироят кардааст. Омори мазкурро Донишгоҳи Ҷон Ҳопкинси Амрико ҷамъ меорад.

Мурофиаи додгоҳии Далер Шарифов ҳафтаи оянда оғоз мешавад

Далер Шарифов

Мурофиаи нахустини додгоҳии Далер Шарифов, рӯзноманигори боздоштшудаи тоҷик, рӯзи 13-уми апрел дар Додгоҳи ноҳияи Шоҳмансури пойтахт баргузор хоҳад шуд. Дар ин бора вакилони мудофеи Маркази мустақил оид ба ҳифзи ҳуқуқи инсон, ки аз ҳаққи Далер Шарифов ҳимоят мекунанд, хабар доданд.

Шарифов аз моҳи январ боз дар боздоштгоҳ аст. Маълум нест, мурофиаи ӯ паси дарҳои пӯшида мегузарад ва ё озод бо иштироки наздикону хабарнигорон.

Далер Шарифов расман ба барангехтани кинаву адовати миллӣ ва мазҳабӣ муттаҳам аст. Қонуни ҷиноии Тоҷикистон барои ин иттиҳом то 5 соли зиндонро пешбинӣ кардааст.

Наздикон ва созмонҳои ҳомии ҳуқуқи хабарнигорон ин иттиҳомро беасос медонанд ва озодии ҳарчи зуди ӯро талаб доранд.

Далер Шарифов, хабарнигори 32-солаи тоҷикро рӯзи 28-уми январи имсол дастгир карданд.

Созмонҳои ҳомии ҳуқуқ ва озодии баён аз боздошти Далер Шарифов изҳори нигаронӣ карда, борҳо аз мақомоти Тоҷикистон раҳоии ӯро талаб кардаанд.

Толибон аз идомаи гуфтугӯ бо ҳукумати Афғонистон даст кашидаанд

Гурӯҳе аз зиндониёни Толиб ҳангоми ибодат дар зиндони Пули Чархӣ дар шаҳри Кобул. Акс аз рӯзи14-уми соли 2019.

Гурӯҳи Толибон ҳайати худро аз Кобул бозхондаанд ва чанд соат баъд аз он ки гуфтанд, музокирот дар бораи табодули асирон бо ҳукумат қатъ шуд. Табодули асирон тадбири аслӣ барои музокироти сулҳ миёни ду тараф аст, ки бо мусоидати Амрико ба роҳ андохта шуд.

Гурӯҳи 3 нафарии Толибон дар шаҳри Кобул бо чанде аз намояндагони ҳукумати Афғонистон дар бораи озод кардани зиндониёни Толиб гуфтугӯ доштанд. Суҳайл Шоҳин, сухангӯи дафтари Толибон дар Қатар рӯзи 7-уми апрел дар Твиттер навишт, ҳайат “ҳамин лаҳза” аз музокирот даст мекашад. Ба гуфтаи ӯ, зиндониёну асирони Толибро бояд то ҳол озод мекарданд, вале “тарафҳои марбута дониста” ин корро ба таъхир меандозанд.

Аз ин пештар Суҳайл Шоҳин дар Твиттер навишт, ки Толибон дар “мулоқотҳои беҳосил” ширкат нахоҳанд кард ва гуфт, ки сабаби таъхир дар раҳоии зиндониён ҳукумати раиси ҷумҳур Ашраф Ғанӣ аст. Ду тараф аз ҳафтаи гузашта саъй доштанд, қарори табодули асиронро ниҳоӣ кунанд. Воҳид Умар, яке аз мушовирони Ашраф Ғанӣ гуфт, ҳукумат раҳоии зиндониёнро ҳамчун бахше аз музокироти васеъ бо Толибон қабул дорад. Ӯ рӯзи 7-уми апрел гуфт, зиндониёни Толибро замоне озод мекунанд, ки ин гурӯҳ “қадаме ба сӯи пеш бардорад.”

