Пайвандҳои дастрасӣ

Хабари нав

Хабарҳо

Тони Блейр аз мақомаш канор меравад

Қарор аст, имрӯз, даҳуми май, Тони Блейр, нахуствазири Бритониё бо эъломи рӯзи канорагирии худ аз мақоми раиси Ҳизби кор, роҳро барои интихоби нахуствазири нави Бритониё боз кунад.


Рӯзи якуми май аз замони интихоби Тони Блейр ба мақоми нахуствазири Бритониё даҳ сол пур шуд.


Эъломи канорагирии Тонӣ Блейр сабқат барои раҳбарӣ дар Ҳизби кор ва соҳиб шудан ба мақоми нахуствазири Бритониёро оғоз мекунад.


Гордон Браун, вазири дороиро аз номзадҳои аслӣ ба мақоми нахуствазири Бритониё медонанд.

Ҳамаи хабарҳои имрӯзро дар инҷо бихонед

Теҳрон иттиҳоми Исроилро рад кард; Беннет "буздилона" хонд

Саид Хатибзода

Теҳрон иттиҳоми Исроилро дар мавриди даст доштан дар ҳамлаи ҳафтаи гузашта ба як киштии нафткаш дар обҳои Умон рад кард. Ин киштӣ аз Танзания ба сӯи бандари Фуҷайра дар ҳаракат буд. Дар натиҷаи ҳамлаи ҳавопаймои бесарнишин ду тан аз ҳайати хадамаи киштӣ ҷон бохтаанд. Саид Хатибзода, сухангӯйи Вазорати корҳои хориҷии Эрон, рӯзи 1-уми август ба хабарнигорон гуфт, Исроил дар минтақа ноамнӣ ва террору хушунат эҷод кардааст. Вай иттиҳоми Исроилро беасос хонд. Нахуствазири Исроил мегӯяд, Теҳрон аз масъулият шона холӣ мекунад. Нафталӣ Беннет ин кори Эронро “буздилона” номид.

Кристиан Шмидти 63-сола намояндаи Созмони Милал дар Босния шуд

Кристиан Шмидт

Сиёсатмадори олмонӣ, Кристиан Шмидт, намояндаи нави Созмони Милали Муттаҳид дар Босния ва Ҳерзоговина таъин шуд. Дар дувоздаҳ соли охир ин масъулиятро як дипломат аз Австрия бар уҳда дошт. Тағйирот дар ҳоле сурат гирифт, ки вақтҳои охир аз тарзи кори маъмурияти СММ дар Босния танқид мешавад. Аз ҷумла, Русияву Чин гуфтанд, мақоми намояндаи олии Созмони Милал дар Босния ва Ҳерзоговина бекор карда шавад, вале пешниҳоди онҳо пазируфта нашуд. Кристиан Шмидти 63-сола ба ҳайси як сиёсатмадори қотеъ дар Олмон машҳур аст. Намояндагии СММ дар Босния бар асоси мувофиқатномаи сулҳи 1995 таъсис шудааст.

Дар Олмон посбони урдугоҳи фашистиро муҳокима мекунанд

Акс аз бойгонӣ

Дар Олмон посбони собиқи як урдугоҳи зери итоати фашистонро муҳокима мекунанд. Ӯ садсола аст ва ба ҳамкорӣ ё иштирок дар бештар аз 3500 мавриди қатл муттаҳам аст.

Бино бар қонунҳои Олмон дар бораи расонаҳо ва дахлнопазирии шахс, номи мард зикр намешавад, аммо гумон меравад аз соли 1942 то 1945 посбони урудгоҳи Заксенҳаузен дар наздикии Берлин будааст.

Заксенҳаузен урдугоҳи меҳнатӣ ба шумор мерафт, вале дар онҷо шиканҷаву маргҳои ваҳшатборро сабт кардаанд. Асосан зиндониёни сиёсиро нигоҳ медоштанд.

Посбони собиқ пас аз 76 соли поёни Ҷанги Дувуми Ҷаҳон муҳокима мешавад. Нашрияи олмонии "Welt am Sonntag" рӯзи 1-уми август навишт, додгоҳи Нойруппин пешниҳод кардааст, ин марди садсола бояд давоми ду соат дар мурофиаи додгоҳӣ тоб биоварад. Пештар мақомот гуфтаанд, ӯ тавони посух гуфтан дар додгоҳро дорад. Интизор меравад, мурофиа моҳи октябри имсол оғоз шавад.

Мақомоти ноҳияи Нойруппин ин парвандаро соли 2019 аз додситонии вижаи федеролии Людвигсбург, ки ҷиноятҳои ҷангии даврони фашистиро таҳқиқ мекунад, гирифта буданд.

Олмон барои муҳокимаи кормандони собиқи урдугоҳҳои фашистон таҷриба дорад. Ин кишвар соли 2011 Ҷон Деманйукро ба далели нақшаш дар урдугоҳи марги Собибор дар Лаҳистон (Полша) маҳкум кард. Вай аз Иёлоти Муттаҳидаи Амрико истирдод шуда буд.

Иттиҳоми нави Амрико ва Исроил ба зидди Эрон

Нерӯи баҳрии Амрико мегӯяд, як ҳавопаймои бесарнишин ба киштии нафткаши Исроил дар обҳои Умон ҳамла кардааст. Дар ин ҳодиса, ки 29-уми июл иттифоқ афтод, ду нафар кушта шуданд.

Исроил Эронро ба анҷоми ҳамла муттаҳам кард. Ду тан аз ҳайати хадамаи киштӣ, ки кушта шуданд, шаҳрвандони Бритониё ва Руминия будаанд.

Дар эъломияи нерӯи баҳрии Амрико аз 31-уми июл гуфта шудааст, далелҳои дақиқ аз вуқӯи ҳамла тавассути ҳавопаймои бесарнишин вуҷуд дорад.

Вазири корҳои хориҷии Исроил пас аз гуфтугӯ бо ҳамтои амрикоиаш рӯзи шанбе гуфт, Эрон масъули ин ҳамла аст. Эрон то ҳанӯз дар мавриди ин изҳороти мансабдорони Исроил чизе нагуфтааст.