Дар Чехия теъдоди гирифторони КОВИД-19 ба 5033 нафар расид

Дар Чехия пӯшидани ниқоби тиббӣ дар кӯчаву нақлиёт ҳатмист.

Вазорати тандурустии Чехия мегӯяд, теъдоди мубталоёни бемории КОВИД-19 ба 5033 нафар расидааст ва аз ин миён 91 нафари онҳо фавтидаанд. Беморие, коронавируси нав бармеангезад, то кунун гиребони 181 нафарро сар додааст.

Порлумони Чехия рӯзи 7 - уми апрел бо қабули як қарор вазъи фавқуллодаро, ки рӯзи 11 - уми апрел ба поён мерасид, 19- рӯзи дигар ва то 30 - уми апрел тамдид кард. Ҳукумати ҷумҳурӣ пешниҳод кард, ки қарздорон, аз ҷумла онҳое, ки барои харидани хона қарз гирифтаанд, то 6 моҳ пардохти қарзи моҳонаро ба таъхир андозанд ва бонкҳо ҷаримае ҳам барои таъхир наситонанд.

Ҳукумати Чехия ҳамчунин дар андешаи сабуктар кардани муқаррароти карантин аст ва мехоҳад, баъзе аз мағозаҳо ва муассисаҳое, ки мардуми зиёд онҷо ҷамъ намеоянд, боз карда шавад. Суръати густариши коронавирус дар ин кишвар сусттар шудааст ва талош барои он идома дорад, ки таъсири бӯҳрон ба иқтисод камтар шавад.

ИМА ба Туркманистон барои мубориза бо вирус наздики $1 млн медиҳад

Ишқобод, Туркманистон, моҳи марти 2020.

Амрико бо ҳадафи мубориза бо коронавирус ба Туркманистон 920 ҳазор доллар медиҳад. Дар ин бора сафорати ИМА дар Туркманистон хабар дод.

Маблағи ҷудошуда барои таҳияи озмоишгоҳҳо, ташхиси гирифторӣ ба бемориҳои гузаранда, хабар додан аз хатарҳо ва ғайра сарф мешавад.

Дар хабари вазорат омадааст, ки айни ҳол ҳукумати Туркманистон расман ҳолатҳои гирифторӣ ба COVID-19 -ро дар кишвар тасдиқ намекунад ва эҳтимол дорад, дар сурати ошкор шудани гирифторӣ низ тасдиқ накунад.

Ҳукумати он кишвар ахиран тадбирҳоеро барои пешгирӣ аз паҳншавии вирус роҳандозӣ кард, аммо ҳамзамон дар Туркманистон чорабиниҳое бо ширкати шумораи зиёди одамон баргузор мешавад, пӯшидани ниқоби тиббӣ манъ аст ва хонандагонро баъди анҷоми таътили баҳорӣ дубора ба мактаб даъват карданд.

Ҳукумати он кишвар ҳам пӯшидани ниқобро дар кӯчаҳо ва ҳам фурӯши онро дар дорухонаҳо манъ кардааст. Ба ин тартиб, ба забон овардани вируси корона дар Туркманистон ғайрирасмӣ мамнуъ шуд. Аммо расонаҳои маҳаллӣ хабар медиҳанд, ки бемориҳое монанд ба нишонаҳои коронавирус дар чанде аз минтақаҳои Туркманистон ба қайд гирифта шудааст.

Ҳушдори Назарбоев аз паёмадҳои коронавирус

Нурсултон Назарбоев.

Президенти пешини Қазоқистон Нурсултон Назарбоев гуфт, таъсири коронавирус ё худ COVID-19 ба иқтисоди ин кишвар аз буҳрони ҷаҳонии молии соли 2008 сахттар хоҳад буд.

"Аз ҳоло мо бояд фикр кунем, ки баъди ин чи кор хоҳем кард. Иқтисод поин меравад. Шояд аз буҳрони молии соли 2008 дида сахттар шавад", - гуфт Назарбоев 7 апрел дар суҳбат бо сарвазири Қазоқистон Аскар Мамин.