Толибон гуфтанд, ки ба фурудгоҳи Қандаҳор мушак партофтанд

Нерӯҳои амниятии Афғонистон ба мубориза бо ҷангҷӯёни Толибон идома медиҳанд

Шаби гузашта ба фурудгоҳи Қандаҳор, дар ҷануби Афғонистон, мушак партофтанд. Толибон рӯзи 1-уми август масъулияти ин корро пазируфта, гуфтанд, ҳадафи он қатъ кардани ҳамлаҳои ҳавоӣ аз фурудгоҳ ба тарафи онҳо буд.

Чанд рӯз аст, ки нерӯҳои ҳукуматии Афғонистон мубориза бо ҷангҷӯёни Толибонро дар чанд гӯшаи ин кишвар идома медиҳанд.

Масъулони фурудгоҳ гуфтанд, мушакҳо хатти парвозро вайрон карда, боис ба ҳаракати ҳавопаймоҳо шуданд. Барқарорсозии он оғоз ёфтааст.

Ҳамла ба фурудгоҳи Қандаҳор дар ҳоле сурат гирифт, ки ҷангҷӯёни Толибон дар ду шаҳри бузурги дигари Афғонистон – Ҳирот дар ғарб ва Лашкаргоҳ дар ҷануб – низ меҷанганд.

Тақдири ин минтақаҳо рӯшан мекунад, ки оё ҳукумати Кобул метавонад бе сарбозони байналмилалӣ, ки тӯли бист сол бо Толибон меҷангиданд, назорати шаҳрҳои бузург ва қисми зиёди дигар кишварро нигоҳ бидорад ё не.

Нерӯҳои амниятии Афғонистон ва ҷангҷӯёни Толибон рӯзи 31-уми июл дар канори шаҳри Ҳирот бори дигар задухӯрд карданд. Ин вазъ пас аз он буд, ки мақомот гуфтанд, ҷангҷӯёнро аз онҷо рондаанд.

Теъдоди гирифторони коронавирус дар Тоҷикистон аз 15 ҳазор кас гузашт. 121 нафар ҷон бохтаанд

Ҳангоми дафни яке аз қурбониёни коронавируси нав дар Душанбе. Акс аз соли 2020

Шумори расмии гирифторони коронавирус дар Тоҷикистон аз 15 ҳазор кас гузашт. Вазорати тандурустӣ хабар дод, ки танҳо рӯзи 31-уми июл 78 мавриди бемориро сабт карданд.

Ба иттилои расмӣ, аз оғози эътирофи мавҷудияти бемории ҳамагир дар Тоҷикистон 121 кас ҷони худро аз даст додаанд. Баъзе аз сокинону мутахассисон омори воқеиро бештар аз ин медонанд.

Ҳар рӯз чандин нафар аз марги наздикону дӯстони худ бар асари коронавируси нав хабар медиҳанд, вале зоҳиран на ҳамаи онҳо расман ҳисоб карда мешаванд.

Вазорати тандурустӣ мегӯяд, дар бештар аз як соли охир 14556 нафар ё зиёда аз 96 дарсади беморон шифо ёфтанд.

Дар ҳоли ҳозир шумори гирифторон ба COVID-19 дар саросари ҷаҳон, аз ҷумла Тоҷикистон, рӯ ба афзоиш аст. Яке аз сабабҳои бештар шудани гирифторонро Созмони Ҷаҳонии Тандурустӣ ба навъи "Делта"-и коронавирус рабт медиҳад.

Намояндагони Вазорати тандурустии Тоҷикистон рӯзи 26-уми июл эълон карданд, ки эҳтимол навъи "Делта" (Delta)-и коронавирус дар Тоҷикистон вуҷуд дорад.

Гуруҳе хоҳони онанд, ки барои пешгирӣ аз паҳншавии беморӣ дар Тоҷикистон ҳарчи зуд карантин эълон шавад. Ҳизби демократ низ дар муроҷиате аз Ситоди муқобила бо коронавирус хост, ба камияш бист рӯз "карантин" ҷорӣ намояд.

Аммо на дар мавҷи аввали беморӣ ва на ҳоло карантин эълон нашудааст. Ғафур Муҳсинзода, муовини аввали вазири тандурустии Тоҷикистон,шаш рӯз пеш гуфта буд, ки ҳоло зарурати ҷорӣ кардани карантин нест, "зеро вазъият он тавре нест, ки карантин роҳандозӣ шавад. Мардум бояд талош кунанд, ки ваксина гиранд, эҳтиёткор бошанд ва тавсияҳои мутахассисонро барои пешгирӣ ҷиддӣ гиранду риоя кунанд."

Дар Тоҷикистон охири моҳи апрели соли гузашта ва дар пайи фишори дохиливу берунӣ вуҷуди коронавирусро эътироф карданд.

Мақомоти Тоҷикистон аз моҳи январ то охири моҳи июни имсол пойфишорӣ доштанд, ки дар кишвар сирояти коронавирус сабт нашудааст. Ситоди муқобила бо коронавирус танҳо 21-уми июн тасдиқ кард, ки сокинон дубора ба бемории ҳамагир мубтало шудаанд.

Ҳаккерон маълумоти миллионҳо шаҳрванди Беларусро ба даст оварданд

"Киберпартизан" хабар додааст, ки маркази эелектронии шинсномадиҳии Беларусро шикастааст.

Гурӯҳи махфии беларусии "Киберпартизан" хабар додааст, ки маркази эелектронии шинсномадиҳии Беларусро шикастааст.

Зоҳиран ин гурӯҳ ба нусхаи шиноснома ва маълумоти шахсии миллионҳо шаҳрванди Беларус дастрасӣ пайдо кардаанд. Дар ин миён, афроди наздик ба Александр Лукашенко, кормандон КГБ-и ин кишвар дар кишварҳои Иттиҳоди Аврупо ва маълумот дар бораи Қурмонбек Боқиев, собқи президенти Қирғизистон низ вуҷуд дорад. Президенти собиқи Қирғизистон даҳ соли пеш ба Беларус фирор кард ва он ҷо паноҳанда шудааст.

Ҳаккерон қисме аз маълумотро дар саҳифаи телеграмии худ нашр кардаанд.

Мақомоти Беларус то кунун дар ин бора изҳори назар накардаанд.

Дуздии маълумоти хусуси ва нашри он тибқи қонунҳои Беларус ҷавобгарӣ пешбинӣ мекунад.

Дар ИМА гуфтанд, "Делта" ваксинашудаҳоро низ сироят мекунад

Яке аз хиёбонҳо дар ИМА

Макрази назорат ва пешгирии бемориҳо дар ИМА эълон кард, ки навъи коронавируси "Делта" зуд паҳн мешавад ва эҳтимол афроди васкинагирифтаро низ сироят кунад.