Ба гуфтаи Назарбоев, ба ҳукумат дастур дод, ки сокинонро бо маводи ғизоӣ ва тиббӣ таъмин кунад. Ӯ ҳамчунин гуфт, ки 8 апрел матлаб ва паёмеро ба мардуми кишвараш нашр хоҳад кард. "Ҳоло барои тамоми ҷаҳон мушкил аст. Бинобар ин, мо бояд сабр ва якдигарро эҳтиром кунем", - афзуд Назарбоев.

Ин изҳороти Назарбоев баъди он нашр шуд, ки навбатпоии сокинони Қазоқистон дар назди бонкҳо барои дарёфти кумакпулӣ ба ҷанҷол печид. Ҳукумати ин кишвар ба онҳое, ки ба иллати коронавирус тиҷорат ва ҷои кори худро аз даст додаанд, кумакпулӣ дар ҳаҷми $95 ваъда кард.

Бино ба иттилои расмӣ, дар Қазоқистон то 7 апрел 697 ҳолати мубталошавӣ ба коронавирус сабт шудааст.

Дар Узбекистон шумораи гирифторон ба коронавирус ба 520 тан расид

Узбекистон барои муқобила бо вирус муқаррароти сахт ҷорӣ кардааст.

Вазорати тандурустии Узбекистон гуфт, то 7-уми апрел дар ин кишвар 520 ҳолати мубталошавӣ ба вируси корона ба қайд гирифта шудааст. Ба огаҳии Вазорати умури хориҷии Узбекистон, 23 шаҳрванди ин кишвар низ, ки дар хориҷ қарор доранд, ба вируси корона мубтало шудаанд.

Ин узбекистониҳо дар ИМА (10), Покистон (5), Қазоқистон (2), Австрия (1), Арманистон (1), АМА (1), Куриёи Ҷанубӣ (1), Русия (1) ва Тайланд (1) ба коронавирус мубтало шудаанд. Пештар дар бораи ҳалокати се узбекистонӣ аз коронавирус дар Ню-Йорк хабар дода шуд.

Вазорати умури хориҷии Узбекистон аз ҳамаи шаҳрвандони ин кишвар дар хориҷ даъват кардааст, ки талаботи мақомоти маҳаллиро дар мубориза зидди коронавирус иҷро карда, аз рафтан ба ҷойҳои серодам худдорӣ кунанд.

Дар Самарқанд 52 хона зери об монд

Обхезӣ дар Самарқанд. 7 апрел, 2020.

Дар шаҳри Самарқанди Узбекистон рӯзи 6-уми апрел дар натиҷаи борони сахт 52 хона зери об монд. Мақомоти ҳолатҳои фавқулоддаи Узбекистон 7-уми апрел хабар доданд, ки хонаҳоро аз обу лой тоза кардаанд.

"Дар натиҷаи борони сахт оби рӯдхонаи "Чашма", ки аз миёни маҳаллаи "Кулолон"-и Самарқанд мегузарад, баланд шудааст. Оби рӯдхонаи "Сиёбча" низ баланд шуда, ҳаракати воситаҳои нақлиётро мушкил сохт", - омадааст дар иттилоияи Вазорати ҳолатҳои фавқулодаи Узбекистон.

Ба огаҳии вазорат, дар бартараф кардани оқибатҳои офати табиӣ 84 корманд, 11 техникаи махсуси мақомоти ҳолатҳои фавқулодда, 83 корманди мақомоти маҳаллӣ ва 12 воситаи нақлиёт иштирок доштанд.

Дар бораи ҳаҷми хисороте, ки сокинон дар пайи омадани сел дидаанд, чизе гуфта намешавад.

Даъвати ҳомиёни ҳуқуқи Қазоқистон ба озодии зиндониён дар шароити коронавирус

Зиндоне дар шаҳри Нурсултон

Ҳомиёни ҳуқуқи қазоқистонӣ аз ҷомеаи ҷаҳонӣ хостанд, ки дар пайи густариши вируси корона аз мақомоти Қазоқистон озодии зиндониён ва қатъи таъқибҳои сиёсиро талаб кунанд.

Дар изҳороте, ки рӯзи 6 апрел нашр шуд, ҳомиёни ҳуқуқи Қазоқистон гуфтанд, аз 16 март ба ин тараф - аз замони эъломи ҳолати фавқулода дар он кишвар - ҳадди ақал 32 ҳолати боздошти фаъолон сурат гирифтааст.

Ба бовари ҳомиёни ҳуқуқ, "мақомоти Қазоқистон дар ивази мубориза бо вируси корона ба таъқиби мухолифони сиёсӣ машғуланд".

Ҳомиёни ҳуқуқ ҳамзамон гуфтаанд, ки дар шароити паҳншавии вируси корона маҳбусон қишри осебпазир ҳастанд ва бояд шартан озод шаванд.

Дар Қазоқистон то имрӯз 670 ҳолати гирифторӣ ба вируси корона сабт шудааст. Чанде аз шаҳрҳо, аз ҷумла Алмато ва Нурсултон ба карантин гирифта шудаанд. Дар ин шаҳрҳо равуои сокинон маҳдуд ва фаъолияти бисёре аз корхонаҳо манъ шудааст.

Узбекистон наметавонад шаҳрвандони дармондаашро баргардонад

Акс аз бойгонӣ

Комиссияи махсуси ҷумҳурявии Узбекистон оид ба таҳияи барномаҳои пешгирӣ аз паҳн шудани коронавирус тасмим гирифт, ки аз 30 март то 20 апрел фаъолияти тамоми фурудгоҳҳо ва парвози ҳавопаймоҳо ба ин кишвар манъ карда шавад.

Дар иттилоияи ситоди фаврии мубориза бо коронавирус дар Узбекистон гуфта нашудааст, ки рӯзҳои наздик барои баргардонидани шаҳрвандони дармондаи ин кишвар дар хориҷ парвозҳои махсус анҷом мешавад.

​Дар ҳамин ҳол гуруҳи шаҳрвандони Узбекистон, ки дар Русия, Туркия, Бритониё ва АМА дармондаанд, дархости кумак доранд. Беш аз 20 ӯзбекистонӣ аз ҳукумати кишвари худ дархост доранд, ки тавассути парвози махсус онҳоро ба ватан баргардонад.

Як гуруҳи узбекистониҳои дигар низ бо нашри як муроҷиатномаи видеоӣ аз Дубай гуфтанд, аз 10 март ба ин сӯ дар он шаҳр дармонда, наметавонанд ба ватан баргарданд. "Зеро кормандони сафорати Узбекистон тавассути парвозҳои махсус шиносҳои худро фиристоданд", - изҳор доштанд баъзе аз онҳо.

"Шумори узбекистониҳои дармонда дар хориҷ чанд ҳазор аст. Инҷо сухан на танҳо дар бораи баргардонидани онҳо, балки дар бораи ташкили макони карантин низ меравад. Барои ин ҳама иншоот ва сармоя лозим аст. Ҳоло ҳукумат аз ҳисоби худ баргаштаҳоро дар каратин нигаҳ медорад. Вале ҳама чиз ҳадду ҳудуд дорад. Давлат барои ҳамаи онҳо маблағ аз куҷо меёбад? Бинобар ин, ҳоло дар ин масъала "танаффус" эълом шудааст", - изҳор дошт як мансабдори узбек дар шарҳи барнагардонидани узбекистониҳои дармонда.

Вазорати умури хориҷии Узбекистон низ ба шаҳрвандони дармондаи ин кишвар дар хориҷ иттилоъ дод, ки ҳама гуна парвозҳо то 20 апрели соли равон қатъ карда шудааст.