Аз ин рӯ, гуфта мешавад, ки эҳтимол усули мубориза бо КОВИД-19 ҷиддӣ тағйир ёбад, чун навъи "Делта" ба афроди ваксинашуда низ сироят мекунад ва ба афроде, ки ваксина нагирифтаанд, зиёни ҷиддӣ мерасонад.

Ба одамоне, ки ваксина нагирифтаанд, хатари гирифторӣ ба ин вирус то се маротиба бештар аст ва даҳ маротиба бештар дар қиёс ба афроди ваксинашуда осебпазир буда, эҳтимоли фавташон зиёд аст.

Маркази назорат ва пешгирии бемориҳо дар Амрико мегӯяд, акнун шеваи мубориза бо коронавирус тағйир мекунад.

Дар Амрико миллионҳо нафар ба коронавирус сироят ёфтаанд ва садҳо ҳазор бар асари он фавтидаанд.

Хадамоти гумрук гуфт, се кормандаш дар кочоқи 90 кг тило ва 15 миллион доллар даст доштанд

Хуршед Каримзода, раиси Хадамоти гумрук гуфт, “кормандонаш қонуншиканӣ кардаанд.”

Раиси Хадамоти гумруки Тоҷикистон гуфт, аз се кормандаш, ки дар қочоқи 90 кило тило ва 15 миллион доллар аз Афғонистон ба ин кишвар даст доштанд, ду тан зиндон шуданд ва яке бо ҷарима озод гашт.

Хуршед Каримзода, раиси Хадамоти гумрук дар нишасти матбуотии рӯзи 30-уми июл гуфт, ки “кормандонаш дар тартиби интиқоли мол қонуншиканӣ кардаанд.”

Аз интиқоли ин миқдор тилло ва маблағ моҳи ноябри соли гузашта дар Фурудгоҳи байналмилалии Душанбе пешгирӣ шуда буд. Ҳодисаро Додситонии кулли Тоҷикистон тафтиш кард ва моҳи апрели имсол Додгоҳи шаҳри Душанбе нӯҳ нафарро дар доираи ин парванда ба муҳлатҳои аз ду то панҷуним сол ба зиндон маҳкум кард.

Додгоҳ қаблан гуфта буд, ки барои ҳамкорӣ бо ин гуруҳ, ду нозири дидбонгоҳи Гумруки Панҷи Поён дар Хатлон, Зариф Аслонов ва Қурбоналӣ Сайфуллоевро барои “сӯистифода аз ваколатҳои хидматӣ” ба ду солии зиндон маҳкум кардааст. Маҳмадризо Шарипов, нозири дигари ин дидбонгоҳи гумрукӣ барои “хунукназарӣ” барои ду сол аз озодӣ маҳрум шуда буд, вале пас аз шикоят ба зинаи болоии додгоҳ бо ҷарима озод шудааст.

Додгоҳи Душанбе бо нашри хулосаи ҳукми додгоҳ гуфта буд, ки гуруҳи иборат аз кормандони Хадамоти гумрук, ВКД ва тоҷирон дар ҳамкорӣ бо шаҳрвандони Афғонистон солҳо боз ба кочоқи тило ва асъори хориҷӣ машғул будаанд.

Назари маҳкумшудаҳо маълум нест, вале пайвандонашон гуфта буданд, аз ҳукми додгоҳ эътироз надоранд.

Қазияи кочоқи тило замоне доғ шуд, ки расонаҳои Афғонистон навиштанд, молҳои мусодирашуда дар Душанбе ба Мирзо Катавозай, муовини аввали Маҷлиси Намояндагони ин кишвар таалуқ доранд. Ин мақомдори Афғонистон, ки ҳоло мақомашро аз даст додааст, дар охири моҳи феврал ҳангоми сафар ба Душанбе ин иттиҳомро рад карда буд.

Лукашенко гуфт, даркор шавад, низомиёни русро даъват мекунад

Александр Лукашенко, президенти Беларус бо Владимир Путин, президенти Русия

Александр Лукашенко, президенти Беларус гуфт, “агар барои бехатарӣ даркор шавад”, ба кишвараш низомиёни Русия ворид хоҳанд шуд.

Хабаргузориҳои давлатии ин кишвар аз қавли ӯ навиштанд, ки Лукашеко гуфтааст, ҳоло Беларус нерӯи кофӣ барои муқобилият бо ҳар гуна таҳдидро дорад, вале агар нерӯ камӣ кард, низомиёни русро даъват мекунад.

Президенти Беларус иддао кард, ки кишварҳои узви НАТО дар пайи ноором кардани ин кишвар ҳастанд.

Қаблан, Йоҳанс Столтенберг, дабири НАТО нигаронӣ кард, ки Беларус бо Русия бештар наздик гашта, аз нигоҳи сиёсӣ вобастаи ин кишвар шудааст.

Ӯ гуфт, ки НАТО ба ҳар гуна таҳдид ба кишварҳои узваш аз хоки Беларус ва Русия посух хоҳад дод.

Аксари кишварҳои аврупоии ҳамсояи Русия ва Беларус узви НАТО ҳастанд.

Вазъи Беларус пас аз интихоботи рӯзи 9-уми августи як соли пеш печида шуд.

Мақомот Лукашенкоро пирӯз эълон карданд, вале мухолифон ва ҳазорон шаҳрванди ин кишвар бо пуштибонӣ аз Светлана Тихановская, рақиби Лукашенко дар интихобот эътироз карданд.

Давоми як соли гузашта мақомоти Беларус бераҳмона эътирози сокинонро саркуб карданд.

Ҳизби демократ пешниҳод кард, ки дар Тоҷикистон 20 рӯз карантин ҷорӣ шавад

Ҳоло дар беморхонаҳои Душанбе даҳҳо нафар бо нишонаҳои сироят ба КОВИД-19 бистарианд

Ҳизби демократи Тоҷикистон аз мақомот хост, ки ба хотири коҳиши гирифтории сокинон ба коронавирус дар кишвар 20 рӯз карантин эълон кунанд.

Дар муроҷиатномаи ин ҳизб аз рӯзи 30-уми июл гуфта мешавад, ки “шумораи гирифторон ба беморӣ нисбат ба чанд моҳи пеш афзоиш пайдо кардааст.”