Амрико ба Тоҷикистон барои пешгирӣ аз коронавирус $866 000 дод. ВИДЕО

Ҷон Марк Поммершайм, сафири Амрико дар Тоҷикистон

Ҳукумати Амрико барои мусоидат ба омодагии Тоҷикистон ҷиҳати муқобила бо коронавирус 866 ҳазор доллар ​ҷудо кард.

Ҷон Марк Поммершайм, сафири Амрико дар Душанбе, рӯзи 7-уми апрел дар ин бора иттилоъ дод.

Ӯ гуфт, ин маблағ тавассути Оҷонси Амрико оид ба рушди байналмиллалӣ (USAID) ва ҳамкоронаш дар Тоҷикистон -- Abt Associates, Салиби Сурх ва Созмони Ҷаҳонии Тандурустӣ -- дастрас хоҳад шуд.

"Маблағ барои омӯзиш додани пизишкону парасторон ва хариди дастгоҳҳои зарурӣ дар бемористонҳо пешбинӣ шудааст", - илова кард ӯ.

Сафири Амрико дар идома гуфт, ки Иёлоти Муттаҳида ҳамкорӣ ва дӯстӣ бо мардуми Тоҷикистонро арҷ мегузорад ва ба ироаи кумакҳояш дар шароити коронавирус ҳам идома хоҳад дод.

То ин дам Бонки Ҷаҳонӣ барои омодагии Тоҷикистон ҷиҳати муқобила бо коронавирус беш аз 11 миллион доллар ва Олмон як миллион евро кумак кардаанд. Бонки Осиёии Рушд 100 ҳазор доллар ва Русия беш аз 20 ҳазор тест ё маводи ташхиси коронавирус ва ЮНИСЕФ либосу ашёи муҳофизатӣ доданд.

Як ҳамсуҳбати Радиои Озодӣ, ки аз ҷузъиёти музокироти Тоҷикистон бо созмонҳои байнулмилалии молӣ огоҳ аст, рӯзи 2-юми апрел гуфт, айни замон ҳукумат барои дарёфти кумак бо Сандуқи Байналмилалии Пул ва Бонки Исломии Рушд низ вориди гуфтугӯ шудааст.

Дар Минск ду муовини додситон барои қочоқи маводи мухаддир ба ҷавобгарӣ ҷалб шуданд

Бинои додгоҳе дар Беларус

Ду муовини додситони шаҳри Минск, пойтахти Беларус дар робита бо иттиҳоми даст доштан дар маводи мухаддир боздошт шуданд. Дар изҳороти рӯзи 6 апрел Додситонии кулли Беларус гуфт, ки муовинони додситонҳои ноҳияҳои Ленин ва Советскии шаҳри Минск бар асоси моддаи “истеҳсоли ғайриқонунӣ, ҳифзу интиқол ва қочоқи маводи нашъадор” гумонбар дониста мешаванд. Ин парванда то панҷ соли зиндонро пешбинӣ мекунад.

Исми ин ду мақом нашр намешавад, вале дар хабари расмӣ гуфта шудааст, ки онҳо аз мақом сабукдӯш ва ба ҳабс гирифта шуданд. Моҳи август дар як суханронии интиқодиаш президент Аляксандр Лукашенка сохторҳои ҳифзи қонунро барои нокомӣ дар мубориза бо таҳқиқи қазияҳои марбут ба қочоқи маводи мухаддир интиқод карда буд. Декабри соли 2016 дар миёни 17 маҳкумшуда барои ташкили як шабакаи муташаккили қочоқбарони маводи мухаддир ду афсари собиқи КГБ ва як афсари пешини полис ҳам муҷозот шуданд.