Мақомоти тоҷик аз моҳи январ то охири моҳи июн пойфишорӣ мекарданд, ки дар Тоҷикистон ягон ҳолати нави гирифторӣ ба КОВИД-19 вуҷуд надорад. Пас аз шикояти ба такрори сокинон ва интиқод аз кори пизишкон дар амри ҷилавгирӣ аз КОВИД-19, охири моҳи июн мақомоти тоҷик вуҷуди коронавирусро эътироф карданд.

Ҳизби демократи Тоҷикистон гуфтааст, ки ҳоло гирифторӣ ба беморӣ дар деҳот бештар шудааст ва сокинони кишвар чораҳои беҳдоштиро риоя намекунанд.

Ин Ҳизб пешниҳод кардааст, ки қабл аз таҷлили 30-солагии истиқлолияти Тоҷикистон дар 9-уми сентябр дар кишвар 20 рӯз карантини сартосарӣ эълон шавад.

Рӯзи 30-уми июл Вазорати тандурустии Тоҷикистон хабар дод, ки дар як рӯзи охир 75 ҳолати гирифторӣ ба коронавирусро сабт кардааст. Мақомот мегӯянд, аз ибтидои пандемия беш аз 15 ҳазор сокини Тоҷикистон ба ин вирус сироят ёфта, 121 нафар фавтидааст. Коршиносон ба ин омор бовар надоранд ва омори воқеиро ба маротиб бештар медонанд.

Дар се моҳи ахир хабари марги даҳҳо чеҳраҳои илму адаб, фарҳангу сиёсат бар асари сироят ба коронавирус нашр шуд.

Манобеи Радиои Озодӣ қаблан хабар дод, ки ҳатто беш аз 10 узви хонаводаи Эмомалӣ Раҳмон, президенти Тоҷикистон ба коронавирус сироят ёфтааст. Аз ҷумла, манобеи Радиои Озодӣ фавти Узбекбӣ Асадуллоева, хушдомани президент ва Қурбонбӣ Раҳмонова, хоҳари ӯро ба сироят ба КОВИД-19 рабт дода буданд. Мақомот расман сабаби марги онҳоро шарҳ надодаанд.

Толибон ба маркази вилояти Ҳирот ҳамла кардаанд

Нерӯҳои ҳукумати Афғонистон дар Ҳирот

Нерӯҳои ҳукумати Афғонистон рӯзи 30-уми июл дар канори шаҳри Ҳирот бо Толибон вориди ҷанг шуданд.

Толибон иддао карданд, ки бахше аз маркази вилояти Ҳиротро гирифтаанд, вале мақомоти афғон ин гапро беасос номиданд.

Ба гуфтаи мақомоти ин кишвар, ҳамлаи гурӯҳи Толибон пас гардонида шуд.

Фавод Амон, муовини сухангӯи Вазорати дифои Афғонистон гуфт, ки талоши Толибон барои тасарруфи маркази вилояти Ҳирот, Қандаҳор, Ҳилманд ва Тахор ноком гашт.

Ӯ гуфт, ки Толибон дар аксар манотиқ шикаст хӯрданд.

“Иншооллоҳ вазъ беҳтар хоҳад шуд.",--гуфт ӯ.

Толибон дар ду моҳи ахир ҷангро барои тасарруфи ноҳияҳои бештари Афғонистон оғоз кардаанд. Қисмати бештари марзи Афғонистон бо Тоҷикистон ҳоло аз ҷониби онҳо назорат мешавад.

Дар Суғд 19 шаҳрванди Қирғизистонро бо гуноҳи марзшиканӣ ҷазо додаанд. ВИДЕО

Сарҳади байни Тоҷикистону Қирғизистон

Дар шаш моҳи аввали имсол дар шимоли Тоҷикистон 19 шаҳрванди Қирғизистонро боздошту муҷозот кардаанд. Бахтиёр Оқилзода, раиси Додгоҳи вилояти Суғд, 30-юми июл гуфт, ин афрод "барои бе санад ва ғайриқонунӣ гузаштан аз сарҳади давлатии Тоҷикистон" гунаҳкор шуданд.

"Додгоҳ бар асоси моддаи 335-и Кодекси ҷиноии Тоҷикистон 18 нафарро аз 500 то 1 ҳазор сомонӣ ҷарима баст ва як нафарро зиндонӣ кард", -- шарҳ дод ӯ дар нишасти матбуотӣ дар Хуҷанд.

Муҷозоти 19 шаҳрванди Қирғизистон барои убури ғайриқонунӣ ба Тоҷикистон
лутфан мунтазир бошед

Феълан кор намекунад

0:00 0:01:52 0:00

Мақомоти Тоҷикистону Қирғизистон ҳар чанд вақт шаҳрвандони якдигарро бо гуноҳи убури ғайриқонунии марз ё додугирифти ғайрирасмӣ дастгир мекунанд. Зоҳиран ин масъала пас аз ҷанҷоли хунини моҳи апрели имсол ва баста шудани гузаргоҳҳои сарҳадӣ ҷиддӣ шудааст.

Мақомоти Қирғизистон рӯзи якуми майи имсол сокини 55-солаи шаҳри Исфара Саидмурод Ишановро бо гумони убури ғайриқонунии сарҳад дастгир кардаанд. Наздиконаш мегӯянд, ба ӯ ё пардохти 55 ҳазор сомонӣ ҷарима ё як сол зиндон таҳдид мекунад.

Бахши қирғизии Радиои Озодӣ рӯзи 16-уми июл гузориш дод, ки мақомоти Тоҷикистон шаҳрванди Қирғизистон Ойбек Маҳмудови 35-соларо бо гуноҳи ғайриқонунӣ гузаштан аз сарҳад ба панҷ сол зиндон маҳкум кардаанд. Ба иттилои манбаъ, ӯ моҳи апрел дар ҳудуди ноҳияи Лахш дастир шуда буд.

Бисёре аз деҳаҳои наздимарзии Тоҷикистону Қирғизистонро як роҳ ё наҳр аз ҳам ҷудо мекунад. Пештар сокинон барои рафтан ба қисмати дигари ноҳияи худ бемамониат аз маҳалҳои якдигар мегузаштанд, вале ҳоло як "қадами ноҷо" онҳоро ба дардисар гирифтор мекунад.

Дарозии марзи Тоҷикистону Қирғизистон 970-980 километрро ташкил медиҳад, ки аз он то имрӯз танҳо 519 километр муайян ва нишонагузорӣ шудаасту бас. Минтақаҳои дигари баҳсӣ, ки аз обу замину чарогоҳ иборатанд, ҳар чанд вақт сабаби занозаниву тирпарронии сокинон ва нерӯҳои ду кишвар мешаванд.

Пас аз як чунин задухӯрд дар рӯзҳои 28 ва 29-уми апрели имсол муносибати ду кишвар ба сардӣ печид. Бино ба иттилои мақомоти Тоҷикистон, дар ин муноқиша 19 нафар кушта, 87 каси дигар захмӣ шуданд. Қирғизистон аз кушта шудани 36 нафар ва маҷруҳ шудани 189 нафар дар ин даргириҳо хабар дод.

Амрико як посгоҳро дар наздикии сарҳади Тоҷикистону Афғонистон бозсозӣ кард

Амрико аз соли 2007 ба ин сӯ ба нерӯҳои марзбонӣ ва бозсозии посгоҳҳои сарҳадӣ дар Тоҷикистон даҳҳо миллион доллар ёрӣ кардааст

Иёлоти Муттаҳидаи Амрико бо харҷи 570 ҳазор доллар як посгоҳро дар наздикии марзи Тоҷикистону Афғонистон таъмиру бозсозӣ кардааст. Маросими ба истифода додани посгоҳ рӯзи 30-юми июл баргузор шуд.

Сафорати Амрико дар Душанбе гуфт, дар маросим кордори сафорат Ҷон Гинкел ва муовини фармондеҳи Нерӯҳои марзбонии Тоҷикистон, Раҷаб Саодатзода, иштирок карданд.

"Ин посгоҳи марзӣ барои сарҳадбонон имконоти иловагиро барои назорат ва посбонии марз бо Афғонистон дар минтақаи Шаҳритуси вилояти Хатлон фароҳам меорад", - гуфтанд дар сафорати Амрико.

Ба иттилои манбаъ, иншооти мазкур "иқтидори нерӯҳои марзбониро барои пайгирӣ ва пешгирӣ аз убури ғайриқонунии сарҳад (тақрибан 15-20 километр) ва мубориза бо таҳдидҳои фаромиллӣ, аз ҷумла қочоқи маводи мухаддиру ифротгароӣ ба таври чашмрас боло мебарад".

"Иёлоти Муттаҳида ҳамчунон ҷонибдори шарикӣ бо Тоҷикистон, барои дастгирии соҳибихтиёрӣ, амният ва нақши он дар ҳифзи сулҳ ва шукуфоии дарозмуддат дар Афғонистон, мебошад", -- гуфта шудааст дар иттилоияи намояндагии расмии Амрико дар Душанбе.

Иёлоти Муттаҳида дар гузашта низ барои таъмиру бозсозии посгоҳҳои сарҳадӣ ва таъмини нирӯҳои марзбонии Тоҷикистон ёрии моливу техникӣ кардааст. Аз ҷумла, Барномаи мубориза бар зидди маводи мухаддири Дафтари Ҳамкориҳои Ҳарбӣ аз соли 2007 ба ин сӯ ба Тоҷикистон беш аз 155 миллион доллар кумак расондааст.

Дар умум Амрико дар 30 соли ҳамкорӣ бо Тоҷикистон тавассути барномаҳои гуногун ба кишвар ба маблағи беш аз 1,8 миллиард доллар ёрӣ кардааст.

Сангандозии навбатӣ дар марзи Қирғизистон бо Тоҷикистон

Марзи байни Тоҷикистону Қирғизистон

Бахши қирғизии Радиои Озодӣ рӯзи 30-юми июл навишт, ки мошини намояндаи президенти Қирғизистон дар умури барқарорсозӣ ва рушди деҳаҳои наздисарҳадии вилояти Бодканд Мамурҷон Раҳимов дар марзи ин кишвар бо Тоҷикистон сангборон шудааст.

Маъмурияти вилояти Бодканд гуфтаанд, ҳодиса 29-уми июл дар деҳаи Тош-Тумшуқи ноҳияи Бодканд рух дод ва ҳоло таҳқиқи он оғоз шудааст.

Ҳодиса замоне рух додааст, ки Раҳимов ҳамроҳи муовини аввали намояндаи президенти Қирғизистон дар Бодканд ва муовини раиси ҷамоати деҳоти Оқсой аз хонаҳои барқароршуда дар деҳаи мазкур боздид карда, ба самти деҳаи Тош-Тумшуқ мерафтанд.

Ба огаҳии маъмурияти Бодканд, вақте мансабдорони қирғиз аз хонаҳои сӯхта боздид мекарданд, гуиё 15-20 сокини деҳаи Хоҷаи Аълои Тоҷикистон ба назди онҳо омадаанд. Миёни ҷонибҳо баҳс сар зада, дар натиҷа мошини муовини раиси ҷамоати Оқсой сангборон шудааст.

"Намояндагони мақомоти ҳифзи ҳуқуқи ду кишвар баъди ҳодиса дар марз вохӯрдаанд. Сардори пулиси Исфара ваъда додааст, ки амалкарди шаҳрвандони Тоҷикистон санҷида шуда, ҷуброни зарари расида пардохт хоҳад шуд. Ҳамчунин дар доираи қонун зидди шаҳрвандони Тоҷикистон, ки сангандозӣ карданд, чора андешида мешавад", - афзудааст манбаъ.

Ҷониби Тоҷикистон то ҳол ин ҳодисаро шарҳ надодааст.

Мақомоти Исроил коргоҳи таҳиягари барномаи ҷосусиро бозҷӯӣ карданд

FILES-ISRAEL-US-TECH-RIGHTS-SPYWARE

Хадамоти махсуси Исроил коргоҳи ширкати "NSO Group", таҳиягари барномаи тиҷории ҷосусии "Pegasus"-ро, ки дар рахна шудани телефони зиёда аз даҳ раҳбари давлат истифода шудааст, бозҷӯӣ кардаанд.

Дар ин бора Вазорати дифои Исроил хабар додааст. Худи "NSO Group" хабари бозҷӯӣ шудани коргоҳи худро тасдиқ карда, гуфт, аз он истиқбол мекунад. Ширкат хабари расонаҳо дар бораи истифода шудани барномаи Pegasus-ро дар таъқиби рӯзноманигорон ва сиёсатмадорон дуруғ номид. Масъулони ширкат гуфтанд, ин барнома барои мубориза бо террористон ва ҷинояткорон сохта шудааст.