HRW гуфт, Аслам Форуқӣ бояд дар додгоҳи одилона муҳокима шавад

Абдулло Оракзай, маъруф бо лақаби Аслам Форуқӣ рӯзи 4 апрел ҳамроҳ бо ду фармондеҳ ва 19 шӯришии дигар боздошт шуд

Созмони Дидбони ҳуқуқи башар (Human Rights Watch) аз мақомоти Афғонистон тақозо кард, ки раҳбари гурӯҳи “Давлати исломии вилояти Хуросон”-ро, ки як ташаккули вобаста ба гурӯҳи “Давлати исломӣ” мебошад, бар асоси иттиҳоми ҷинояти ҷангӣ ба ҷавобгарӣ кашанд.

HRW рӯзи 6 апрел бо пахши изҳороте гуфт, ки Афғонистон бояд Аслам Форуқиро, ки ду рӯз пеш дар вилояти Қандаҳор боздошт шуд, бар асоси муқаррароти байналмилалии ҳуқуқи башар бо мурофиаи одилона таъмин кунад.


Исми воқеии Форуқӣ Абдуллоҳ Оракзай буда, июли соли 2019 раҳбарии созмони ба ном “Давлати исломии вилояти Хуросон”-ро ба ӯҳда гирифтааст. Ин гурӯҳ масъулияти чандин ҳамла дар саросари Афғонистонро ба ӯҳда гирифта даҳҳо мардуми мулкиро ба қатл расонидааст.

Патрисиа Госсман, яке аз мудирони бахши Осиёи HRW гуфт, боздошти Форуқӣ “барои ҳукумати Афғонистон имконият медиҳад, ки тавонмандии худро дар таъмини адолат нисбати қурбониҳои ҷиноятҳои ҷангӣ ва дигар беқонуниҳо ба намоиш гузорад”. Госсман гуфт, ки имкони дар додгоҳ баёнот додани осебдидаҳои ҷиноятҳои Форуқӣ хеле муҳим мебошад.

Ҷоизаи Радиои Азаттик ва ҳамкоронаш барои таҳқиқоти журналистӣ 

Нашри қисми аввали таҳқиқот журналистӣ рӯзи 25 ноябри соли 2019 мардумро бо талаби мубориза бо фасод ба майдони Алатоои шаҳри Бишкек баровард

Тими муштараки журналистони бахши Қирғизии Радиои Озодӣ - Аззаттик, Маркази таҳқиқоти фасодкорӣ ва ҷиноятҳои созмонёфта (OCCRP) ва сомонаи қирғизии Kloop.kg бо ҷоизаи ба номи Том Реннер мукофотонида шуданд, ки аз ҷониби созмони амрикоии Гузоришгарону сардабирони таҳқиқгар (Investigative Reporters and Editors - IRE) таъсис шудааст.

Ин ҷоиза барои як силсила гузоришҳои таҳқиқотии журналистон дар бораи фош шудани шабакаи аз кишвари нодори Қирғизистон хориҷкунандаи миллионҳо доллар пулҳои нақд тақдим шуд.

IRE рӯзи 6 апрел дар изҳороте гуфт, ки силсилатаҳқиқоте зери унвони “Ғоратгарӣ ва сарпарастӣ дар қалби Осиёи Марказӣ” фошкории воқеии амалҳоест, ки мардум “аз тарси куштор намехоҳанд, ки гуфта шавад ва бешубҳа барои журналистон ҳам хатар эҷод мекунад”.

Дар ин таҳқиқи журналистӣ соҳибкори уйғуртабори 37-сола аз Шинҷони Чин Айкере Сайматӣ, ки бо пулшӯӣ машғул будааст, нақл мекунад, ки чигуна миллионҳо доллар маблағро аз Қирғизистон берун бурдааст”. Дар ин шабака исми чандин нафари бонуфуз, аз ҷумла мақомдорон ҳам фош мешавад.

Сайматӣ ноябри соли 2019 дар Истамбул кушта шуд, вале пеш аз он як баста санадҳоеро ба дасти журналистон дод, ки дар он нақшаи берун бурдани пулҳо аз Қирғизистон фош мешавад.

Макрон аз Эрон хост, эҳтироми уҳдадориҳои ҳастаиашро ба ҷо орад

Маркази табдили ураниуми Фарду дар Қуми Эрон

Эммануэл Макрон, президенти Фаронса, аз Эрон хост, дар фурсате ки тамаркузи ҷаҳон ба буҳрони коронавирус равона шудааст, эҳтироми уҳдадориҳои ҳастаиашро ба ҷо орад.

Дар як суҳбати телефонии 6-уми апрел бо президенти Эрон, Макрон ба раиси ҷумҳурӣ Ҳасани Рӯҳонӣ гуфт, ки ҷомеаи байналмилалӣ бояд дар мубориза бо тавсеаи вирус ҳамкорӣ кунад.

Дар изҳороти ҳукумати Фаронса гуфта шудааст, Макрон изҳори умед кард, ки Эрон "мутобиқ ба уҳдадориҳои ҳастаии соли 2015 амал карда, аз ҳама гуна иқдоми нав худдорӣ мекунад" ва ҷомеаи ҷаҳонӣ "барои коҳиши таниши минтақавӣ" саҳмгузор хоҳад шуд.

Дафтари президенти Эрон хабар дод, ки дар ин гуфтугӯ Рӯҳонӣ ба муборизаи ҳамоҳангшудаи ҷаҳонӣ ба зидди коронавирус даъват ва дархости кумак кардааст. Рӯҳонӣ гуфтааст, "бе ҳамкории ҷаҳонӣ ва табодули таҷрибаи ҳамдигарӣ мо дар ин марҳилаи буҳронӣ дастболо нахоҳем шуд".

Рӯзи 6-уми апрел созмони Дидбони Ҳуқуқи Башар (Human Rights Watch) аз Амрико тақозо кард, ки Вашингтон таҳримҳои ҷоришуда боло Эронро сабуктар кунад.

Вашингтон баъд аз он ки соли 2018 аз созиши ҳастаӣ бо Эрон берун шуд, таҳримҳо ба зидди ин кишварро боз ҳам сангинтар кард.

Дидбони ҳуқуқи башар аз Иёлоти Муттаҳида хост, номгӯи маҳсулоти озод аз таҳримҳоро бештар карда, дар замони пандемияи коронавирус дастрасии ин кишварро ба захираҳои зарурии башарӣ таъмин кунад.

Президенти ИМА Доналд Трамп ба Эрон ёрии башардӯстона пешниҳод кард, вале Эрон аз ин ёрӣ даст кашид.

Толибон гуфтанд, музокираи табодули зиндониҳоро қатъ мекунанд

Декабри соли 2019. Толибони маҳбуси зиндони Пули Чархии Кобул

Толибон гуфтанд, музокира бо ҳукумати Афғонистон, ки бо миёнҷигии ИМА ба хотири табодули зиндониҳо шурӯъ шуда буд, қатъ мешавад. Суҳайл Шоҳин, сухангӯи дафтари сиёсии Толибон дар Қатар рӯзи 7 апрел дар Твиттераш навишт, ки тими фаннии Толибон “дар музокираҳои бесамар” иштирок намекунад.

Шоҳин маъмурияти президент Ашраф Ғаниро дар он муттаҳам кард, ки бо баҳонаҳои гуногун ҷараёни озодкунии зиндониҳоро ба таъхир мегузоранд. Ҷовид Файсал, сухангӯи Шӯрои амнияти миллии Афғонистон аз Толибон тақозо кард, ки аз роҳи “баҳонаҷӯӣ” ҷараёни корро ба ҳам назананд.

Мақомоти Афғонистон гуфтанд, ки Толибон озод кардани фармондеҳони аршади ин гурӯҳи шӯриширо тақозо доранд, ки ба гуфтаи мақомот, дар солҳои гузашта дар анҷоми ҳамлаҳои пурхушунат даст доштанд.