Нашрияи Calcalist бо истинод ба манбаи худ хабар дода, ки ба "NSO Group" аз эҳтимоли анҷоми тафтишот ҳушдор дода шудааст. Ҳамчунин хадамоти махсуси Исроил санадҳои ширкатро мушикофона таҳқиқ накардааст. Ба гуфтаи рӯзноманигорон, Вазорати дифои Исроил аз фаъолияти "NSO Group" манфиатдор буда, қаблан онро аз баҳсҳои додгоҳӣ "наҷот" додааст. Эҳтимол меравад, бозҷӯии коргоҳи ширкат ба сафари вазири дифои Исроил Бени Гантс ба Фаронса рабт дорад.

Аз барномаи Pegasus мақомоти Озарбойҷон, Маҷористон, Мексика, Баҳрайн, Ҳинд, Индонезия, Марокаш, Руанда, Ҷумҳурии Конго, Арабистони Саудӣ - дар маҷмуъ наздики 50 давлат истифода кардаанд. Расонаҳо дар бораи рахна шудани телефонҳои 18 роҳбари кишварҳои дунё аз Аврупо, Африқо, Осиё ва Шарқи Наздик бо шумули президентҳои Фаронса Эммануэл Макрон, шоҳи Марокаш Муҳаммади Шашум ва президенти Мексика хабар додаанд.

Барномаи Pegasus имкон дорад, тавассути паёмакҳои одӣ вориди телефон шуда, маълумотро рабояд ва муколамаҳоро хонад.

Байден ба тарҷумонҳои афғон: "Ба хонаи худ хуш омадед"

Президенти ИМА Ҷо Байден

Президент Ҷо Байден нахустин ҳавопаймоеро, ки субҳи 30 июл даҳҳо шаҳрвандони Афғонистон - ҳамкорони нирӯҳои амрикоиро ба ИМА расонид, истиқбол кард. Хабаргузории АР бар пояи санадҳои расмӣ гуфт, ки аввалин парвози ҳавопаймои интиқолӣ гурӯҳи беш аз 200-нафарии тарҷумонҳову дигар кормандони ҳамкори амрикоиҳо дар Афғонистонро ба Вашингтон расонид. Дар миёни мусофирон 57 кӯдак ва 15 навзод мебошанд.

Кохи Сафед бо нашри изҳороте гуфт, ки Байден ин парвозро ҳодисаи муҳиме номид, ки баёнгари “иҷрои ӯҳдадориву ваъдаҳои амрикоиҳо дар баробари ҳазорҳо шаҳрвандони Афғонистон барои хидмати шона ба шонаашон бо низомиёну дипломатҳои Амрико дар давоми 20 соли ахир дар Афғонистон” мебошад. Байден гуфт, “бештар аз ҳама мехоҳам ба ин шаҳрвандони ҷасури Афғонистон барои дар канори ИМА буданашон ташаккур бигӯям ва имрӯз ман бо эҳсоси ифтихор ба онҳо мегӯям, ки “Ба хонаи худ хуш омадед”.

Ҳавопаймо субҳи 30 июл дар фурудгоҳи байналмилалии Далласи Вашингтон фуруд омад. Мақомоти амрикоӣ гуфтанд, ки ин ҳайат чанд рӯз дар қароргоҳи Форт Лии аёлати Вирҷиния қарор мегирад.

Бо иҷро шудани нақшаи хуруҷи нирӯҳои амрикоӣ, мақомоти ин кишвар он шаҳрвандони Афғонистонро, ки бо онҳо ҳамкорӣ кардаанд, аз тарси қассосгирии Толибон баъди рафтани онҳо дар Амрико сарпаноҳ медиҳанд. Дар давоми солҳои зиёд Толибон бисёр афғонистониҳову аъзои оилаи онҳоро, ки бо амрикоиҳо ҳамкорӣ мекарданд, ба қатл расонидаанд. Толибон дар як иддаое ҳафтаи гузашта гуфтанд, онҳое, ки дар гузашта бо нирӯҳои байналмилалӣ ҳамкорӣ кардаанд, ҳадаф қарор намедиҳанд.

Аз соли 2001 тахминан 300 ҳазор шаҳрвандони мулкии Афғонистон бо нирӯҳои байналмилалӣ ҳамкорӣ кардаанд.

Асет Абишев - маҳбуси сиёсии қазоқ пеш аз муҳлат озод шуд

Асет Абишеш. 30 июл, 2021.

Фаъоли мадании қазоқ Асет Абишев, ки ҳомиёни ҳуқуқи Қазоқистон ӯро маҳбуси сиёсӣ меноманд, 30 июл аз зиндони Заречнии вилояти Алмато озод шуд.

Гуруҳе аз ҷонибдорони Абишев ӯро дар назди дарвозаи зиндон пешвоз гирифтанд. Фаъоли мадании қазоқ ба ҳамаи онҳое, ки ӯро дастгирӣ карданд, миннатдорӣ баён намуд.

"Будани шумо дар инҷо муҳим аст. Ингуна корҳо хеле кумак мекунанд. Инро дар худ таҷриба кардаам. Вақте мардум мехоҳанд, кореро анҷом диҳанд, иттиҳод хеле кумак мекунад. Неру дар иттиҳод аст", - изҳор дошт Абишев дар суҳбат бо ҷонибдоронаш.

Ҷонибдорони Асет Абишев субҳи 29 июл пушти дари маҳбаси Заречнии вилояти Алмато ҷамъ шуда, озодии пеш аз муҳлати ӯро интизор буданд. Аммо сардори маҳбас Нурлан Бидайбеков ба ҷамъомадагон хабар дод, ки озодии пеш аз муҳлати Абишев фардо - 30 июл иҷро мешавад.

Абишев моҳи июли соли 2018 дар шаҳри Алмато боздошт шуд. Ӯро дар "сармоягузории созмони ҷиноӣ" ва "иштирок дар фаъолияти созмони мамнуъ" айбдор карданд. Моҳи ноябри соли 2018 додгоҳ Абишевро чаҳор сол зиндонӣ кард. Вай пештар аз ин хост, пеш аз адои муҳлат аз маҳбас озод шавад. Додгоҳ ахиран ин дархостро қонеъ кард.