Боздошта шудани музокираҳо ба тавсеаи хушунатҳо ва иҷро нашудани нақшаи аз Афғонистон берун рафтани нирӯҳои амрикоӣ сабаб мешавад. Ин шартҳои муҳими созиши сулҳи ИМА бо Толибон мебошад, ки 29 феврал дар Қатар имзо шуда буд. Як бахши дигари созиш ин аст, ки ба нишони эътимоди ҳамдигарӣ ҳукумат 5 ҳазор узви Толибон ва гурӯҳи шӯришӣ як ҳазор низомии ҳукумати Афғонистонро аз зиндонҳо озод мекунанд.

Афзоиши ҳодисаҳои марг бар асари Ковид-19 дар Аврупову ИМА

Корманди тиб ниқоби муҳофизатиро мепӯшад

Дар пасманзари идомаи пандемияи коронавирус ва афзоиши марги инсонҳо дар паи Ковид-19 дар саросари ҷаҳон, нахуствазири Бритониё, ки ба ин вирус гирифтор шудааст, ба бахши муроқибати шадиди бемористон интиқол дода шуд. Ҷонсон рӯзи 6 апрел баъди бадтар шудани вазъи саломатиаш ба беморхона бурда шуд. Вале дафтари нахуствазири Бритониё гуфт, ки Ҷонсон баҳуш буд ва зарурати ба таври сареъ дар зери дастгоҳи нафаскашӣ гузоштанаш набуд.

Ин хабар дар ҳолест, ки шумори ҳалокшудаҳо дар Бритониё бар асари олудагӣ ба Ковид-19 боз 400 нафар афзуда дар тамоми ин кишвар ба 5400 нафар баробар шуд. Дар дигар нуқоти Аврупо шумори марги инсонҳо бар асари олудагӣ ба Ковид-19 ҳамчунин афзуда, дар Фаронса 833 ҳодисаи нави марг ва дар Итолиё ҳам афзоиш ба қайд гирифта шуд.

Дар ИМА дар 24 соати гузашта 1150 ҳодисаи нави марги олудашудаҳо ба Ковид-19 ба қайд гирифта шуд. Дар Чин, ки сарчашмаи пайдоиши коронавирус мебошад, барои аввалин бор дар тамоми ин моҳҳо ҳеҷ ҳодисаи марг дар 24 давоми соати гузашта ба қайд гирифта нашудааст. Вале дар саросари ҷаҳон мақомот ҳушдор медиҳанд, ки агар мардум тадбирҳои эҳтиёткориву дурӣ аз ҳамдигар ва инзивои хонагиро риоя накунанд, бозгашти мавҷи хатарноки вирус аз эҳтимол дур нест.

Русия барои мубориза бо коронавирус ба СҶТ $1 млн дод

Бонки миллии Русия. Акс аз бойгонӣ.

Созмони ҷаҳонии тандурустӣ барои мубориза бо коронавирус ҳамчун кумаки якдафъаина, аз Русия 1 миллион доллар дарёфт кард. Русия ҳамчунин 61 миллион рубл ба кишварҳои Аврупои Шарқӣ, Амрикои Ҷанубӣ, Осиёи Марказӣ ва Ҷанубу Шарқӣ ва Африқо ҷудо хоҳад кард.

Созмони ҷаҳонии тандурустӣ буҷаи худро аз ҳисоби пардохтҳои ҳатмии кишварҳои узв ва хайрҳои довталабона пур мекунад. Ҳаҷми пардохтҳои ҳатмӣ бо назардошти вазъи некуаҳволии кишвар ва сокинон таъйин мегардад. Ба ин тартиб, Русия вазифадор аст, ки дар соли ҷорӣ 5,7 миллион доллар, Украина 136,4 ҳазор, Қазоқистон 425,8 ҳазор ва ИМА 57,8 миллион доллар бидиҳад.

Ёфтҳои бештар

XS
SM
MD
LG