Машқи сарбозони эҳтиётӣ дар тамрингоҳи Леваканд

Машқи сарбозони эҳтиётӣ. Наворро корбарон фиристоданд

Мақомоти шаҳри Леваканд (Сарбанди собиқ) дар вилояти Хатлон рӯзи 29-уми июл ҳудуди ҳазор сарбози эҳтиётиро ба машқҳои ҳарбӣ ҷалб кардаанд.

Машқи ҳарбӣ, аз ҷумла тирандозӣ аз "Калашников", дар тамрингоҳи қисми ҳарбии Файзалӣ Саидов доир шудааст. Корбарони Радиои Озодӣ бо фиристодани чанд порча навор аз ҷараёни машқу тирандозиҳо гуфтанд, "бо даъвати комиссариати ҳарбии шаҳри Леваканд ба машқҳо ҳозир шуданд".

Ин машқу тамринҳои афсару сарбозони эҳтиётӣ дар Тоҷикистон дар ҳолест, ки Эмомалӣ Раҳмон, президенти Тоҷикистон, рӯзи 5-уми июл супориш дод, 20 ҳазор афсари эҳтиётӣ ба марзи кишвар бо Афғонистон ҷалб шаванд.

Дар ду моҳи охир ҷанг миёни Толибон ва нерӯҳои давлатӣ дар марзи Афғонистон бо Тоҷикистон афзоиш ёфтааст. Толибон чандин минатқаи ҳаммарз бо Тоҷикистонро тасарруф карданд.

Мақомоти Тоҷикистон мегӯянд, беш аз 900 километр хатти марзи Афғонистон бо Тоҷикистон зери назорати Толибон қарор дорад ва эҳтимол паноҳҷӯёни бештаре вориди кишвар шаванд.

ФСБ гуфт, аз як ҳамлаи эҳтимолии террористӣ дар Русия пешгирӣ кардааст

Акс аз бойгонӣ

Хадамоти амнияти федеролии Русия (ФСБ) хабар дод, ки дар натиҷаи як амалиёт дар Тюмен ду гумонбар ба терроризмро нобуд кардаанд.

Дар хабари расмӣ омадааст, кушташудаҳо шаҳрвандони Тоҷикистон буда, гуё нақша доштаанд дар маконҳои серодам ҳамлаҳои террористӣ анҷом бидиҳанд. Санҷидани дурустии ин иддао имкон надорад.

Мақомоти Русия ному ҷузъиёти дигари марбут ба гумонбаронро нашр намекунанд. То ҳоло мавқеи наздикони кушташудаҳо дар бораи ин ҳодиса дастрас нашудааст.

Ба навиштаи Хадамоти амнияти федеролӣ, гуё ин афрод узви эҳтимолии гуруҳи тундрави "Давлати исломӣ" буда, шаби 28-уми июл дар амалиёти боздошт ба ходимони ҳифзи ҳуқуқ муқовимат кардаву норинҷакро таркондаанд. Ба иттилои расмӣ, "ҳарду гумонбар ҳангоми задухӯрд нобуд карда шуданд. Аз онҳо лавозимоти ҷангӣ, силоҳҳои оташфишон, маводи омодаи тарканда ва адабиёти динӣ дарёфт шуд."

То куҷо воқеият доштани ин ҳодиса маълум нест, чун дар гузашта ҳомиёни ҳуқуқи муҳоҷирон дар бораи саҳнасозӣ будани баъзе аз чунин боздоштҳо таъкид кардаанд.

Ҳомиёни ҳуқуқ мегӯянд, полис ба хотири боло нишон додани омори пешгириву боздошти гумонбарони терроризм гоҳо даст ба сохтакорӣ мезанад ва заифтарин қишри ҷомеа - муҳоҷирони кориро дар қабои террористу ҷинояткор муаррифӣ мекунад.

Афзоиши бесобиқаи нархи бензин дар Тоҷикистон

Як нуқтаи фурӯши сӯзишворӣ. Акс аз бойгонӣ

Дар давоми 6 моҳи соли ҷорӣ дар Тоҷикистон нархи сӯзишворӣ ба таври бесобиқа боло рафтааст. Тибқи рақамҳои Кумитаи омор, танҳо дар як моҳи охир дар тамоми нуқтаҳои фурӯши сӯзишворӣ арзиши бензин 2,2 дарсад афзуд. Аз аввали сол нархи чаканаи ин навъи маводи сӯхт беш аз 44 фоиз гарон шудааст. Ронандагон дар Тоҷикистон бештар аз ҳама бензини навъи 92-ро мехаранд, зеро нархи он нисбат ба навъҳои 95 ва 98-и бензин арзонтар аст. Феълан арзиши як литр бензини навъи 92 дар пойтахт 9,5 сомониро ташкил медиҳад. Ҳамчунин дар нимсолаи аввали соли ҷорӣ арзиши гази моеъ беш аз 20 дар сад ва аз сӯзишвории дизелӣ ҳудуди 32 дар сад гарон шудааст.

Боздошти даҳҳо нафар баъд аз ҷанги гурӯҳии тоҷикону чеченҳо

Екатеринбург. Моҷарои гурӯҳии миёни муҳоҷирон. Акс аз бойгонӣ

Мақомоти ҳифзи ҳуқуқ дар шаҳри Санкт-Петербурги Русия баъд аз занозании гурӯҳӣ миёни зодагони Тоҷикистону Чеченистон 70 нафарро боздошт намуда, 13 тани онҳоро ба шуъбаи пулис бурдаанд.

Хабаргузории русии "Фонтанка" менависад, ҷанҷол субҳи 29-уми июл дар наздикии меҳмонхонаи "Белые ночи" ба амал омадааст.

Тибқи иттилои мақомот, ҷанҷол миёни бошандагони меҳмонхона - шаш марди чечен ва чор шаҳрванди Тоҷикистон сар задааст. Муноқишаи лафзӣ ба задухӯрд печидааст, ки дар натиҷа ду нафар аз сарашон осеб дида, ба бемористон бурда шуданд.

Ба 6 нафари дигар дар ҷойи ҳодиса ёрии тиббӣ расонда шудааст.

Кормандони пулис иштирокдорони ҷанҷол ва 70 бошандаи меҳмонхонаро, ки зодагони Тоҷикистон ва Узбекистон буданд, дастгир карданд. Як рӯз пеш аз ин Вазорати корҳои дохилии Русия гуфт, ки минбаъд муҳоҷирон барои иштирок дар занозаниҳои гурӯҳӣ аз қаламрави кишвар "депорт" ё ихроҷ шуда, роҳашон ба ин давлат барои як умр баста мешавад.

HRW ба мақомоти Эрон: эътирозгаронро озод кунед

Исфаҳони Эрон. Сокинон оби ошомиданиро аз мошин мегиранд

Созмони Дидбони Ҳуқуқи Башар (Human Rights Watch) аз мақомоти Эрон тақозо кард, шахсонеро, ки барои иштирок дар намоиши эътирозӣ дар Хузистону минтақаҳои дигари ин кишвар ҳабс шудаанд, озод кунанд. Дар изҳороти созмон аз 30-юми июл талаб шудааст, ки истифодаи нирӯ бар зидди эътирозгарон ҳам таҳқиқ шавад.

Рӯзи 15-уми июл дар даҳҳо шаҳру манотиқи вилояти Хузистони Эрон, ки ҷамъияти калони арабҳо дар он зиндагӣ мекунанд, эътирозҳо бархост ва базудӣ ба манотиқи дигар ин кишвар, аз ҷумла, баъзе қисматҳои Теҳрон паҳн шуд.

Эътирози мардум аз он ҷо сарчашма мегирад, ки дар давоми 50 соли охир мушкили дастрасӣ ба об ва таъмини аҳолӣ бо барқ ҳал нашудаву баръакс амиқтар шудааст.

Ҳазорҳо корманди соҳаи нафти Эрон ҳам бо талаби даромад ва маоши беҳтар даст ба коршиканӣ заданд.

Дар ду ҳафтаи охир дар Эрон дастикам нӯҳ эътирозгар кушта шуданд. HRW дар изҳороти худ мегӯяд, амалкарди мақомоти эронӣ нисбат ба эътирозгарон дар Хузистон ва дигар манотиқ мояи нигаронии амиқ шудааст.

Ҳукми додгоҳ аз рӯи китоб дар бораи одамони Путин охири сол содир мешавад

Муқоваи китоби Кетрин Белтон “Одамони Путин: Чигуна КГБ Русияро дубора ба дасти худ гирифт ва ба Ғарб чашм дӯхт”

Як додраси бритониёӣ гуфт, ҳукм аз рӯи баҳси таҳқир дар китобе дар бораи сари қудрат омадани президенти Русия Владимир Путин охири соли ҷорӣ содир мешавад. Додрас Аманда Типплз рӯзи 29 июл ба Додгоҳи олии Лондон гуфт, ки ҳукмро моҳи октябр содир хоҳад кард.

Қазия ба шикояти як гурӯҳ сарватмандони рус, аз ҷумла, миллиардери зодаи Русия Роман Абрамович рабт дорад, ки Кетрин Белтон ва ношири китобаш бо номи “Одамони Путин: Чигуна КГБ Русияро дубора ба дасти худ гирифт ва ба Ғарб чашм дӯхт”-ро ба додгоҳ додааст. Абрамович дорои шаҳрвандии Русия ва Исроил аст ва дар шикояти худ иддаои муаллифи китоб дар бораи инро, ки соли 2003 клуби футболи “Челси”-ро бо дастури Путин харидааст, ба чолиш кашидааст.

Вакили Абрамович Ҳю Томлинсон рӯзи 28 июл дар Додгоҳи олӣ гуфт, ки дар китоб иттилои “носаҳҳеҳ” дар бораи иртибот бо Кремлин ҷой дорад. Вале ҷониби ҷавобгар ба дурустиву ботавозун иншо шудани иттилои китоб пойфишорӣ мекунад ва мегӯяд, ки он бар пояи гузоришҳои таҳқиқотӣ ва мусоҳибаҳо навишта шудааст. Китоб апрели соли 2020 нашр шуд ва унвони китоби пурфурӯши нашрияи Sunday Times-ро касб кард. Кетрин Белтон, собиқ хабарнигори Financial Times, рӯзи 28-уми июл ҷараёни мурофиаро шарҳ надод.

Ҷопон бо сабаби афзоиши бемории COVID-19 ҳолати фавқулодда ҷорӣ карданист

Деҳаи олимпии Токио. 29 июли соли 2021

Ҷопон,и мизбони Бозиҳои Олимпӣ, ният дорад, 30-юми июл дар шаҳри Токио ва чаҳор минтақаи дигар ҳолати фавқулодда ҷорӣ бикунад. Мақомоти он кишвар гуфтанд, мавридҳои гирифторӣ ба бемории COVID-19 "рекордӣ шудааст".

Йошиҳиде Суга, нахуствазири Ҷопон, пас аз ҷаласаи коршиносони кишвар дар ин замина изҳорот хоҳад дод. Ҳолати фавқулодда то 31-уми август дар минтақаҳои Саитама, Канагава, Осака ва Чиба, ки дар наздикии Токио мебошад, ҷорӣ мешавад. Чунин чораҳо аллакай дар Токио ва ҷазираи ҷанубии Окинава амал мекунанд.

Ҷопон дар давраи пандемия тавонист, ки аз гирифторшавии сартосарӣ ба коронавирус пешгирӣ кунад, вале ҳоло ба монанди бисёре аз гӯшаҳои ҷаҳон аз навъи бисёр босуръат паҳншавандаи бемории ҳамагир азият мешавад.

Рӯзи 29-уми июл Токио гузориш дод, ки бори аввал дар давраи пандемия дар як рӯз 10 ҳазор кас ба коронавирус гирифтор шудааст. Беморхонаҳо дар ҳолати сангин кор мекунанд ва нисфи 6 ҳазор кати беморӣ дар ин муассисаҳои тиббӣ бо беморони COVID-19 пур шудааст.

Масъулини бозиҳои олимпӣ ва ҳукумат гуфтанд, Олимпиада ба афзоиши мавридҳои гирифторӣ ба коронавирус ҳеч рабт надорад. Бозиҳо 23-юми июл сар шуда, то 8-уми август натиҷагирӣ мешаванд. Аз оғози моҳи июл дар деҳаи олимпӣ 220 ҳолати гирифторӣ ба коронавирус ба қайд гирифта шуд. Дар маҷмӯъ дар бозиҳои олимпӣ 40 ҳазор варзишгар ва кормандону ёрирасонон иштирок мекунанд.

Ёфтҳои бештар

XS
SM
MD
LG